ഇറാന്‍ അമേരിക്ക സമാധാന ധാരണ ഒപ്പുവെക്കുന്നത് വെള്ളിയാഴ്ച്ചയെന്ന് ഉറപ്പായി. ധാരണ നിലവില്‍ വന്നത് ഇറാനും അമേരിക്കയും സ്ഥിരീകരിച്ചു. ഹോര്‍മൂസ് തുറക്കാനുള്ള നടപടികള്‍ ഇരുപക്ഷവും ഉടനെ തുടങ്ങും. ആഗോള എണ്ണ, സ്വര്‍ണം വിലയിലും ഓഹരി വിപണികളിലും പ്രഖ്യാപനം വന്‍ ചലനമുണ്ടാക്കി. ഇറാനിലും ഇസ്രയേലിലും ധാരണയ്ക്ക് എതിരെ വികാരമുണ്ട്. ആദ്യം ഒമാന്‍, പിന്നെ പാക്കിസ്ഥാന്‍, പലവട്ടം ചര്‍ച്ചകള്‍ നടന്നിട്ടും സംഘര്‍ഷം തുടര്‍ന്നുകൊണ്ടേയിരിക്കെയാണ് ഖത്തര്‍ പ്രധാന റോളില്‍ എത്തുന്നത്. ഇക്കഴിഞ്ഞ ദിവസങ്ങളില്‍ ടെഹറാനിലേക്ക് ഖത്തര്‍ സംഘം രണ്ട് നിര്‍ണായക യാത്രകള്‍ നടത്തി. അതിലൊന്ന് ഇറാനില്‍ അമേരിക്ക ആക്രമണം നടത്തിക്കൊണ്ടിരിക്കെ ആയിരുന്നു. പിന്നാലെ ഇന്നലെ രാത്രി ഡോണള്‍ഡ് ട്രംപ് ധാരണ നിലവില്‍ വന്നത് പ്രഖ്യാപിച്ചു. ഇന്ന് ഇറാനും അത് സ്ഥിരീകരിച്ചു.

വെള്ളിയാഴ്ച്ച ധാരണ ഒപ്പിടുമെന്ന വിവരവും ഇപ്പോള്‍ പുറത്തുവന്നിരിക്കുകയാണ്. ധാരണ പൊളിക്കാന്‍ അവസാന മണിക്കൂറിലും ലബനനില്‍ തലസ്ഥാനം തന്നെ ആക്രമിച്ചുള്ള ഇസ്രയേല്‍ നീക്കം വകവെച്ചില്ല. ധാരണ സ്ഥിരീകരിച്ചതിന് പിന്നാലെ എല്ലാ മേഖലയിലും യുദ്ധം അവസാനിക്കുമെന്നാണ് ഇറാന്‍ പ്രഖ്യാപിച്ചിരിക്കുന്നത്. ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവിന്, ഇസ്രയേലിനെ അപ്രസക്തമാക്കിയുള്ള ധാരണ വലിയ ക്ഷീണമായി. ഇതില്‍ നെതന്യാഹുവിനെതിരെ പ്രതിപക്ഷം ആഞ്ഞടിക്കുകയാണ്. നിലവില്‍ പിടിച്ചെടുത്ത മേഖലകളില്‍ നിന്ന് പിന്മാറില്ലെന്നാണ് ഇസ്രയേല്‍ നിലപാട്. ഇറാന്റെ ദേശീയ താല്‍പര്യങ്ങളില്‍ വിട്ടുവീഴ്ച്ച ചെയ്‌തെന്ന് കാട്ടി ഇറാനില്‍ തീവ്രനിലപാടുള്ളവര്‍ രോഷത്തിലാണ്.

ധാരണയ്ക്കായി പ്രയത്‌നിച്ച നയതന്ത്ര ദൗത്യത്തിലുള്ളവരെ ചതിയന്മാരെന്നും വഞ്ചകരെന്നും വിളിക്കുന്നത് മര്യാദയല്ലെന്ന് ഇറാന്‍ പ്രസിഡണ്ടിന് പറയേണ്ടി വന്നു. എണ്ണ വില താഴുകയും സ്വര്‍ണ വില ഉയരുകയും ഓഹരിവിപണികള്‍ ആശങ്ക നീങ്ങി കുതിക്കുകയും ചെയ്തു. ഹോര്‍മൂസിലെ ആയിരക്കണക്കിന് കപ്പലുകള്‍ പുറത്തു കടക്കാന്‍ ഊഴം കാത്ത് കിടക്കുകയാണ്. ഇറാന് 30,000 കോടി ഡോളര്‍ അമേരിക്ക പുനര്‍നിര്‍മാണ ഫണ്ട് നല്‍കുമെന്ന് ഇറാന്‍ മാധ്യമങ്ങള്‍ അവകാശപ്പെടുന്നു. 2500 കോടി ഡോളര്‍ ഫണ്ട് മരവിപ്പിച്ചത് തിരികെ നല്‍കും. എണ്ണ ഉപരോധം നീക്കും. ഖത്തറും കുവൈത്തും ധാരണയെ സ്വാഗതം ചെയ്തു. ജര്‍മ്മനിയും ഫ്രാന്‍സും യു.കെയും ഉള്‍പ്പടെ ഉഇറാനു മേലുള്ള കൂടുതല്‍ ഉപരോധങ്ങള്‍ നീക്കിയെക്കും.