സുരക്ഷാ സംവിധാനത്തില്‍ കയര്‍ ഘടിപ്പിക്കാന്‍ ജീവനക്കാര്‍ മറന്നതിനിടെ ബഞ്ചി ജംപിനിടെ 130 അടി താഴ്ചയിലേക്ക് വീണ് 21കാരിക്ക് ദാരുണാന്ത്യം. ബ്രസീലിലെ സാവോപോളോയില്‍ മരിയ എഡ്വേര്‍ഡ് റോഡ്രിഗസ് ഡി ഫ്രീറ്റാസ് എന്ന യുവതിയാണ് കൊല്ലപ്പെട്ടത്.

ഒരു സ്വകാര്യ കമ്പനിയുമായുള്ള ജംപിനിടെയാണ് സംഭവം. സുരക്ഷാ കയറായ ബഞ്ചി കോര്‍ഡ് യുവതിയുടെ ശരീരത്തില്‍ ബന്ധിപ്പിച്ചിരുന്നില്ല എന്ന കാര്യം ശ്രദ്ധിക്കാതെ ജീവനക്കാര്‍ മരിയയെ പാലത്തിന്റെ അരികിേേലക്ക് കൂട്ടിക്കൊണ്ടു പോകുകയും താഴേക്ക് വലിച്ചെറിയുകയുമായിരുന്നു. സംഭവത്തില്‍ ആറു ജീവനക്കാരെ അറസ്റ്റ് ചെയ്തിട്ടുണ്ട്. അപകടം നടന്നയുടന്‍ തന്നെ രക്ഷാപ്രവര്‍ത്തകര്‍ സ്ഥലത്തെത്തിയെങ്കിലും യുവതി സംഭവ സ്ഥലത്ത് തന്നെ മരണപ്പെട്ടിരുന്നു.

മൃതദേഹം പിന്നീട് പോസ്റ്റ്‌മോര്‍ട്ടം നടപടികള്‍ക്കായി ആശുപത്രിയിലേക്ക് മാറ്റി. സംഭവ സ്ഥലത്ത് നിന്ന് പകര്‍ത്തിയ വീഡിയോകളില്‍ ജീവനക്കാര്‍ അവരെ പാലത്തിന്റെ അരികിലേക്ക് കൊണ്ടുപോകുകയും അവരെ താഴേക്ക് ഇടുന്നതും കാണാം. ചുറ്റുംനിന്നിരുന്ന ആളുകള്‍ പരിഭ്രാന്തരായി ' കയര്‍, ആളുകളേ കയര്‍ നോക്കൂ' എന്ന് വിളിച്ചുപറയുന്നതും കേള്‍ക്കാം.

വീഴുമ്പോള്‍ ജംപറെ താങ്ങിനിറുത്താന്‍ രൂപകല്പന ചെയ്ത സുരക്ഷാ ചരട് യുവതിയുടെ ശരീരവുമായി ബന്ധിപ്പിച്ചിട്ടില്ലെന്നും അവര്‍ താഴെയുള്ള മലയിടുക്കിലേക്ക് വീണുവെന്നും പ്രാദേശിക ഭരണകൂടം അറിയിച്ചു. യുവതിയുടെ മരണം സ്ഥിരീകരിച്ചുവെന്നും മൃതദേഹം പോസ്റ്റ്‌മോര്‍ട്ടത്തിനായി ലീഗല്‍ മെഡിക്കല്‍ ഇന്‍സ്റ്റിറ്റിയൂട്ടിലേക്ക് മാറ്റിയതായും അധികൃതര്‍ വ്യക്തമാക്കി.