മലേഷ്യന്‍ എയര്‍ലൈന്‍സിന്റെ വിമാനം എംഎച്ച്‌ 370 അപ്രത്യക്ഷമായതിനു പിന്നില്‍ പൈലറ്റോ മറ്റരെങ്കിലുമോ റാഞ്ചിയതാകാമെന്ന്‌ മലേഷ്യന്‍ പ്രധാനമന്ത്രി നാജിബ്‌ റസാക്ക്. അവസാനം റഡാറില്‍ പ്രത്യക്ഷപ്പെട്ടപ്പോള്‍ തന്നെ വിമാനത്തിന്റെ ഗതിയില്‍ വ്യത്യാസമുണ്ടായിരുന്നെന്നും നാജിബ്‌ റസാക്ക്‌ പറഞ്ഞു. എന്നാല്‍ ഇക്കാര്യം സ്‌ഥിരീകരിക്കാന്‍ എല്ലാ വശങ്ങളും പരിശോധിക്കേണ്ടതുണ്ടെന്നും പ്രധാനമന്ത്രി കൂട്ടിച്ചേര്‍ത്തു.

വിമാനത്തിനായുള്ള കടലിലെ തിരച്ചില്‍ അവസാനിപ്പിക്കുകയാണെന്നും അദ്ദേഹം വാര്‍ത്താസമ്മേളനത്തില്‍ അറിയിച്ചു. വിമാനത്തിലെ ആശയവിനിമയ സംവിധാനങ്ങള്‍ മന:പൂര്‍വ്വം തകരാറിലാക്കുകയായിരുന്നെന്ന്‌ കണ്ടെത്താനായിട്ടുണ്ട്‌. വിമാനം അപ്രത്യക്ഷമായി നാലു മണിക്കൂറിന്‌ ശേഷവും ഒരു ബ്രിട്ടീഷ്‌ ഉപഗ്രഹത്തിന്‌ ഇതില്‍ നിന്നുള്ള സിഗ്നലുകള്‍ ലഭിച്ചതായും വിവരമുണ്ട്‌. കസാഖിസ്‌ഥാന്റെ പരിസരത്തു നിന്നുമാണ്‌ ഇത്‌ ലഭിച്ചതെന്നാണറിയുന്നത്‌.

എന്നാല്‍ റാഞ്ചികളുടെ ലക്ഷ്യമെന്താണെന്ന കാര്യത്തില്‍ ഇതുവരെ തുമ്പൊന്നുമില്ല. ഇക്കാര്യത്തില്‍ ആരും ബന്ധപ്പെട്ടിട്ടില്ലെന്നതിനാല്‍ ഇക്കാര്യം ദുരൂഹമായി തുടരുകയാണ്‌. വിമാനം റഡാറില്‍ നിന്ന്‌ കാണാതായ ശേഷവും മണിക്കൂറുകളോളം സഞ്ചരിച്ചിട്ടുണ്ടെന്നതിനും തെളിവുകള്‍ ലഭിച്ചിട്ടുണ്ട്‌. വിമാനം കാണാതായ മേഖലയില്‍ നിന്ന്‌ അഞ്ചു മണിക്കൂറോളം സഞ്ചരിക്കാനുള്ള ഇന്ധനം വിമാനത്തില്‍ ഉണ്ടായിരുന്നു. ദക്ഷിണേഷ്യയിലോ ദക്ഷിണ-പൂര്‍വ്വ ഏഷ്യയിലോ എവിടെയും വിമാനം എത്തിക്കാനാകുമെന്നത്‌ സംഭവത്തിലെ ദുരൂഹത വര്‍ധിപ്പിക്കുന്നു. വിമാനം പറത്തുന്നതില്‍ പരിചയമുള്ള ഒന്നോ അതിലധികമോ പേര്‍ ചേര്‍ന്ന്‌ വിമാനത്തിന്റെ ഗതി തിരിച്ചു വിട്ടതാകുമെന്നാണ്‌ അന്വേഷണ സംഘം കരുതുന്നത്‌. ഇതിനായി വിമാനത്തിലെ ട്രാന്‍സ്‌പോണ്ടറുകള്‍ ഉള്‍പ്പെടെയുള്ള ആശയവിനിമയ ഉപാധികള്‍ ആദ്യം തന്നെ വിചേ്‌ഛദിക്കുകയാണ്‌ ഇവര്‍ ചെയ്‌തതെന്നും കരുതുന്നു.

12 രാജ്യങ്ങളില്‍ നിന്നായി നിരവധി കപ്പലുകളും വിമാനങ്ങളും കടലില്‍ വ്യാപകമായി തിരച്ചില്‍ നടത്താന്‍ തുടങ്ങിയിട്ട്‌ ഒരാഴ്‌ച കഴിഞ്ഞിട്ടും വിമാനത്തെ കുറിച്ച്‌ വിവരമൊന്നും ലഭിച്ചിട്ടില്ല. മാര്‍ച്ച്‌ എട്ടിന്‌ അര്‍ധരാത്രിയോടെ മലേഷ്യന്‍ തലസ്‌ഥാനമായ ക്വലാലംപൂരില്‍ നിന്ന്‌ ബെയ്‌ജിങിലേക്കുള്ള യാത്രാമധ്യേ ബോയിംഗ്‌ 777 വിമാനം റഡാറില്‍ നിന്ന്‌ പെട്ടെന്ന്‌ അപ്രത്യക്ഷമാകുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha