കൊറിയന്‍ രാഷ്ട്രീയകാര്യങ്ങളില്‍ വിദഗ്ധനായ പ്രൊഫസര്‍ റോബര്‍ട്ട് കെല്ലി ദക്ഷിണ കൊറിയയുടെ പ്രസിഡന്റ് പാര്‍ക്ക് ഗെന്‍ ഹൈയെ ഇഎംപീച് ചെയ്തതിനെ കുറിച്ച് ബി ബി സിയുമായി സ്‌കൈപ്പ് വഴി ലൈവ് ചര്‍ച്ച നടത്തുകയായിരുന്നു.അപ്പോഴാണ് അദ്ദേഹത്തിന്റെ കുഞ്ഞുമക്കള്‍ രണ്ടു പേരും അപ്രതീക്ഷിതമായി ആ മുറിയിലേയ്ക്കു കടന്നു വന്നത്.

പ്രസ്തുത സംഭവത്തിന്റെ വീഡിയോ അതിന്റെ പ്രൊഡ്യൂസര്‍ ട്വിറ്ററില്‍ അപ്‌ലോഡ് ചെയ്തു.നിങ്ങളുടെ ലൈവ് ടിവി ഷോയില്‍ അപ്രതീക്ഷിതമായി നിങ്ങളുടെ കുട്ടികള്‍ കടന്നു വന്നാല്‍..മനോഹരമായ ഒരു നിമിഷം.അതിലും മനോഹരമായി ഞങ്ങളുടെ അതിഥി അത് കൈകാര്യം ചെയ്തു എന്ന അടിക്കുറിപ്പോടെയായിരുന്നു അത് ട്വിറ്ററില്‍ അപ്‌ലോഡ് ചെയ്തത്.

പ്രസ്തുത വീഡിയോ ഇന്റര്‍നെറ്റില്‍ വൈറല്‍ ആയതോടെ പ്രൊഫസര്‍ കെല്ലി നെറ്റില്‍ താരമാകുകയും ചെയ്തു. പല തരത്തിലുള്ള കമന്റുകളാണ് അതിനു ലഭിച്ചത്.ജോലിക്കാരായ മാതാപിതാക്കള്‍ തങ്ങളുടെ സഹാനുഭൂതിയാണ് കെല്ലിയോട് പ്രകടിപ്പിച്ചത്.തനിയ്ക്ക് ചുറ്റും അസ്വാഭാവിക കാര്യങ്ങള്‍ നടക്കുമ്പോഴും അക്ഷോഭ്യനായി ഇരുന്ന പ്രൊഫെസ്സറിനു പ്രശംസയും ചൊരിയുന്നുണ്ട്.

പുസന്‍ നാഷണല്‍ യൂണിവേഴ്‌സിറ്റിയിലാണ് പ്രൊഫസര്‍ കെല്ലി ജോലി ചെയ്യുന്നത്.തന്റെ ഭാര്യ ജംഗ് എ കിങിനോടും മൂന്നു വയസ്സുകാരിയായ മാറിയോണിനോടും കൊച്ചുകുഞ്ഞായ ജെയിംസിനോടും ഒപ്പം ബുസാനിലാണ് കഴിയുന്നത്.

ലൈവ് ചര്‍ച്ചയ്ക്കിടെ അദ്ദേഹത്തിന്റെ മൂത്ത മകളാണ് ആദ്യം മുറിയിലേയ്ക്കു കടന്നു വന്നത്.തന്റെ അച്ഛന്റെ അടുക്കലെത്തി അല്‍പനേരം കമ്പ്യൂട്ടര്‍ ക്യാമറയിലേയ്ക്ക് നോക്കി നിന്നു. പ്രൊഫസര്‍ കെല്ലി അപ്പോഴാണ് അവളുടെ സാന്നിധ്യം മനസ്സിലാക്കിയത്.ശാന്തത കൈവിടാതെ അവളെ നീക്കിനിര്‍ത്തുന്നു. തുടര്‍ന്ന് അവള്‍ പ്രൊഫസറുടെ അടുത്തുള്ള കസേരയില്‍ ഇരിയ്ക്കുന്നു. അപ്പോഴാണ് അവളുടെ കുഞ്ഞനിയന്‍ മുറിയിലേക്കെത്തിയത്.

അപ്പോഴാണ് പ്രൊഫസര്‍ കെല്ലിയുടെ, യോഗ ടീച്ചറായ ഭാര്യ ശബ്ദം തീരെ പുറത്ത് വരാത്ത രീതിയില്‍ മുറിയില്‍ എത്താന്‍ തെന്നി കയറി എത്തിയത്. കാമറയില്‍ ഈ രംഗങ്ങളൊന്നും പെടാതിരിയ്ക്കാന്‍ വളഞ്ഞു കുത്തി നിന്നുകൊണ്ട് കുഞ്ഞുങ്ങളെ ഒരുവിധത്തില്‍ അനുനയിപ്പിച്ച് പുറത്തേയ്ക്കു കൊണ്ടുപോയി. അതിനിടെ നിരാശനായ ഇളയ കുഞ്ഞിന്റെ കരച്ചില്‍ കേള്‍ക്കാമായിരുന്നു.

തന്റെ പിന്നില്‍ നടക്കുന്നതെല്ലാം അറിഞ്ഞുകൊണ്ടിരുന്ന പ്രൊഫസര്‍ ഉടന്‍ തന്നെ ഖേദവും പ്രകടിപ്പിച്ചു.എന്നാലും ട്വിറ്ററില്‍ എല്ലാവരും അത് ആസ്വദിച്ചു. ഇതുവരെ ഉണ്ടായിട്ടുള്ളതില്‍ വച്ച് ഏറ്റവും മനോഹരമായ ടിവി നിമിഷങ്ങളില്‍ ഒന്നാണിത് എന്നായിരുന്നു ഒരു കമ്മന്റ്.

പ്രൊഫസര്‍ തന്റെ ശാന്തത കൈവിടാതെ സൂക്ഷിച്ചതൊക്കെ ശരി.എന്നാല്‍ അദ്ദേഹത്തിന്റെ ഭാര്യയാണ് ശരിയ്ക്കും താരം എന്നായിരുന്നു മറ്റൊരു കമന്റ്.

തങ്ങളുടെ ഡാഡി തങ്ങളുടെ അമേരിക്കയിലുള്ള മുത്തച്ഛനും മുത്തശ്ശിയുമായി സ്‌കൈപ്പിലൂടെ സംസാരിയ്ക്കുകയാണെന്നു വിചാരിച്ചിട്ടാകും അവര്‍ കടന്നു വന്നതെന്നാണ് പ്രൊഫസറുടെ 'അമ്മ ക്ലീവ്ലാന്‍ഡിലുള്ള എലന്‍ കെല്ലി പറഞ്ഞത്. അവര്‍ കുടുംബമായി എലന്‍ കെല്ലിയോട് സംസാരിയ്ക്കാറു പതിവുണ്ടത്രേ.