കൊമ്പ് കോര്ത്ത് ഹിലാരിയും ട്രംപും, യുഎസ് പ്രസിഡന്റ് തിരഞ്ഞെടുപ്പിനു ചൂടേറുന്നു, സ്ഥാനാര്ഥികള് നേരിട്ട് പങ്കെടുക്കുന്ന നിര്ണായകമായ നാല് സംവാദങ്ങള്
യുഎസ് പ്രസിഡന്റ് തിരഞ്ഞെടുപ്പ് ഡമോക്രാറ്റ്, റിപ്പബ്ലിക്കന് സ്ഥാനാര്ഥികള് ഒരേ വേദിയില് വരുന്ന തല്സമയ സംവാദ പരിപാടികള്ക്ക് തുടക്കമായി.അമേരിക്കന് പ്രസിഡന്റ് തിരഞ്ഞെടുപ്പില് ഏറ്റവും നിര്ണായകമാണ് സ്ഥാനാര്ഥികള് നേരിട്ട് പങ്കെടുക്കുന്ന നാല് സംവാദങ്ങള്. ഹോഫ്സ്ട്രാ സര്വകലാശാല ക്യാംപസില് നടക്കുന്ന ആദ്യ സംവാദം തന്നെ ലോകശ്രദ്ധയാകര്ഷിക്കുമെന്നുറപ്പാണ്. 90 മിനിറ്റ് നീളുന്ന സംവാദത്തില് 15 മിനിറ്റിന്റെ ആറു പകുതികളാണ് ഉണ്ടാവുക. മൂന്നു ദശകത്തിനിടയിലെ ഏറ്റവും വാശിയേറിയ സംവാദമാണ് ഹിലറി ക്ലിന്റനും ഡോണള്ഡ് ട്രംപും തമ്മില് നടക്കുന്നതെന്നാണ് വിലയിരുത്തല്.
രാജ്യത്തിന്റെ മുന്നോട്ടുള്ള വഴി, പുരോഗതി, സുരക്ഷ. വിഷയവുമായി ബന്ധപ്പട്ട ചോദ്യവുമായി മോഡറേറ്റര് ചര്ച്ച തുടങ്ങും. മറുപടിക്ക് രണ്ടു മിനിറ്റ്. തുടര്ന്ന് സ്ഥാനാര്ഥികള് പരസ്പരമുള്ള മറുപടികള്. എന്ബിസി അവതാരകന് ലെസ്റ്റര് ഹോള്ട്ടാണ് ആദ്യ സംവാദത്തില് മോഡറേറ്റര്. സ്ഥാനാര്ഥികള് ചോദ്യങ്ങളില്നിന്ന് ഒഴിഞ്ഞു മാറാന് ശ്രമിച്ചാല് മോഡറേറ്റര്ക്ക് ഇടപെടാം. 1980ല് റോണള്ഡ് റീഗനും ഡിമ്മി കാര്ട്ടറും തമ്മില് നടന്നസംവാദമാണ് ഇതിന് മുമ്പ് ഏറ്റവും വലിയ പ്രേക്ഷകശ്രദ്ധ പിടിച്ചുപറ്റിയത്. എട്ടു കോടി ജനങ്ങളാണ് അന്ന് സംവാദം കണ്ടത്. ഇക്കുറി ഈ എണ്ണം മറികടക്കുമെന്നാണ് പ്രതീക്ഷ.
രാജ്യത്തെ തൊഴില് അവസരങ്ങള് വര്ധിപ്പിക്കുന്നതിനെക്കുറിച്ചായിരുന്നു സംവാദത്തില് ആദ്യമുയര്ന്ന ചോദ്യം. ഈ വിഷയത്തില് രണ്ടു വ്യത്യസ്ത നിലപാടുകളാണ് ഇരുസ്ഥാനാര്ഥികളും സ്വീകരിച്ചത്. ചൈന ഉള്പ്പെടെയുള്ള രാജ്യങ്ങള് അമേരിക്കന് ജനതയുടെ തൊഴിലവസരങ്ങള് തട്ടിയെടുക്കുന്നു. ഇതു തടയാനുള്ള നടപടികള് സ്വീകരിക്കുമെന്നും നികുതി ഇളവ് നല്കി വലിയ കമ്പനികളെ രാജ്യത്തിനു പുറത്തേക്കുകൊണ്ടുപോകുന്നത് തടയുമെന്നുമായിരുന്നു റിപ്പബ്ലിക്കന് സ്ഥാനാര്ഥി ഡോണള്ഡ് ട്രംപിന്റെ പ്രതികരണം.
\അതേസമയം, സാമ്പത്തിക സമത്വത്തെക്കുറിച്ചായിരുന്നു ഡമോക്രാറ്റ് സ്ഥാനാര്ഥി ഹിലറി ക്ലിന്റന് പറഞ്ഞത്. പണക്കാരനെയും പാവപ്പെട്ടവനെയും തുല്യരായി പരിഗണിക്കുന്ന സമ്പദ് വ്യവസ്ഥയാണ് തന്റെ സ്വപ്നമെന്ന് ഹിലറി പറഞ്ഞു. സ്ത്രീകള്ക്ക് തുല്യ വേതനം, അടിസ്ഥാന വേതനത്തില് വര്ധന എന്നിവയാണ് എന്റെ സ്വപ്നം. സാധാരണക്കാര്ക്ക് വേണ്ടിയാണ് താന് നിലകൊള്ളുന്നതെന്നും ട്രംപ് പണക്കാരെ സംരക്ഷിക്കാനാണ് ശ്രമിക്കുന്നതെന്നും ഹിലറി പറഞ്ഞു. ഇതു ചെറിയ വാക്കേറ്റങ്ങള്ക്ക് ഇടയാക്കി.
https://www.facebook.com/Malayalivartha
