മതിയായ രേഖകളില്ലാത്ത, യുഎസിലെ 1.1 കോടി കുടിയേറ്റക്കാരെ പുറത്താക്കാനുള്ള ട്രംപ് ഭരണകൂടത്തിന്റെ തീരുമാനം മൂന്നു ലക്ഷത്തോളം ഇന്ത്യന്‍ വംശജരെ പ്രതികൂലമായി ബാധിക്കും. രേഖകളില്ലാത്ത കുടിയേറ്റക്കാരെ കൂട്ടത്തോടെ പുറത്താക്കാന്‍ വ്യവസ്ഥ ചെയ്യുന്ന പുതിയ മാര്‍ഗനിര്‍ദേശങ്ങള്‍ക്ക് ആഭ്യന്തര സുരക്ഷാ വകുപ്പ് രൂപം നല്‍കിക്കഴിഞ്ഞു. കുടിയേറ്റവുമായി ബന്ധപ്പെട്ട ഫെഡറല്‍ നിയമങ്ങളുടെ പരിധി വിപുലമാക്കുന്നതാണു പുതിയ വ്യവസ്ഥകള്‍. കുടിയേറ്റനിയമം ലംഘിച്ചതായി സംശയം തോന്നിയാല്‍ ആരെയും അറസ്റ്റ് ചെയ്യാന്‍ ആഭ്യന്തര സുരക്ഷാവകുപ്പ് ഉദ്യോഗസ്ഥര്‍ക്ക് അധികാരമുണ്ടാകും.

അറസ്റ്റ് നടന്നാലുടന്‍ സ്വരാജ്യത്തേക്കു മടക്കി അയയ്ക്കണം. കുടുംബാംഗങ്ങള്‍ക്കു താമസരേഖകളോ പൗരത്വമോ ഉണ്ടെങ്കിലും സ്വന്തമായി രേഖകളില്ലാതെ വര്‍ഷങ്ങളായി യുഎസില്‍ കഴിയുന്നവരും ഇതോടെ പ്രതിസന്ധിയിലാകും. അനൗദ്യോഗിക കണക്കനുസരിച്ചു മതിയായ രേഖകളില്ലാത്ത മൂന്നു ലക്ഷത്തോളം ഇന്ത്യന്‍ വംശജരാണു യുഎസിലുള്ളത്. പുറത്താക്കിയാല്‍ രണ്ടുവര്‍ഷത്തേക്ക് അമേരിക്കയിലേക്ക് ഇവര്‍ക്കു തിരികെ വരാനുമാകില്ല. ഉറ്റവര്‍ ഒപ്പമില്ലാത്ത പ്രായപൂര്‍ത്തിയാകാത്ത വ്യക്തിയാണെങ്കില്‍ അഭയത്തിന് അപേക്ഷിക്കാം. സ്വരാജ്യത്തു പീഡനത്തിന് ഇരയാകാനുള്ള സാധ്യതയുണ്ടെന്നു ബോധ്യപ്പെട്ടാലും പുറത്താക്കല്‍ നടപടിയില്‍ നിന്ന് ഒഴിവായേക്കും.

കുടിയേറ്റക്കാരായ കുറ്റവാളികളെ ഉടന്‍ പിടികൂടി പുറത്താക്കണമെന്ന ഉത്തരവ് ഇതിനകം ഉദ്യോഗസ്ഥര്‍ക്കു നല്‍കിയിട്ടുണ്ട്. കുറ്റകൃത്യത്തിനു സാധ്യത കണ്ടാല്‍പോലും അറസ്റ്റിനാണു നിര്‍ദേശം. ഇതോടെ രേഖകളില്ലാത്ത എല്ലാവരും ഇതില്‍ കുടുങ്ങാന്‍ സാധ്യതയേറി. കുടിയേറ്റക്കാരെ തിരഞ്ഞുപിടിക്കാന്‍ 10,000 പുതിയ ഉദ്യോഗസ്ഥരെയാണ് ആഭ്യന്തരവകുപ്പ് നിയമിക്കാന്‍ പോകുന്നത്. എന്നാല്‍, കൂട്ടത്തോടെ പുറത്താക്കല്‍ ഉണ്ടാകില്ലെന്നാണ് ആഭ്യന്തര വകുപ്പിന്റെ നിലപാട്.