കാശ്മീര്‍ വിഷയത്തില്‍ പാകിസ്ഥാന് പിന്തുണ പ്രഖ്യാപിച്ചുവെന്ന വാര്‍ത്ത നിഷേധിച്ച് ചൈന രംഗത്ത്. പാകിസ്ഥാന് പൂര്‍ണ പിന്തുണ പ്രഖ്യാപിച്ചുവെന്ന വാര്‍ത്ത തെറ്റാണെന്ന് ചൈന വ്യക്തമാക്കി. പാക് മാധ്യമങ്ങളില്‍ തന്റെ പേരില്‍ പ്രസിദ്ധീകരിച്ച പ്രസ്താവന അടിസ്ഥാനരഹിതമാണെന്ന് ചൈനീസ് വിദേശകാര്യ മന്ത്രാലയ വക്താവ് യു ബൊരനുംഇതോടോപ്പം വ്യക്തമാക്കി.

വിദേശത്തുനിന്ന് ആക്രമണമുണ്ടായാല്‍ പാക്കിസ്ഥാനു പൂര്‍ണ പിന്തുണ നല്‍കുമെന്നു കഴിഞ്ഞയാഴ്ച ലഹോറിലെ ചൈനീസ് കോണ്‍സല്‍ ജനറല്‍ യു ബോരന്‍ അറിയിച്ചതായി പാക്കിസ്ഥാന്‍ അവകാശപ്പെട്ടിരുന്നു. ഇക്കാര്യത്തെക്കുറിച്ച് ചോദിച്ചപ്പോഴാണ് ചൈനീസ് വിദേശകാര്യ മന്ത്രാലയം നിലപാട് വ്യക്തമാക്കിയത്.

മാധ്യമപ്രവര്‍ത്തകര്‍ സൂചിപ്പിച്ചതുപോലെയുള്ള ഒരു സാഹചര്യത്തെപ്പറ്റി അറിയില്ലെന്ന് പുതുതായി നിയമിതനായ ചൈനീസ് വിദേശകാര്യ മന്ത്രാലയ വക്താവ് ജെങ് സുഹാങ് പറഞ്ഞു. വിഷയത്തില്‍ ചൈനയുടെ നിലപാട് വ്യക്തമാണ്. പാക്കിസ്ഥാനും ഇന്ത്യയും തമ്മിലുള്ള അഭിപ്രായ വ്യത്യാസങ്ങള്‍ ചര്‍ച്ചകളിലൂടെ പരിഹരിക്കണം. ദക്ഷിണ ഏഷ്യയുടെ പുരോഗതിക്കും സമാധാനത്തിനും സ്ഥിരതയ്ക്കും അത് ആവശ്യമാണെന്നും ചൈന വ്യക്തമാക്കി.

ഇന്ത്യയുമായി സംഘര്‍ഷമുണ്ടാകുന്ന സാഹചര്യത്തില്‍ ചൈനയുടെ പൂര്‍ണ പിന്തുണ പാകിസ്താന് നല്‍കുമെന്ന് യുവിനെ ഉദ്ധരിച്ച് പാക് മാധ്യമമായ ഡോണ്‍ റിപ്പോര്‍ട്ട് ചെയ്തിരുന്നു. എന്നാല്‍ പ്രസ്താവന തെറ്റാണെന്ന് യു വ്യക്തമാക്കിയിരിക്കുകയാണ്.

കശ്മീരിലെ നിലവിലെ സാഹചര്യം എന്താണെന്ന് അറിയില്ല. ഇക്കാര്യത്തില്‍ ചൈനയുടെ നിലപാട് സുസ്ഥിരവും വ്യക്തവുമാണ്. കശ്മീര്‍ പ്രശ്‌നം ചര്‍ച്ചയിലൂടെ പരിഹരിക്കപ്പെടുമെന്നാണ് പ്രതീക്ഷിക്കുന്നതെന്നും യു പറഞ്ഞു. ഒരാഴ്ചയ്ക്കിടെ ഇത് രണ്ടാം തവണയാണ് പാകിസ്താന് പിന്തുണ പ്രഖ്യാപിച്ചുവെന്ന പ്രസ്താവന ചൈന നിഷേധിക്കുന്നത്.

ജമ്മു കശ്മീരിലെ ഉറിയിലുണ്ടായ ഭീകരാക്രമണത്തെ തുടര്‍ന്നാണ് വീണ്ടും ഇന്ത്യപാക്ക് ബന്ധം വഷളായത്. ഈ മാസം 18ന് ഉണ്ടായ ആക്രമണത്തില്‍ 19 ഇന്ത്യന്‍ സൈനികരാണ് വീരമൃത്യു വരിച്ചത്. പാക്ക് പിന്തുണയോടെയാണ് ഭീകരര്‍ ആക്രമണം നടത്തുന്നത് എന്നാണ് ഇന്ത്യന്‍ ആരോപണം. ഇതിനെതിരെ ഇന്ത്യ ശക്തമായി തിരിച്ചടിക്കുമെന്ന് പ്രധാനമന്ത്രി മോദി വ്യക്തമാക്കിയിരുന്നു. ഇതോടെ, ഇന്ത്യപാക്ക് യുദ്ധം വരെ ഉണ്ടായേക്കുമെന്ന അഭ്യൂഹങ്ങള്‍ പടര്‍ന്നു. ഇത്തരത്തില്‍ സംഘര്‍ഷാവസ്ഥ നിലനില്‍ക്കുന്ന സാഹചര്യത്തില്‍ മേഖലയിലെ പ്രധാന ശക്തികളിലൊന്നായ ചൈനയുടെ നിലപാട് നിര്‍ണായകമായിരുന്നു.