തിരച്ചടികള്‍ എല്ലാവര്‍ക്കും ഉണ്ടാകും ഏത് വമ്പനും പക്ഷേ ഞങ്ങള്‍ തളരില്ല. അമേരിക്കയിലെ വ്യോമയാന വാഹന നിര്‍മ്മാതാക്കളായ സ്‌പേസ് എക്‌സിന്റെ റോക്കറ്റ് ലൊഞ്ച് സൈറ്റില്‍ സ്‌ഫോടനം. ഫാല്‍ക്കണ്‍ 9 റോക്കറ്റാണ് വിക്ഷേപണ പരീക്ഷണ വേളയില്‍ പോട്ടിത്തെറിച്ചത്. അമേരിക്കന്‍ ബഹിരാകാശ കമ്പനിയായ സ്‌പേസ് എക്‌സ് ആണ് റോക്കറ്റ് പരീക്ഷണ വിക്ഷേപണം നടത്തിയത്.
കേപ് കനവറിലെ ലോഞ്ച് പാഡില്‍ വെച്ച് പ്രാദേശിക സമയം വ്യാഴാഴ്ച രാവിലെ ഒമ്പതിനാണ് സ്‌ഫോടനം നടന്നത്. ശനിയാഴ്ച നടക്കുന്ന വിക്ഷേപണത്തിന് മുന്നോടിയായുള്ള പരീക്ഷണത്തിനിടെയായിരുന്നു സ്‌ഫോടനം.
സ്‌ഫോടനത്തില്‍ സമീപത്തെ കെട്ടിടങ്ങള്‍ പ്രകമ്പനം കൊള്ളുന്നതിന്റേയും ആകാശത്തേക്ക് കനത്ത പുക ഉയരുന്നതിന്റെയും ദൃശ്യങ്ങള്‍പുറത്ത് വന്നിട്ടുണ്ട്. പൊട്ടിത്തെറിയില്‍ ജീവാപായമുണ്ടായിട്ടില്ലെന്നും വിശദമായ അന്വേഷണം ആരംഭിച്ചതായും കമ്പനി അറിയിച്ചു.
ഇന്റര്‍നെറ്റ് കമ്പനിയായ ഫേസ്ബുക്കിന്റേയും ഫ്രഞ്ച് സാറ്റലൈറ്റ് കമ്പനിയായ യൂട്ടെല്‍സാറ്റ് കമ്യൂണിക്കേഷന്റേയും സംയുക്ത ഉടമസ്ഥതയിലുള്ള അമോസ്6 എന്ന ഉപഗ്രഹത്തിന്റെ വിക്ഷേപണത്തിനുള്ളതായിരുന്നു റോക്കറ്റ്.
ഇസ്രയേലി കമ്പനിയായ സ്‌പേസ്‌കോമായിരുന്നു ഉപഗ്രഹം നിര്‍മിച്ചത്. യൂറോപ്പ്, മിഡില്‍ ഈസ്റ്റ്, ആഫ്രിക്ക എന്നിവടങ്ങളില്‍ ഇന്റര്‍നെറ്റ് സൗകര്യം ഒരുക്കാനുള്ളതായിരുന്നു ഈ ഉപഗ്രഹം.
ഉപഗ്രഹം തകര്‍ന്ന ഉടന്‍തന്നെ ഫേസ്ബുക്ക് സ്ഥാപകന്‍ മാര്‍ക്ക് സുക്കര്‍ബ്രര്‍ഗ്ഗ് തന്റെ ഫേസ്ബക്ക് അക്കൗണ്ടിലൂടെ ഈ ദുഃഖവാര്‍ത്ത ലോകത്തെ അറിയിച്ചിരുന്നു.
സംഭവത്തില്‍ വളരെയധികം ദുഃഖമുണ്ടെന്നും എന്നാല്‍ എല്ലാവര്‍ക്കും ഇന്റര്‍നെറ്റ് ലഭ്യമാകുന്നതിന് ആവശ്യമായ സൗകര്യമൊരുക്കുന്നതുവരെ പദ്ധതിയുമായി മുന്നോട്ടു പോകുമെന്നും അദ്ദേഹം വ്യക്തമാക്കി.
സ്‌ഫോടനത്തെ തുടര്‍ന്ന് വിക്ഷേപണത്തറക്ക് എന്തെങ്കിലും കേടുപാട് സംഭവിച്ചിട്ടുണ്ടോ എന്നത് സംബന്ധിച്ച വിശദാംശങ്ങള്‍ പുറത്ത് വന്നിട്ടില്ല. ഇത്തരത്തില്‍ കേടുപാട് സംഭവിച്ചിട്ടുണ്ടെങ്കില്‍ നാസയുടേതടക്കം നിരവധി ഉപഗ്രഹങ്ങളുടെ വിക്ഷേപണത്തെ ബാധിക്കും.
95 ലക്ഷം അമേരിക്കന്‍ ഡോളറാണ് ഫ്രഞ്ച് സാറ്റലൈറ്റ് കമ്പനിയായ യൂട്ടെല്‍സാറ്റ് കമ്യൂണിക്കേഷന്റേയും ഫേസ്ബുക്കിന്റെയും സംയുക്ത ഉടമസ്ഥതയിലുള്ള അമോസ്6ന് വേണ്ടി ഫേസ്ബുക്ക് മുടക്കിയത്.
കഴിഞ്ഞ വര്‍ഷം ജൂണില്‍ രാജ്യാന്തര ബഹിരാകാശ നിലയത്തിലേക്കുള്ള ചരക്കുപേടകവുമായി കുതിച്ചുയര്‍ന്ന ഫാല്‍ക്കണ്‍ 9 റോക്കറ്റും വിക്ഷേപിച്ച് രണ്ടു മിനിറ്റിനകം പൊട്ടിത്തെറിച്ചിരുന്നു.