അമേരിക്കയിലേക്കുള്ള യാത്രക്കാര്ക്ക് വിമാനത്തില് ഉപയോഗിക്കാന് ഖത്തര് എയര് വേയ്സ് സൗജന്യ ലാപ്ടോപ്പും വൈഫൈയും നല്കുന്നു
കഴിഞ്ഞ ആഴ്ച മുതല് ദോഹ ഉള്പ്പെടെ ഒമ്പത് നഗരങ്ങളില് നിന്ന് യു.എസിലേക്കുള്ള നോണ് സ്റ്റോപ്പ് വിമാനത്തില് ലാപ്ടോപ്പ് ഉള്പ്പെടെയുള്ള ഇലക്ട്രോണിക്സ് ഉപകരണങ്ങള്ക്ക് യു.എസ്. ആഭ്യന്തര സുരക്ഷാ വിഭാഗം വിലക്കേര്പ്പെടുത്തിയിരുന്നു. ഇതിന്റെ പശ്ചാത്തലത്തിലാണ് വ്യവസായികള് ഉള്പ്പെടെയുള്ള യാത്രക്കാര്ക്കുണ്ടാകുന്ന ബുദ്ധിമുട്ട് പരിഹരിക്കാനായി ഖത്തര് എയര്വേയ്സ് അധികൃതര് ലാപ്ടോപ്പ് വായ്പയായി നല്കുന്നത്.
ഖത്തര് എയര്വേയ്സിന്റെ അമേരിക്കയിലേക്കുള്ള എല്ലാ വിമാനങ്ങളിലെ യാത്രക്കാര്ക്കും ലാപ്ടോപ്പ് വായ്പയായി വാങ്ങാം. യാത്രയിലുടനീളം തടസ്സമില്ലാതെ സേവനം ലഭ്യമാക്കുകയാണ് ഇതിന്റെ ലക്ഷ്യം. ബിസിനസ്സ് ക്ലാസിലെ യാത്രക്കാര്ക്ക് മാത്രമാണ് ലാപ്ടോപ്പ് വായ്പയായി നല്കുന്നത്.
അടുത്ത ആഴ്ച മുതല് ഈ സൗകര്യം ലഭ്യമാകും. യാത്രയ്ക്ക് ബോര്ഡിങ്ങിന് മുമ്പായി ഗേറ്റില് നിന്ന് ലാപ്ടോപ്പ് ലഭിക്കും. എല്ലാ യാത്രക്കാര്ക്കും ഒരുമണിക്കൂര് സൗജന്യ വൈഫൈയും അഞ്ച് ഡോളര് നിരക്കില് പ്രത്യേക വൈഫൈ പാക്കേജും നല്കുന്നുണ്ട്.
മൊബൈല് ഫോണും മെഡിക്കല് ഉപകരണങ്ങളും ഒഴികെയുള്ള ഇലക്ട്രോണിക്സ് സാധനങ്ങള് ബാഗേജില് മാത്രമാണ് സൂക്ഷിക്കാന് അനുമതി. അതുകൊണ്ടുതന്നെ യാത്രക്കാരുടെ വിലയേറിയ ഇലക്ട്രോണിക്സ് ഉപകരണങ്ങള് ശേഖരിക്കാനായി എല്ലാ യാത്രക്കാര്ക്കുമായി ഖത്തര് എയര് വേയ്സ് ഗേറ്റില് പ്രത്യേക സേവനവും ആരംഭിച്ചിട്ടുണ്ട്. ഇവ ടാഗ് ചെയ്ത് സുരക്ഷിതമായി യു.എസ് വിമാനത്താവളത്തില് യാത്രക്കാരന് ലഭിക്കും. സുരക്ഷാ കാരണങ്ങളാല് ഇലക്ട്രോണിക്സ് ഉപകരണങ്ങള്ക്ക് യു.എസ്. ആഭ്യന്തര സുരക്ഷാ വകുപ്പ് ഏര്പ്പെടുത്തിയിരിക്കുന്ന വിലക്ക് എത്രനാള് തുടരുമെന്നത് അധികൃതര് വ്യക്തമാക്കിയിട്ടില്ല.
https://www.facebook.com/Malayalivartha
