പട്ടാളം കാര്യങ്ങള്‍ തീരുമാനിക്കുന്ന രാജ്യം എന്നും അശാന്തിയുടേതായിരിക്കും. അതിനുത്തമ ഉദാഹരണമാണ് പാക്കിസ്ഥാന്‍. പാകിസ്താനില്‍ പട്ടാള അട്ടിമറിക്ക് സാധ്യതയോ? ലോകം മുഴുവന്‍ പാകിസ്താനിലേക്ക് ഉറ്റ് നോക്കുകയാണ്. പാക് അധീന കശ്മീരിലെ ഭീകര ക്യാമ്പുകളില്‍ ഇന്ത്യന്‍ സൈന്യം നടത്തിയ മിന്നലാക്രമണത്തിന്റെ പശ്ചാത്തലത്തില്‍ മറ്റൊരു പട്ടാള അട്ടിമറിക്ക് സാധ്യത ഉണ്ടെന്നാണ് വിലയിരുത്തപ്പെടുന്നത്. പാകിസ്ഥാനെന്ന രാജ്യത്തിന്റെ ഇരുണ്ട ചരിത്രം തന്നെയാണ് ഈ ചിന്തയ്ക്ക് ശക്തി പകരുന്നത്.
പാകിസ്താന്‍ ജനാധിപത്യം എന്നും സൈന്യത്തിന്റെ നിഴലിലായിരുന്നു. കഴിഞ്ഞ 69 വര്‍ഷത്തെ പാകിസ്താന്‍ ചരിത്രത്തില്‍ പകുതിയിലേറെ കാലവും പട്ടാളമാണ് ഭരിച്ചിരുന്നത്. രാജ്യത്തെ വിദേശ, സൈനിക മേഖലകളിലും സൈന്യത്തിന് ശക്തമായ നിയന്ത്രണമാണുള്ളത്. ഇപ്പോഴത്തെ സാഹചര്യം പരിശോധിച്ചാല്‍ നവാസ് ഷരീഫിനേക്കാള്‍ സ്വീകാര്യതയാണ് കരസേന മേധാവിയായ റഹീല്‍ ഷരീഫിനുള്ളത്. പുതിയ സാഹചര്യത്തില്‍ ഷരീഫ് ഭരണം പിടിച്ചെടുത്തു കൂടായ്കയില്ല. ഇന്ത്യ വിരുദ്ധവികാരമാണ് പാകിസ്താന്‍ എന്ന രാജ്യത്തെയും പാക് സൈന്യത്തെയും നിലനിര്‍ത്തിയിരുന്നത്. സര്‍ക്കാര്‍ എന്തു പറയുന്നോ എന്നതല്ല ,തങ്ങളെ മുറിവേല്‍പിക്കുന്നവരെ മറ്റാരുടെയും അനുവാദം കൂടാതെ തിരിച്ചടിക്കുന്ന ശൈലിയാണ് പാക് പട്ടാളത്തിന്റേത്.
ചരിത്രം പരിശോധിച്ചാല്‍ മൂന്ന് പട്ടാള അട്ടിമറികളാണ് പ്രധാനമായും പാകിസ്താനില്‍ നടന്നിരിക്കുന്നത്. 1958, 1977, 1999 വര്‍ഷങ്ങളില്‍ നടന്ന അട്ടിമറികള്‍ പരിശോധിച്ചാല്‍ ജനാധിപത്യ ഭരണകൂടത്തിന് യാതൊരു വിലയും പാകിസ്താനിലില്ലെന്നാണ് മനസ്സിലാക്കാന്‍ സാധിക്കുക . 1958ല്‍ ഇസ്‌കന്ദര്‍ മിര്‍സയുടെ സ്ഥാനം തെറിപ്പിച്ച് കൊണ്ട് അയ്യൂബ് ഖാന്‍ പാകിസ്താന്‍ പ്രസിഡന്റാണെന്ന് സ്വയം പ്രഖ്യാപിച്ചു. പാകിസ്താന്‍ ചരിത്രത്തിലെ ആദ്യ പട്ടാള അട്ടിമറി. 1977 ല്‍ സുല്‍ഫിക്കര്‍ അലി ഭൂട്ടോയെ തുറങ്കിലടച്ച് കൊണ്ട് സൈനിക മേധാവി സിയാ ഉള്‍ ഹഖ് ഭരണം പിടിച്ചെടുത്തു. 1999 ല്‍ നവാസ് ഷരീഫിനെ അട്ടിമറിച്ച് പര്‍വേസ് മുഷ്‌റഫ് ആയിരുന്നു അവസാനമായി അട്ടിമറി നടത്തിയത്.
ഇന്ത്യയും പാകിസ്താനും യുദ്ധ സമാനമായ മറ്റൊരു സാഹചര്യത്തിലെത്തി നില്‍ക്കെ പാക് സൈന്യത്തിന്റെ നീക്കം എന്തായിരിക്കുമെന്ന് കണ്ടറിയേണ്ടിയിരിക്കുന്നു. നവാസ് ഷരീഫ് സമാധാനശ്രമങ്ങള്‍ക്കാണ് മുന്നിട്ടിറങ്ങുന്നതെങ്കില്‍ കൂടി സൈന്യം വെറുതെയിരുന്നേക്കില്ല. ഭരണകൂടത്തിന്റെ വാക്കുകള്‍ വീണ്ടും നിരാകരിച്ച് കൊണ്ട് ശക്തമായി തിരിച്ചടിച്ചേക്കും. തങ്ങള്‍ക്ക് യാതൊന്നും പറ്റിയിട്ടില്ലെന്ന വാദമാണ് പാക് സൈന്യം മുന്നോട്ട് വെക്കുന്നത്. ഇന്ത്യന്‍ സൈന്യം അതിര്‍ത്തി കടന്നൊരു ആക്രമണം നടത്തിയിട്ടില്ല. ഇങ്ങനൊരു നീക്കം ഇന്ത്യയുടെ ഭാഗത്ത് നിന്ന് ഉണ്ടായാല്‍ മറ്റൊരു പട്ടാള അട്ടിമറിക്കു കൂടി പാകിസ്താന്‍ സാക്ഷ്യം വഹിക്കേണ്ടി വരും.