പ്രമേഹം ബാധിച്ച മകനെ ചികിത്സ നല്‍കാതെയും പട്ടിണിക്കിട്ടും കൊന്ന മാതാപിതാക്കള്‍ക്ക് 25 വര്‍ഷം കഠിന തടവ്. കാനഡയില്‍ നടന്ന സംഭവത്തില്‍ 15 കാരനായ അലക്‌സാണ്ട്രുവിന്റെ മരണവുമായി ബന്ധപ്പെട്ട് എമില്‍, റോഡിക്കാ റാഡിത എന്ന മാതാപിതാക്കള്‍ക്കാണ് ശിക്ഷ ലഭിച്ചത്. കൊലപാതകക്കുറ്റത്തിന് കാനഡ കോടതിയാണ് ഇരുവരെയും ശിക്ഷിച്ചത്.

റാഡിതയുടെ എട്ടു മക്കളില്‍ ഒരാളാണ് അലക്‌സാണ്ട്രു. മരിക്കുന്‌പോള്‍ പയ്യന്റെ ഭാരം വെറും 37 പൗണ്ടായിരുന്നു. കലാഗ്രയിലെ വീട്ടില്‍ കിടന്ന് 2013 ലായിരുന്നു പയ്യന്‍ മരിച്ചത്. ഇന്‍സുലിന്‍ ചികിത്സ പോലും നിഷേധിക്കുന്ന രീതിയില്‍ പയ്യനെ വീട്ടില്‍ ഒറ്റയ്ക്കിടുകയും ആരുടെയും സഹായം നല്‍കാതിരിക്കുകയും ചെയ്തു. മരണത്തിലേക്ക് നയിക്കപ്പെട്ട ശാരീരികാവസ്ഥ പെട്ടെന്നുള്ളതായിരുന്നില്ലെന്നും മാസങ്ങള്‍ നീണ്ടതാണെന്നും കോടതി കണ്ടെത്തി.

തെളിവുകള്‍ സൂചിപ്പിക്കുന്നത് മാതാപിതാക്കള്‍ക്ക് മകന്റെ അസുഖത്തെക്കുറിച്ച് കൃത്യമായ ബോധ്യം ഉണ്ടായിരുന്നെന്നും എന്നാല്‍ ജീവന്‍ നിലനിര്‍ത്തുന്നതിന് ആവശ്യമായ ഇന്‍സുലിനോ ആതുരശ്രദ്ധയോ നല്‍കുന്നതില്‍ നിന്നും അവര്‍ അകന്നു നിന്നെന്നും ജഡ്ജി പറഞ്ഞു. 2003 ല്‍ പ്രമേഹം കടുത്ത് ആശുപത്രിയില്‍ പ്രവേശിപ്പിക്കപ്പെട്ട സാഹചര്യത്തില്‍ മകന്‍ മരണാസന്നനായിട്ടും മാതാപിതാക്കള്‍ ചികിത്സ നല്‍കാന്‍ കൂട്ടാക്കിയിരുന്നില്ലെന്ന് സാക്ഷികളും പറഞ്ഞു. ഇവിടെ ഒരു വര്‍ഷത്തോളം കിടന്ന് മെച്ചപ്പെട്ടതിന് ശേഷമായിരുന്നു ഇയാള്‍ വീട്ടില്‍ തിരിച്ചെത്തിയത്. മരണപ്പെട്ട അലക്‌സാണ്ട്രുവിന്റെ ശരീരം മമ്മിക്ക് സമാനമായിട്ട് ആയിരുന്നെന്ന് പാരാമെഡിക്കല്‍ സംഘവും വ്യക്തമാക്കി. മാതാപിതാക്കള്‍ക്ക് രണ്ടു പേര്‍ക്കും കൂടി പരോള്‍ പോലുമില്ലാതെ 25 വര്‍ഷത്തെ തടവാണ് ശിക്ഷ ലഭിച്ചത്.