ചൈനയുടെ ശക്തമായ എതിര്‍പ്പ് വകവെയ്ക്കാതെ ടിബറ്റന്‍  ആത്മീയാചാര്യന്‍ ദലൈലാമയുമായി അമേരിക്കന്‍  പ്രസിഡന്റ് ബരാക്ക് ഒബാമ കൂടിക്കാഴ്ച നടത്തി. ചൈനയിലെ ടിബറ്റന്‍ ജനതയുടെ സംരക്ഷണത്തിന് ഒബാമ ശക്തമായ പിന്തുണ വാഗ്‌ദാനം ചെയ്തു. 
അന്താരാഷ്ട്ര തലത്തില്‍ ആദരിക്കപ്പെടുന്ന മത-സാംസ്കാരിക നേതാവെന്ന നിലയിലാണ് ദലൈലാമയുമായി പ്രസിഡന്ര് ഒബാമ ചര്‍ച്ച നടത്തിയതെന്ന് യു.എസ് ദേശീയ സുരക്ഷാ സമിതി ട്വിറ്ററിലൂടെ അറിയിക്കുകയുണ്ടായി. 
പ്രസിഡന്റ് ഔദ്യോഗിക വസതിയായ വൈറ്റ് ഹൗസിലെ മാപ് റൂമില്‍ വച്ചാണ് ഇരുവരും ചര്‍ച്ച നടത്തിയത്. സാധാരണ ഓവല്‍ ഓഫീസില്‍ വച്ചാണ് വിദേശ നേതാക്കളുമായും വിശിഷ്ഠ വ്യക്തികളുമായും ഒബാമ ചര്‍ച്ച നടത്താറുള്ളത്. മാദ്ധ്യമങ്ങള്‍ക്ക് പ്രവേശനം നിഷേധിച്ചിരുന്നു. 
ടിബറ്റ് പ്രത്യേക രാജ്യമാണെന്ന് വാദിക്കുന്ന ദലൈലാമയുമായി ഒബാമ ചര്‍ച്ച നടത്തുന്നത് തങ്ങളുമായുള്ള അമേരിക്കയുടെ ഉഭയകക്ഷി ബന്ധങ്ങളെ ബാധിക്കുമെന്ന് ചൈന മുന്നറിയിപ്പു നകിയിരുന്നു. ഇക്കാര്യത്തില്‍ ചൈനയുടെ ആശങ്ക മനസിലാക്കണമെന്നും ദലൈലാമയുടെ വിഭജനവാദത്തിന് അമേരിക്ക വേദിയാക്കരുതെന്നും ചൈനീസ് വിദേശകാര്യ വകുപ്പ് വക്താവ് ഹുവ ചുന്‍യിംഗ് ആവശ്യപ്പെടുകയുണ്ടായി.