ഉത്തരകൊറിയന്‍ ഏകാധിപതി കിം ജോംഗ് ഉന്നിന്റെ അര്‍ധസഹോദരന്‍ ജോംഗ് നാമിനെ വധിച്ചത് മാരകമായ രാസവസ്തു ഉപയോഗിച്ചാണെന്ന് കണ്ടെത്തി. രാസപരിശോധനാ റിപ്പോര്‍ട്ടിലാണ് ഇക്കാര്യം വ്യക്തമാക്കിയിരിക്കുന്നത്. യുഎസ് രാസായുധമായി ഉപയോഗിക്കുന്ന വസ്തുവാണ് ഇതെന്നും മലേഷ്യന്‍ അധികൃതര്‍ പറയുന്നു. ഇതോടെ സംഭവത്തില്‍ ദുരൂഹത ഏറിയിരിക്കുകയാണ്.
നാമിന്റെ മുഖവും കണ്ണും തുടച്ച തുണിയില്‍നിന്നുമാണ് രാസവസ്തു കണ്ടെത്തിയതെന്ന് മലേഷ്യന്‍ പോലീസ് മേധാവി ഖാലിദ് അബുബേക്കര്‍ പറഞ്ഞു. നിരോധിത രാസവസ്തു എങ്ങനെ മലേഷ്യയില്‍ എത്തിച്ചതെന്നു സംബന്ധിച്ചും അന്വേഷണം ആരംഭിച്ചതായും അദ്ദേഹം പറഞ്ഞു.

കഴിഞ്ഞ തിങ്കളാഴ്ച മക്കാവുവിലേക്കു പോകാനായി ക്വാലാലംപൂര്‍ വിമാനത്താവളത്തിലെത്തിയ നാമിനെ രണ്ട് ചാരവനിതകള്‍ ചേര്‍ന്ന് വിഷം സ്‌പ്രേ ചെയ്ത് കൊലപ്പെടുത്തുകയായിരുന്നു. നാമിനെ ആക്രമിച്ച വനിതകള്‍ കൈയില്‍ വിഷദ്രാവകം പുരട്ടിയിരുന്നുവെന്നും ഇതിനായി അവര്‍ പ്രത്യേക പരിശീലനം നേടിയിരുന്നുവെന്നും ഖാലിദ് അബുബേക്കര്‍ പറഞ്ഞു. വിയറ്റ്‌നാം പാസ്‌പോര്‍ട്ടുള്ള ഡോവന്‍ തി ഹോംഗ്, ഇന്തോനേഷ്യക്കാരി സിതി അസിഹാ എന്നിവരെയും മറ്റ് രണ്ടു പേരെയും ഇതിനകം അറസ്റ്റു ചെയ്തിട്ടുണ്ട്.
കിം കൊല്ലപ്പെട്ട അന്നുതന്നെ നാല് ഉത്തരകൊറിയക്കാര്‍ മലേഷ്യ വിട്ടെന്നും പോലീസ് പറഞ്ഞു. ഇവര്‍ പ്യോംഗ്യാംഗിലേക്കു പോയെന്നാണു കരുതുന്നത്.