പലവിധ പ്രതികാരം കേട്ടിട്ടുണ്ട് എന്നാല്‍ ഇത്തരത്തിലുള്ളവയുമുണ്ട്. നിരപരാധികളെ കൊന്നൊടുക്കി ഇസ്ലാമിക രാജ്യം കെട്ടിപ്പടുക്കാന്‍ ശ്രമിക്കുന്ന ഐസിസ് ഭീകരര്‍ ഇറാഖില്‍ ഏറ്റവും കൂടുതല്‍ ഭയക്കുന്നത് അമേരിക്കയുടെ ബോംബര്‍ വിമാനങ്ങളെയല്ല. മറിച്ച്, പ്രതികാരാഗ്‌നിയില്‍ കരുത്താര്‍ജിച്ച സ്ത്രീകളുടെ ഗുണ്ടാസംഘത്തെയാണ്. അച്ഛനെയും ഭര്‍ത്താവിനെയും സഹോദരന്മാരെയും കൊലപ്പെടുത്തിയ ഭീകരര്‍ക്കെതിരെ ഇവര്‍ നടത്തുന്ന പകയുടെ പോരാട്ടമാണ് ഇറാഖില്‍ ഇന്നേറ്റവും തീഷ്ണം.
39കാരിയായ വാഹിദ മുഹമ്മദ് അല്‍ ജുമൈലിയാണ് സ്ത്രീകളുടെ പോര്‍സംഘത്തിന്റെ നേതാവ്. തന്റെ അച്ഛനെയും മൂന്ന് സഹോദരന്മാരെയും രണ്ടാം ഭര്‍ത്താവിനെയും കൊലപ്പെടുത്തിയ ഐസിസിനോട് തീര്‍ത്താല്‍ തീരാത്ത പകയാണ് വാഹിദയ്്ക്ക്. വീട്ടമ്മ എന്ന് സ്വയം വിശേഷിപ്പിക്കുന്ന വാഹിദ ഐസിസ് ഭീകരരോട് പകവീട്ടുന്നത് ആരും ഇതുവരെ ചിന്തിക്കാത്ത രീതിയിലാണ്.
കൊലപ്പെടുത്തുന്ന ഭീകരരുടെ തലയറുത്തെടുത്ത് അത് പാകം ചെയ്യുകയും ശരീരം കത്തിച്ചാമ്പലാക്കുകയുമാണ് വാഹിദയുടെയും കൂട്ടരുടെയും രീതി. ഈ ചിത്രങ്ങള്‍ വാഹിദ തന്‍െ ഫേസ്ബുക്ക് പേജില്‍ പോസ്റ്റ് ചെയ്തിട്ടുമുണ്ട്. രണ്ട് ഭീകരരുടെ തല പാത്രത്തില്‍വച്ച് വേവിക്കുന്ന ചിത്രമാണ് വാഹിദ ഫേസ്ബുക്കില്‍ ഇട്ടിട്ടുള്ളത്.
ഇതേവരെ 18 ഭീകരരെ താന്‍ കൊന്നിട്ടുണ്ടെന്ന് വാഹിദ പറഞ്ഞു. താനും തന്റെ കൂട്ടുകാരും ഒരു കുടുംബത്തെപ്പോലെയാണ് ഐസിസിനോടുള്ള പ്രതികാരം വീട്ടുന്നതെന്നും വാഹിദ പറഞ്ഞു. മൊസൂളില്‍നിന്ന് 50 മൈല്‍ അകലെയുള്ള ഷിര്‍ഖത്തില്‍ വാഹിദയുടെ കീഴില്‍ 70 അംഗ സേന പ്രവര്‍ത്തിക്കുന്നു. മേഖലയില്‍നിന്ന് ഐസിസിനെ തുരത്തുന്നതില്‍ സര്‍ക്കാര്‍ സേനയെ വാഹിദയും സംഘവും സഹായിക്കുന്നു. കൊലപ്പെടുത്തേണ്ടവരുടെ പട്ടികയില്‍ ഐസിസ് ഉള്‍പ്പെടുത്തിയിട്ടുള്ളവരില്‍ പ്രധാനിയാണ് വാഹിദ. ഇതിനകം ആറ് വധശ്രമങ്ങളാണ് ഇവര്‍ക്കുനേരെ ഉണ്ടായത്. ഉന്നത നേതാക്കളില്‍നിന്നുള്ള വധഭീഷണിയും വേറെ.കഴിഞ്ഞയാഴ്ച ഷിര്‍ഖത്ത് നഗരകേന്ദ്രത്തിലേക്ക് 50അംഗ സംഘവുമായി ചെന്ന വാഹിദ ഐസിസ് ഭീകരരില്‍നിന്ന് നഗരകേന്ദ്രം പിടിച്ചെടുക്കുകയും ചെയ്തു. ഉറ്റവരെ നഷ്ടപ്പെട്ടവരുടെ പ്രതികാരം ഐസിസിന്റെ നിലനില്‍പ്പിനെത്തന്നെ ചോദ്യം ചെയ്യുകയാണിപ്പോള്‍.