പൊതു ചെലവ് നിയന്ത്രിക്കുന്നതിനുള്ള നടപടികളുടെ ഭാഗമായി കുവൈത്തില്‍ വിദേശികള്‍ ജോലി ചെയ്തുകൊണ്ടിരിക്കുന്ന 730 തസ്തികകള്‍ മരവിപ്പിക്കാന്‍ നിര്‍ദേശം. പാര്‍ളമെന്റില്‍ ബജറ്റ് കമ്മിറ്റിയാണ് ധനകാര്യ മന്ത്രാലയത്തിന് നിര്‍ദേശം സമര്‍പ്പിച്ചത്. ശുപാര്‍ശ നടപ്പാക്കിയാല്‍ 730 വിദേശികള്‍ക്ക് ഉദ്യോഗം നഷ്ടമാകും എന്നാണ് റിപ്പോര്‍ട്ട്.

ബജറ്റ് കമ്മറ്റിയുടെ നിര്‍ദേശപ്രകാരം വിവിധ ഡിപ്പാര്‍ട്ട്‌മെന്റുകളില്‍ ജോലി ചെയ്യുന്ന 730വിദേശികളെ ജൂലൈ ഒന്നുമുതല്‍ ഒഴിവാക്കി ബജറ്റ് കമ്മി നികത്തി. പൊതു ചെലവ് നിയന്ത്രിക്കാനാണ് സര്‍ക്കാര്‍ മേഖലയിലെ അനാവശ്യ തസ്തികകള്‍ ഒഴിവാക്കുന്നത്.

പോയ വര്‍ഷത്തെ അപേക്ഷിച്ച് ഇക്കുറി എണ്ണ വരുമാനത്തില്‍ മൂന്ന് ശതമാനത്തിന്റെ വര്‍ധനയുണ്ടായിട്ടും പൊതു ചെലവ് നിയന്ത്രിക്കാനാകാത്തതിനാല്‍ അധിക വരുമാനം ബജറ്റില്‍ കാര്യമായി പ്രതിഫലിച്ചിട്ടില്ല. 201718 സാമ്പത്തികവര്‍ഷത്തില്‍ ശമ്പളവും മറ്റ് ആനുകൂല്യങ്ങള്‍ക്കും മാത്രമായി 6.7 ബില്യന്‍ ദിനാര്‍ ചെലവഴിക്കണം ഇതില്‍ 600 മില്യന്‍ ദിനാര്‍ പൊതുമേഖലയിലെ വിദേശികളുടെ ശമ്പളത്തിനുവേണ്ടിയാണ് വകയിരുത്തിയത്. 
ഏറ്റവും പുതിയ കണക്ക് പ്രകാരം 3,71,437 സര്‍ക്കാര്‍ ജീവനക്കാരുടെ എണ്ണം. ഇതില്‍രണ്ടര ലക്ഷത്തോളം സ്വദേശികളും ബാക്കി വിദേശികളുമാണ്. കുവൈത്ത് സെന്‍ട്രല്‍ ബാങ്ക് കഴിഞ്ഞ ദിവസം പുറത്തുവിട്ട റിപ്പോര്‍ട്ട് പ്രകാരം ലോകത്ത് ഏറ്റവും കൂടുതല്‍ പൊതുധനം ചെലവഴിക്കുന്നത് കുവൈത്താണ്. ജി.ഡി.പിയുടെ 56.4 ശതമാനമാണ് കുവൈത്ത് ഉദ്യോഗസ്ഥ ശമ്പളത്തിനും മറ്റു ആനുകൂല്യങ്ങള്‍ക്കുമായി ചെലവിടുന്നത്‌.