അവര്‍ എല്ലാവരുടെയും കണക്കു കൂട്ടലുകള്‍ തെറ്റിച്ച് ഇന്നും ജീവിക്കുന്നു. ലോകത്തെ വെല്ലുവിളിച്ച്.
അരയ്ക്കു മുകളില്‍ രണ്ടു ശരീരമായി പിറന്നു വീണ സയാമീസ് ഇരട്ടയെകണ്ട് ഡോക്ടര്‍മാര്‍ വിധിയെഴുതി. മൂന്നു ദിവസത്തില്‍ കൂടുതല്‍ ഇവര്‍ ജീവിക്കില്ല. എന്നാല്‍ ദൈവത്തിന്റെ തീരുമാനം മറിച്ചായിരുന്നു. ഇപ്പോള്‍ ഇവര്‍ക്ക് 16 വയസ്സ്. അമേരിക്കയിലെ ന്യൂവില്‍ഫോര്‍ഡ് സ്വദേശികളായ സയാമീസ് ഇരട്ടകള്‍ക്കു പറയാന്‍ ഒരുപാടു വിശേഷങ്ങളുണ്ട്. ഒരു ശരീരമാണെങ്കിലും രണ്ടുപേരുടെയും സ്വഭാവത്തില്‍ വൈരുധ്യങ്ങള്‍ മാത്രമാണുള്ളതെന്നാണ് ലുപീറ്റ എന്നും കാരമെന്‍ എന്നും പേരുള്ള പെണ്‍കുട്ടികള്‍ പറയുന്നത്.
ശരീരത്തിലെ ഭൂരിഭാഗം അവയവങ്ങളും പരസ്പരം പങ്കുവെച്ചാണ് ഇവര്‍ ജീവിക്കുന്നത്. ഓംഫലോപാഗസ് ട്വിന്‍സ് എന്ന വിഭാഗത്തിലാണ് ഈ സയാമീസ് ഇരട്ടകള്‍ പെടുന്നത്. ഇരുവര്‍ക്കും കൂടി ഒരു ജോഡി കാലുകള്‍ മാത്രമാണുള്ളത്. വലതുകാല്‍ കാരമെന്‍ നിയന്ത്രിക്കുമ്പോള്‍ ഇടതുകാല്‍ നിയന്ത്രിക്കുന്നത് ലുപിറ്റയാണ്. ഒരു ഹൃദയവും ഒരു വയറും മാത്രമുള്ള ഇവര്‍ക്ക് ശ്വാസകോശം കൈകകള്‍ എന്നീ അവയവങ്ങള്‍ രണ്ടെണ്ണം വീതമുണ്ട്.
വ്യത്യസ്ത സ്വഭാവമുള്ളവരാണെങ്കിലും പരസ്പരം ശസ്ത്രക്രിയയിലൂടെ വേര്‍പിരിയുന്നതിനെക്കുറിച്ച് ഇവര്‍ക്ക് ചിന്തിക്കാന്‍ പോലുമാവില്ല. തന്നെയുമല്ല ശരീരത്തിന്റെ പ്രധാന അവയവങ്ങളെല്ലാം പങ്കുവയ്ക്കപ്പെടുന്നതുകൊണ്ട് ശസ്ത്രക്രിയ സങ്കീര്‍ണ്ണമായിരിക്കുമെന്നാണ് ഡോക്ടര്‍മാരുടെ അഭിപ്രായം. ഒരുപാട് ആരോഗ്യപ്രശ്‌നങ്ങള്‍ ഇരുവര്‍ക്കുമുള്ളതിനാല്‍ തല്‍ക്കാലം ശസ്ത്രക്രിയയെക്കുറിച്ച് ആലോചിക്കേണ്ട എന്നു തന്നെയാണ് ഇവരുടെ കുടുംബത്തിന്റെയും അഭിപ്രായം.