ഇന്ത്യയിലെ ഏക സജീവ അഗ്‌നി പര്‍വ്വതമായ ബാരന്‍ ദ്വീപിലെ അഗ്‌നിപര്‍വ്വതത്തില്‍ നിന്നും പുകയും ലാവയും വമിക്കുന്നതായി വിദഗ്ധരുടെ കണ്ടെത്തല്‍. 1991-ലാണ് ഈ അഗ്നി പര്‍വതം അവസാനമായി പുകഞ്ഞത്. വീണ്ടും 2017 ജനുവരി 23നാണ് അഗ്നിപര്‍പ്പതം പുകയുന്നതായി ശ്രദ്ധയില്‍പ്പെട്ടത്. പോര്‍ട്ട് ബ്ലയറില്‍ നിന്നും 140 കിലോമീറ്റര്‍ വടക്കു കിഴക്കായുള്ള ബാരന്‍ ദ്വീപിലാണ് അഗ്‌നിപര്‍വ്വതം സ്ഥിതി ചെയ്യുന്നത്. 

സമുദ്ര ഗവേഷണ ശാസ്ത്രജ്‌രുടെ സംഘം ആന്‍ഡമാനിലെ ബാരന്‍ അഗ്‌നി പര്‍വ്വതത്തിനു സമീപം കടലിലെ അടിത്തട്ട് സാംപിള്‍ ശേഖരിക്കുന്നതിനിടെയാണ് പര്‍വ്വതത്തില്‍ നിന്ന് പുക വമിക്കാന്‍ തുടങ്ങിയത് ശ്രദ്ധയില്‍ പെട്ടത്. പര്‍വ്വതം നിരീക്ഷിച്ചപ്പോള്‍ അഞ്ചു മുതല്‍ പത്തു മിനുട്ട് വരെ പുക തുപ്പിയെന്നാണ് ഗവേഷണസംഘത്തിന്റെ കണ്ടെത്തല്‍. പകല്‍ സമയത്ത് മാത്രമാണ് പര്‍വതത്തില്‍ നിന്നും പുക ഉയരുന്നത് രാത്രി സമയങ്ങളില്‍ നിരീക്ഷിച്ചപ്പോള്‍ പര്‍വ്വതമുഖത്ത് നിന്ന് ചുവന്ന നിറത്തിലുളള ലാവ അന്തരീകഷത്തിലേക്ക് തെറിച്ച് പര്‍വ്വതത്തിന്റെ ചെരിവുകളിലുടെ ഒഴുകുന്നതായി കണ്ടുവെന്ന് അവര്‍ വാര്‍ത്താകുറുപ്പില്‍ പറഞ്ഞു.

അഗ്‌നിപര്‍വ്വതത്തിനു സമീപമുള്ള മണ്ണും വെള്ളവും ശേഖരിച്ച് പരിശോധിച്ചപ്പോഴും അഗ്‌നിപര്‍വ്വതം ഉണര്‍ന്നുവെന്ന സൂചനയാണ് ലഭിക്കുന്നതെന്ന് ശാസ്ത്രജ്ഞര്‍ പറയുന്നു. അഗ്‌നിപര്‍വ്വതം പൊട്ടുമ്പോഴുണ്ടാകുന്ന പാറക്കഷണങ്ങളായ കരിപോലെ കറുത്ത അവശിഷ്ടങ്ങള്‍ ഇവിടെ നിന്ന് ലഭിച്ചുവെന്നും വരാനിരിക്കുന്ന അഗ്‌നിപര്‍വ്വത സ്‌ഫോടനത്തെ സൂചിപ്പിക്കുന്നതാണിതെന്നും ഗവേഷക സംഘം പറഞ്ഞു