തന്നെ തോക്കിന്‍ മുനയില്‍ നിര്‍ത്തി ബലാത്സംഗത്തിന് ഇരയാക്കിയതായി പരാതി പറഞ്ഞ 19കാരിക്ക് വധശിക്ഷ വിധിച്ചു. യുവതിയ്ക്ക് ബന്ധുവായ ഒരു യുവാവുമായി അവിഹിത ബന്ധം ഉണ്ടെന്ന് ആരോപിച്ചാണ് ശിക്ഷ വിധിച്ചത്. പാകിസ്ഥാനിലെ ലാഹോറില്‍ നിന്നും 400 അകലെയുള്ള രാജന്‍പൂര്‍ എന്ന ഗ്രാമത്തിലാണ് സംഭവം ഉണ്ടായിരിക്കുന്നത്.

എന്നാല്‍ തന്നെ നാട്ടുകൂട്ടം ശിക്ഷിക്കാന്‍ പോകുന്നുവെന്ന് മനസിലാക്കിയ യുവതി ഗ്രാമത്തില്‍ നിന്നും രക്ഷപ്പെടുകയും അടുത്തുള്ള പൊലീസ് സ്‌റ്റേഷനില്‍ അഭയം തേടുകയുമായിരുന്നു. നാട്ടുകൂട്ടം ആരോപിക്കുന്നത് പോലെ തന്റെ ബന്ധുവായ ഖലീല്‍ അഹമ്മദെന്ന യുവാവുമായി തനിക്ക് അവിഹിത ബന്ധമൊന്നും ഇല്ലെന്നാണ് യുവതിയുടെ വാദം. 

താന്‍ സ്വന്തം വീട്ടില്‍ ഉറങ്ങിക്കിടക്കുമ്പോള്‍ ഖലീല്‍ തന്നെ തോക്കിന്‍ മുനയില്‍ നിര്‍ത്തി ബലാത്സംഗം ചെയ്യുകയായിരുന്നുവെന്ന് യുവതി പൊലീസില്‍ നല്‍കിയ പരാതിയില്‍ പറയുന്നു. ഇക്കാര്യം നാട്ടുകൂട്ടത്തിന്റെ ശ്രദ്ധയില്‍ പെടുത്തിയെങ്കിലും തന്റെ വാദം അംഗീകരിക്കാന്‍ അവര്‍ തയ്യാറായില്ല. താന്‍ സ്വന്തം ഇഷ്ടപ്രകാരം അഹ്മ്മദുമൊത്ത് കിടക്ക പങ്കിട്ടുവെന്നാണ് നാട്ടുകൂട്ടം വിധിച്ചതെന്നും എന്നാല്‍ അഹ്മ്മദിനെതിരെ നടപടിയെടുക്കാനും അവര്‍ തയ്യാറായില്ലെന്നും യുവതി പറയുന്നു.

അതേസമയം, വിഷയത്തില്‍ യുവതിയുടെ പരാതി ലഭിച്ചിട്ടുണ്ടെന്നും പഞ്ചായത്ത് അംഗങ്ങള്‍ക്കെതിരെ എഫ്.ഐ.ആര്‍ രജിസ്റ്റര്‍ ചെയ്ത് അന്വേഷണം ആരംഭിച്ചിട്ടുണ്ടെന്നും ഫസില്‍പൂര്‍ പൊലീസ് അറിയിച്ചു. പെണ്‍കുട്ടിയെ സര്‍ക്കാര്‍ നിയന്ത്രണത്തിലുള്ള സുരക്ഷിത സ്ഥാനത്തേക്ക് മാറ്റിയിട്ടുണ്ട്.