ഗള്‍ഫ് പ്രതിസന്ധിക്ക് പിന്നില്‍ യഥാര്‍ത്ഥത്തില്‍ ആരാണ് എന്ന ചോദ്യമാണ് ഇപ്പോള്‍ ഉയരുന്നത്. കുറ്റക്കാര്‍ ശരിക്കും ഖത്തര്‍ തന്നെ ആണെന്ന് ഒരു വിഭാഗം പറയുന്നു. സൗദിയുടെ ഖത്തര്‍ വിരോധമാണ് പിന്നില്‍ എന്ന് മറ്റൊരു വിഭാഗം.അതൊന്നും അല്ല, പശ്ചിമേഷ്യയില്‍ സ്ഥാനം ഉറപ്പിക്കാന്‍ യുഎഇ ചെയ്ത പരിപാടിയാണെന്ന് വിശ്വസിക്കുന്നവരും ഉണ്ട്. ഡൊണാള്‍ഡ് ട്രംപിന്റേയും ഇസ്രായേലിന്റേയും പേരുകളും പലരും ഉയര്‍ത്തിപ്പിടിക്കുന്നുണ്ട്. എന്നാല്‍ ഇതിലൊന്നും പെടാതെ മാറിയിരുന്ന് ചിരിക്കുകയായിരുന്ന റഷ്യ ഇപ്പോള്‍ പ്രതിപ്പട്ടികയിലെ ആദ്യ സ്ഥാനത്ത് തന്നെയുണ്ട്. എല്ലാത്തിനും പിന്നില്‍ റഷ്യ ആകാനുള്ള സാധ്യതകള്‍ തള്ളിക്കളയാന്‍ കഴിയില്ല.

ഖത്തറിന്റെ ഔദ്യോഗിക വാര്‍ത്ത ഏജന്‍സിയില്‍ ആയിരുന്നു ആ വാര്‍ത്ത വന്നത്. ഇറാനെ പ്രശംസിച്ചും ഡൊണാള്‍ഡ് ട്രംപിനെ വിമര്‍ശിച്ചും കൊണ്ടുള്ള ഖത്തര്‍ അമീറിന്റെ പ്രസ്താവന ആയിരുന്നു അത്. അത് മറ്റ് അറബ് രാഷ്ട്രങ്ങളെ കാര്യമായിത്തന്നെ പ്രകോപിപ്പിച്ചു.ആ വാര്‍ത്ത വ്യാജമാണെന്ന് ഖത്തര്‍ ഉടന്‍ തന്നെ പ്രതികരിച്ചിരുന്നു. ഹാക്ക് ചെയ്യപ്പെട്ടതാണ് എന്ന വിശദീകരണവും നല്‍കി. എന്നാല്‍ അത് വിശ്വാസത്തിലെടുക്കാന്‍ സൗദി അറേബ്യയോ ബഹ്‌റൈനോ തയ്യാറായില്ല എന്നതാണ് സത്യം. ഖത്തര്‍ വാര്‍ത്ത ഏജന്‍സി ഹാക്ക് ചെയ്തതിന് പിന്നില്‍ റഷ്യന്‍ ഹാക്കര്‍മാരാണ് എന്നാണ് അന്വേഷണത്തില്‍ കണ്ടെത്തിയത് എന്നാണ് അമേരിക്ക പറയുന്നത്. എന്തിനാണ് റഷ്യ ഇത് ചെയ്തത് എന്ന കാര്യത്തിലും അമേരിക്ക ചില നിഗമനങ്ങളില്‍ എത്തിയിട്ടുണ്ട്.

ഹാക്ക് ചെയ്ത് വ്യാജ വാര്‍ത്തകള്‍ പ്രചരിപ്പിച്ച് സംഘര്‍ഷമുണ്ടാക്കുന്നതാണ് അടുത്തിടെ റഷ്യന്‍ രീതി എന്നാണ് അമേരിക്ക ആരോപിക്കുന്നത്. ജര്‍മനിയിലേയും ഫ്രാന്‍സിലേയും തിരഞ്ഞെടുപ്പ് സമയത്തും സമാനമായ പ്രവര്‍ത്തനം റഷ്യയുടെ ഭാഗത്ത് നിന്ന് ഉണ്ടായിരുന്നതായും അമേരിക്ക ആക്ഷേപിക്കുന്നുണ്ട്.പശ്ചിമേഷ്യയില്‍ എപ്പോഴും അമേരിക്കക്കാണ് ശക്തി കൂടുതല്‍. ഒട്ടുമിക്ക പ്രബല പശ്ചിമേഷ്യന്‍ രാജ്യങ്ങളും അമേരിക്കക്കൊപ്പമാണ്. എന്നാല്‍ ഇതിലേക്ക് കടന്നുകയറാന്‍ റഷ്യ തന്ത്രപൂര്‍വ്വം ചില നീക്കങ്ങള്‍ നേരത്തേ തന്നെ നടത്തിയിരുന്നു