യുഎസില്‍ അനധികൃതമായി കഴിയുന്ന 270 ഇന്ത്യക്കാരെ ഉടന്‍ നാടുകടത്തുമെന്ന് ട്രംപ് ഭരണകൂടം അറിയിച്ചു. എന്നാല്‍ അവരെ കയറ്റിവിടുന്നതിനു മുന്‍പ് കൂടുതല്‍ വിവരങ്ങള്‍ കൈമാറണമെന്ന് കേന്ദ്രസര്‍ക്കാര്‍ യുഎസിനോട് ആവശ്യപ്പെട്ടിട്ടുണ്ടെന്ന് സുഷമ പാര്‍ലമെന്റില്‍ ചോദ്യോത്തര വേളയില്‍ അറിയിച്ചു. യുഎസിലുള്ള ഇന്ത്യക്കാരുടെ എണ്ണത്തില്‍ 2009-2014 കാലയളവില്‍ അഞ്ചുലക്ഷത്തിന്റെ വര്‍ധനവാണുണ്ടായിരിക്കുന്നത്. കഴിഞ്ഞ കുറച്ചു നാളുകളിലായി ഇന്ത്യക്കാര്‍ക്കെതിരായ അക്രമങ്ങളും വര്‍ധിച്ചിട്ടുണ്ട്. 

യുഎസിന്റെ പട്ടികയിലുള്ളവരുടെ പൗരത്വം പരിശോധിച്ചതിനുശേഷം മാത്രമേ നടപടികളിലേക്കു കടക്കാവൂ എന്നു അറിയിച്ചിട്ടുണ്ട്. പട്ടികയില്‍ പറയുന്ന വിവരങ്ങളുടെ അടിസ്ഥാനത്തില്‍ ഒന്നും ചെയ്യാനാകില്ലെന്നും കൂടുതല്‍ വിവരങ്ങള്‍ നല്‍കണമെന്ന് യുഎസ് സര്‍ക്കാരിനോട് ആവശ്യപ്പെട്ടിട്ടുണ്ട്. അവരുടെ പൗരത്വം ഉറപ്പാക്കിയാല്‍ അടിയന്തര സര്‍ട്ടിഫിക്കറ്റ് നല്‍കുമെന്നും സുഷമ വ്യക്തമാക്കി. എന്നാല്‍ യുഎസില്‍നിന്നും ഇതുവരെ പ്രതികരണമെന്നും ലഭിച്ചിട്ടില്ലെന്നും മന്ത്രി പറഞ്ഞു.