യു.എസിലെ ഉയരം കൂടിയ അണക്കെട്ടായ ഒറോവില്‍ വെളളം നിറഞ്ഞ് കവിഞ്ഞതിനാല്‍ എപ്പോള്‍ വേണമെങ്കിലും തകരുമെന്ന അവസ്ഥയിലാണ്. തുടര്‍ച്ചയായുളള കനത്ത മഴയെതുടര്‍ന്നാണ് അണക്കെട്ടില്‍ ജലനിരപ്പ് ഉയര്‍ന്നത്. വെള്ളം നിറഞ്ഞതിനത്തെുടര്‍ന്ന് അടിയന്തര സ്പില്‍വെ തകരാന്‍ സാധ്യതയുണ്ടെന്ന് അധികൃതര്‍ വ്യക്തമാക്കി. കഴിഞ്ഞ നാലുവര്‍ഷമായി തുടരുന്ന വരള്‍ച്ചയ്‌ക്കൊടുവിലാണ് പ്രദേശത്ത് മഴ ലഭിച്ചത്. എന്നാല്‍ ഈ മഴ പ്രദേശത്തെ ജനജീവിതം ദുരിതമാക്കി. 

അണക്കെട്ടില്‍ ജലനിരപ്പ് ഉയര്‍ന്നതിനെ തുടര്‍ന്ന് സമീപത്ത് താമസിക്കുന്നവര്‍ ഒഴിഞ്ഞുപോകുന്നതിനുളള നിര്‍ദേശം അധികൃതര്‍ നല്‍കിയിരുന്നു. രണ്ട് ലക്ഷത്തോളം പേരാണ് അടിയന്തരമായി ഈ പ്രദേശത്ത് നിന്ന് ഒഴിഞ്ഞുപോകേണ്ടത്. മണിക്കൂറുകള്‍ക്കുശേഷം ജലനിരപ്പ് കുറഞ്ഞതായി അറിയിപ്പ് വന്നിട്ടുണ്ടെങ്കിലും ഒഴിഞ്ഞുപോകാനുള്ള ഉത്തരവ് നിലനില്‍ക്കുകയാണ്. 

അണക്കെട്ടിന് 50 വര്‍ഷത്തെ പഴക്കമുണ്ട്. എന്നാല്‍ ഇത്തരത്തില്‍ അടിയന്തരസാഹചര്യം മുമ്പ് ഉണ്ടായിട്ടില്ല. വിദഗ്ധ എന്‍ജിനീയര്‍മാരുടെ നേതൃത്വത്തില്‍ നിരീക്ഷണം തുടരുകയാണെന്ന് അധികൃതര്‍ അറിയിച്ചു. ജലവൈദ്യുതി പദ്ധതികള്‍ക്കും കുടിവെള്ള വിതരണത്തിനുമാണ് അണക്കെട്ട് ഉപയോഗിക്കുന്നത്.