കറാച്ചിയില്‍ നിന്ന് സൗദി അറേബ്യയിലേക്ക് പറന്ന വിമാനത്തില്‍ ഏഴുപേര്‍ നിന്ന് യാത്ര ചെയ്തത് നിന്നു കൊണ്ട്. മൂന്ന് മണിക്കൂര്‍ യാത്രയില്‍ ഈ ഏഴ് പേരും യാതൊരു സുരക്ഷാ മുന്‍കരുതലുകളില്ലാതെ എഴുന്നേറ്റ് നിന്നു കൊണ്ടാണ് യാത്ര ചെയ്തതെന്നാണ് റിപ്പോര്‍ട്ട്. ഗുരുതര സുരക്ഷാ വീഴ്ചയില്‍ പാക്കിസ്ഥാന്‍ എയര്‍ലൈന്‍സ് അന്വേഷണം ആരംഭിച്ചു. ആകാശ യാത്രയിലെ ഏറ്റവും വലിയ സുരക്ഷാ വീഴ്ച്ചയാണിത്.

കറാച്ചിയില്‍ നിന്ന് മദീനയിലേക്ക് യാത്ര തിരിച്ച പാകിസ്ഥാന്‍ ഇന്റര്‍നാഷണല്‍ എയര്‍ലൈന്‍ വിമാനത്തില്‍ ജനുവരി 20നാണ് ഈ അപൂര്‍വ്വവും ഗുരുതരവുമായ സുരക്ഷാ വീഴ്ച്ചയുണ്ടായിരിക്കുന്നതെന്ന് പ്രമുഖ പത്രം റിപ്പോര്‍ട്ട് ചെയ്യുന്നു.

വെറും 409 യാത്രക്കാരെ മാത്രം ഉള്‍ക്കൊള്ളിനാവുന്ന വിമാനത്തില്‍ അന്നേ ദിവസം 416 പേരാണ് യാത്ര ചെയ്തത്. അധികമായി വിമാനത്തില്‍ പ്രവേശിച്ച ഏഴ് യാത്രക്കാര്‍ക്കും കയ്യെഴുത്തിലുള്ള ബോര്‍ഡിങ് പാസുകളാണ് നല്‍കിയത്.
ഓക്‌സിജന്‍ മാസ്‌കുകളോ, മറ്റ് സുരക്ഷാ സംവിധാനങ്ങളോ അടിയന്തിര സാഹചര്യങ്ങളില്‍ ഇവര്‍ക്ക് ലഭിക്കില്ലെന്നത് കൊണ്ട് തന്നെ ഇത് എയര്‍ലൈന്റെ ഭാഗത്ത് നിന്നുള്ളത് വലിയ വീഴ്ച്ചയായാണ് കാണുന്നത്. വിമാനത്തിന്റെ ടേക് ഓഫിന് ശേഷമാണ് സംഭവം ശ്രദ്ധയില്‍ പെട്ടതെന്നാണ് പൈലറ്റിന്റെ വിശദീകരണം.