ബ്രിട്ടനില്‍ പ്രവചനങ്ങളും എക്‌സിറ്റ് പോള്‍ ഫലങ്ങളും മറികടന്ന് ലേബര്‍ പാര്‍ട്ടി മുന്നേറ്റം നടത്തിയേക്കുമെന്ന് ആദ്യഫലസൂചനകള്‍
ബ്രിട്ടനില്‍ പ്രവചനങ്ങളും എക്‌സിറ്റ് പോള്‍ ഫലങ്ങളും മറികടന്ന് ലേബര്‍ പാര്‍ട്ടി മുന്നേറ്റം നടത്തിയേക്കുമെന്ന് ആദ്യഫല സൂചനകള്‍ വ്യക്തമാക്കുന്നു. ഇതുവരെ ഫലമറിഞ്ഞ 252 സീറ്റില്‍ 122 സീറ്റും ലേബര്‍ പാര്‍ട്ടി നേടി. ഭരണകക്ഷിയായ കണസര്‍വേറ്റീവിന് 100 സീറ്റേ ലഭിച്ചുള്ളു. സ്‌കോട്ടീഷ് നാഷണല്‍ പാര്‍ട്ടി 13 സീറ്റും ലിബറല്‍ ഡെമോക്രാറ്റുകള്‍ മൂന്നു സീറ്റും നേടിയിട്ടുണ്ട്.
കേവലഭൂരിപക്ഷം നേടാനായില്ലെങ്കിലും ഏറ്റവും വലിയ ഒറ്റക്കക്ഷിയായെങ്കിലും ലേബര്‍ മാറുമെന്നാണ് ഇപ്പോഴത്തെ ഫലങ്ങള്‍ നല്‍കുന്ന സൂചന. തെരേസ മേയ്ക്ക് പിന്തുണ നഷ്ടപ്പെട്ട സാഹചര്യത്തില്‍ സര്‍ക്കാരുണ്ടാക്കാന്‍ ലേബര്‍ ശ്രമിക്കുമെന്നും ഇതിന് മറ്റുപാര്‍ട്ടികള്‍ പിന്തുണ നല്‍കുമെന്നാണ് പ്രതീക്ഷയെന്നും ഷേഡോ വിദേശകാര്യ സെക്രട്ടറി എമിലി തോണ്‍ബെറി പറഞ്ഞു.
കണ്‍സര്‍വേറ്റീവിന് 314 സീറ്റും ലേബറിന് 266 സീറ്റും ലഭിക്കുമെന്നായിരുന്നു എക്‌സിറ്റ് പോള്‍ പ്രവചനം. കഴിഞ്ഞതവണ സ്‌കോട്ട്‌ലന്‍ഡില്‍ അമ്പത്തൊമ്പതില്‍ 56 സീറ്റും നേടിയ സ്‌കോട്ടീഷ് നാഷണല്‍ പാര്‍ട്ടിക്ക് 34 സീറ്റാണ് എക്‌സിറ്റ്‌പോള്‍ പ്രവചിക്കുന്നത്. ലിബറല്‍ ഡെമോക്രാറ്റുകള്‍ക്ക് 14 സീറ്റും.
ഇന്ത്യന്‍സമയം രാവിലെ പത്തുമണിയോടെ തിരഞ്ഞെടുപ്പുഫലം ഏതാണ്ട് പൂര്‍ണമായും പുറത്തുവരും. വ്യക്തമായ ഭൂരിപക്ഷമുണ്ടായിരിക്കെ കൂടുതല്‍ സീറ്റുതേടി തിരഞ്ഞെടുപ്പു പ്രഖ്യാപിച്ച തെരേസ മേയ്ക്ക് നിലവിലുള്ളതിനേക്കാള്‍ ഒരു സീറ്റുകുറഞ്ഞാല്‍പോലും അത് പരാജയമാണ്. തകര്‍ന്നടിയുമെന്ന് എല്ലാവരും തുടക്കത്തില്‍ വിലയിരുത്തിയ ലേബറിനു കിട്ടുന്നതെല്ലാം ബോണസും.
https://www.facebook.com/Malayalivartha
