ആനക്കൊമ്പിനു വേണ്ടി ആനകളെ ക്രൂരമായി കൊല്ലുന്നതിനെതിരെ ജനവികാരം ഉണ്ടാക്കാനുള്ള നടപടിയുമായി വില്യം രാജകുമാരന്‍ രംഗത്ത്‌. ബ്രിട്ടീഷ് രാജകുടുംബത്തിന്റെ ശേഖരത്തിലുള്ള കോടിക്കണക്കിനു പൗണ്ട് വിലമതിക്കുന്ന ആനക്കൊമ്പ് കൊണ്ടുള്ള കരകൗശല വസ്തുക്കള്‍ നശിപ്പിച്ച് കളയണമെന്നുളളതാണ്‌വില്യം രാജകുമാരന്റെ അഭിപ്രായം. തിരുവിതാംകൂര്‍ രാജകുടുംബം സമ്മാനിച്ച സിംഹാസനവും ഇതില്‍ പെടും. 1851-ല്‍ തിരുവിതാംകൂര്‍ രാജാവായിരുന്ന ഉത്രാടം തിരുന്നാള്‍ മാര്‍ത്താണ്ഡവര്‍മ വിക്‌ടോറിയാ മഹാറാണിക്ക് സമ്മാനിച്ചതാണ് ആനക്കൊമ്പില്‍ തീര്‍ത്ത സിംഹാസനം. വളരെ പ്രാധാന്യത്തോടെ ശേഖരത്തില്‍ സൂക്ഷിച്ചിരിക്കുന്ന രത്‌നങ്ങളും പതിച്ചിട്ടുള്ള സിംഹാസനവും ഒപ്പമുള്ള കാല്പ്പടിയും കേരളീയ ശില്‍പകലയുടെ ഉത്തമ ഉദാഹരണമാണ്. ഇതടക്കം 1200 കരകൗശലവസ്തുക്കള്‍ നശിപ്പിക്കണമെന്നാണ് വില്യമിന്റെ അഭിപ്രായം. ഈ വസ്തുക്കളുടെ കലാമൂല്യവും ചരിത്രപ്രാധാന്യവുമറിയാതെയാണ് വില്യം രാജകുമാരന്‍ ഈ അഭിപ്രായം പറഞ്ഞതെന്ന് ചരിത്രവിദഗ്ധര്‍ ചൂണ്ടിക്കാട്ടുന്നു. ഇവയൊക്കയും ബ്രിട്ടന്റെ സ്വത്താണ്. ബ്രിട്ടീഷ് ഭരണാധികാരികള്‍ക്ക് സമ്മാനം കിട്ടിയതാണെങ്കിലും അതൊന്നും രാജകുടുംബത്തിന്റെ സ്വന്തമല്ലെന്ന് ചരിത്രകാരന്മാര്‍ ഓര്‍മിപ്പിക്കുന്നു. അവ നശിപ്പിക്കാന്‍ ഉത്തരവിടാന്‍ രാജകുമാരന് അധികാരമില്ല. മാത്രമല്ല, ഇവ നശിപ്പിച്ചാല്‍ ആനക്കൊമ്പ് ഉല്പന്നങ്ങളുടെ ലഭ്യത കുറയുകയും അതിനനുസരിച്ച് ആനവേട്ട വര്‍ധിക്കുകയുമേ ഉള്ളൂ എന്ന് വന്യജീവി വിദഗ്ധരും പറയുന്നു.

ഈ വസ്തുക്കള്‍ നശിപ്പിച്ചാല്‍ അവ സമ്മാനമായി നല്‍കിയ രാജ്യങ്ങള്‍ക്കും രാജവംശങ്ങള്‍ക്കും ബ്രിട്ടീഷ് രാജകുടുംബത്തോട് എതിര്‍പ്പാകുമെന്നു ചൂണ്ടിക്കാട്ടുന്നവരുമുണ്ട്. ചില ആഫ്രിക്കന്‍ രാജ്യങ്ങളിലും അമേരിക്കയിലും മറ്റും പിടിച്ചെടുത്ത ആനക്കൊമ്പ് നശിപ്പിക്കുന്ന സമ്പ്രദായമുണ്ട്. എന്നാല്‍, ഈ വസ്തുക്കളെ അങ്ങനെ കാണേണ്ടതില്ലെന്നാണ് രാജകുടുംബവുമായി ബന്ധപ്പെട്ട ഉദ്യോഗസ്ഥര്‍  പറയുന്നത്.