കിം ജോങ് നാം കൊല്ലപ്പെട്ട സംഭവത്തില് ഉത്തര കൊറിയക്കാരന് അറസ്റ്റില്
ഉത്തരകൊറിയന് ഭരണാധികാരി കിം ജോങ് ഉന്നിന്റെ അര്ധസഹോദരന് കിം ജോങ് നാം മലേഷ്യയില് കൊല്ലപ്പെട്ട സംഭവത്തില് ഉത്തര കൊറിയക്കാരനെ അറസ്റ്റ് ചെയ്തു. രണ്ടു വനിതകളുള്പ്പെടെ മൂന്നുപേര് നേരത്തേ പിടിയിലായിരുന്നെങ്കിലും ഉത്തര കൊറിയയില് നിന്നുള്ള ഒരാള് കേസില് അറസ്റ്റിലാകുന്നത് ആദ്യം. മൃതദേഹം കൈമാറുന്നതുമായി ബന്ധപ്പെട്ട് ഉത്തര കൊറിയയും മലേഷ്യയും തമ്മില് തര്ക്കം നിലനില്ക്കേയാണു റി ജോങ് ചോളി(46)ന്റെ അറസ്റ്റ്. ഉത്തര കൊറിയന് നേതാവ് കിം ജോങ് ഉന് പറഞ്ഞുവിട്ട വാടകക്കൊലയാളികളെന്നു സംശയിക്കുന്ന രണ്ടു സ്ത്രീകള് ക്വാലലംപൂര് വിമാനത്താവളത്തില് കഴിഞ്ഞ തിങ്കളാഴ്ചയാണു കിം ജോങ് നാമി(46)ന്റെ മുഖത്തു വിഷദ്രാവകം സ്പ്രേ ചെയ്തു കൊല നടത്തിയത്.
അടുത്ത ബന്ധുക്കളുടെ ഡിഎന്എ മാതൃക ഹാജരാക്കിയാല് മാത്രമേ കിം ജോങ് നാമിന്റെ മൃതദേഹം ഉത്തര കൊറിയയ്ക്കു കൈമാറുകയുള്ളൂ എന്ന നിലപാടില് ഉറച്ചുനില്ക്കുകയാണു മലേഷ്യ. ബുധനാഴ്ച മൃതദേഹ പരിശോധന കഴിഞ്ഞെങ്കിലും മരണകാരണത്തെക്കുറിച്ചു വ്യക്തത ലഭിക്കാതിരുന്നതിനാല് വെള്ളിയാഴ്ച രാത്രി വീണ്ടും പരിശോധന നടത്തിയത് ഉത്തര കൊറിയയെ ചൊടിപ്പിച്ചിട്ടുണ്ട്.
തങ്ങളുടെ അനുവാദമോ സാന്നിധ്യമോ ഇല്ലാതെ നടത്തിയ മൃതദേഹ പരിശോധനയുടെ റിപ്പോര്ട്ട് അംഗീകരിക്കില്ലെന്നു മലേഷ്യയിലെ ഉത്തര കൊറിയന് അംബാസഡര് കാങ് ചോള് വ്യക്തമാക്കിക്കഴിഞ്ഞു.
https://www.facebook.com/Malayalivartha
