വീട്ടുവേലക്കാരി വീട്ടിലെ ആറു വയസ്സുകാരിയെ കഴുത്തറുത്ത് കൊലപ്പെടുത്തി കക്കൂസില്‍ തള്ളിയ കേസില്‍ സൗദി അറേബ്യ വേലക്കാരിയെ വധശിക്ഷയ്ക്ക് വിധേയമാക്കി. എത്യോപ്യക്കാരിയായ സംസം അബ്ദുള്ള ബുറൈക് എന്ന സ്ത്രീയെയാണ് റിയാദ് നഗരത്തില്‍ തിങ്കളാഴ്ച ഇപ്രകാരം വധശിക്ഷയ്ക്ക് വിധേയയാക്കിയത് .

2013 ലാണ് കേസിന് ആസ്പദമായ സംഭവം നടക്കുന്നത്. റിയാദില്‍ നിന്നും 150 കിലോ മീറ്റര്‍ മാറി ഹോട്ടാ ബനി തമീമ് ആണ് സ്ഥലം. ലമീസ് ബിന്റ് മുഹമ്മദ് അല്‍ സല്‍മാന്‍ എന്ന പെണ്‍കുഞ്ഞിനെ കറിക്കത്തി ഉപയോഗിച്ച് കഴൂത്തറത്ത് കൊന്നതിന് ശേഷം മൃതദേഹം പല കഷണങ്ങളായി മുറിയ്ക്കുകയും തുടര്‍ന്ന് കക്കൂസില്‍ നിക്ഷേപിക്കുകയും ചെയ്തു.

കൊലപാതകം നടത്തിയതിന് തൊട്ടുപിന്നാലെ തന്നെ വേലക്കാരിയെ പോലീസ് അറസ്റ്റ് ചെയ്തു. വിവരമറിഞ്ഞ് വീട്ടിലെത്തിയ പോലീസ് ലമീസയെ രക്തത്തില്‍ കുളിച്ച നിലയില്‍ കണ്ടെത്തുകയായിരുന്നു. തുടര്‍ന്ന് നടത്തിയ അന്വേഷണത്തില്‍ ഒരു ഇറച്ചി വെട്ടുന്ന കത്തിയുമായി വേലക്കാരിയെ വീട്ടിന് പിന്നിലെ സ്‌റ്റോറില്‍ നിന്നും കണ്ടെത്തി. ആദ്യം കുറ്റം നിഷേധിക്കാന്‍ ശ്രമിച്ചെങ്കിലും ഏറെ താമസിയാതെ ഇവര്‍ കുറ്റം സമ്മതിച്ചു.

വീട്ടുടമ തന്നോട് മോശമായി പെരുമാറിയതിനുള്ള പ്രതികാരമായിട്ടാണ് താനീ കുറ്റം ചെയ്തതെന്നായിരുന്നു പോലീസിനോട് അവര്‍ വിശദീകരണമായി പറഞ്ഞത്. അന്വേഷണത്തിന്റെ അവസാനം 2013 ഡിസംബറില്‍ ഇവരെ കുറ്റക്കാരിയാണെന്ന് കണ്ടെത്തി. തുടര്‍ന്ന് ഇവരെ വധശിക്ഷയ്ക്ക് വിധിച്ചു. കഴിഞ്ഞ തിങ്കളാഴ്ചയാണ് ശിക്ഷ നടപ്പാക്കിയത്.

മകളുടെ മരണ ദിവസം ട്വിറ്റര്‍ അക്കൗണ്ടില്‍ ലമീസയുടെ അച്ഛന്‍ എഴുതിയ കുറിപ്പ് ഏറെ ശ്രദ്ധിക്കപ്പെട്ടിരുന്നു. മകളുടെ ചിത്രവും കുറിപ്പിനൊപ്പം പോസ്റ്റ് ചെയ്തിരുന്നു. വികാരാധീനനായ അദ്ദേഹത്തിന്റെ കുറിപ്പ് ഇങ്ങനെ 'ഇത് എന്റെ മകള്‍ ലമീസ. ഇവള്‍ ജനിച്ചപ്പോള്‍ താന്‍ ഏറെ സന്തോഷിച്ചു. എടുത്തു കൊണ്ട് എല്ലായിടത്തും നടന്നു. ഇന്ന് ഞാനവളെ എടുത്തുകൊണ്ട് പോകുന്നത് അവളുടെ കുഴിമാടത്തിലേക്കാണ്. ഇത്തരമൊരു രംഗം ഞാന്‍ ചിന്തിച്ചിട്ട് പോലും ഇല്ലായിരുന്നു. അവളെ ഒരു വധുവിനെപ്പോലെയായിരുന്നു ഞാന്‍ ചിന്തിച്ചിരുന്നത് മുഴുവന്‍'.