ബ്രിട്ടീഷ് പാര്‍ലമെന്റ് തിരഞ്ഞെടുപ്പില്‍ ലീഡ് തിരിച്ചുപിടിച്ച് പ്രധാനമന്ത്രി തെരേസ മേയുടെ കണ്‍സര്‍വേറ്റീവ് പാര്‍ട്ടി. ആകെയുള്ള 650 സീറ്റുകളില്‍ 625 സീറ്റുകളിലെ ഫലം പുറത്തുവന്നപ്പോള്‍ 302 എണ്ണത്തില്‍ കണ്‍സര്‍വേറ്റീവ് പാര്‍ട്ടി വിജയിച്ചു. മുഖ്യപ്രതിപക്ഷമായ ലേബര്‍ പാര്‍ട്ടി 256 സീറ്റുകള്‍ നേടിയിട്ടുണ്ട്.

സ്‌കോട്ടീഷ് നാഷനല്‍ പാര്‍ട്ടിക്ക് 34 ഉം ലിബറല്‍ ഡമോക്രാറ്റിനു 12 ഉം ഡമോക്രാറ്റിക് യൂണിയനിസ്റ്റിനു 10 ഉം സീറ്റുകള്‍ വീതം നേടിയിട്ടുണ്ട്. മറ്റുള്ളവര്‍ക്ക് 11 സീറ്റുകള്‍ ലഭിച്ചു. ഭരണം പിടിക്കാന്‍ 326 സീറ്റുകള്‍ വേണമെന്നിരിക്കെ, ഒരു പാര്‍ട്ടിക്കും കേവല ഭൂരിപക്ഷം ലഭിക്കാന്‍ സാധ്യതയില്ലെന്നാണ് വിലയിരുത്തല്‍. പ്രധാനമന്ത്രി തെരേസാ മേ നേതൃത്വം നല്‍കുന്ന കണ്‍സര്‍വേറ്റീവ് പാര്‍ട്ടി ഏറ്റവും വലിയ ഒറ്റക്കക്ഷിയാകുമെങ്കിലും ഒറ്റയ്ക്ക് ഭരണം ലഭിക്കാനിടയില്ല.

ഇതോടെ, ബ്രിട്ടനില്‍ തൂക്കുമന്ത്രി സഭയ്ക്കു സാധ്യതയേറി. ഭരണത്തില്‍ മൂന്നുവര്‍ഷത്തെ കാലാവധികൂടി ഉണ്ടായിരുന്ന തെരേസ മേ, ജനവിധി അനുകൂലമാക്കി ബ്രെക്‌സിറ്റിന് ശക്തിപകരാനാണ് ഇത്തവണ നേരത്തെ തിരഞ്ഞെടുപ്പു നിശ്ചയിച്ചത്. പിരിച്ചുവിട്ട സഭയില്‍ കണ്‍സര്‍വേറ്റീവ് പാര്‍ട്ടിക്കു 330 സീറ്റും ലേബര്‍ പാര്‍ട്ടിക്ക് 229 സീറ്റുമാണുണ്ടായിരുന്നത്.

വോട്ടെണ്ണലിന്റെ ആരംഭം മുതല്‍ ലീഡു നിലനിര്‍ത്തി മുന്നേറിയ ലേബര്‍ പാര്‍ട്ടി വിജയിക്കുമെന്നായിരുന്നു തുടക്കത്തിലെ വിലയിരുത്തലുകള്‍. എന്നാല്‍, വോട്ടെണ്ണല്‍ പുരോഗമിക്കുന്തോറും നില മെച്ചപ്പെടുത്തിയ ഭരണകക്ഷിയായ കണ്‍സര്‍വേറ്റീവ് പാര്‍ട്ടി, ലീഡ് തിരിച്ചുപിടിക്കുകയായിരുന്നു. മെയ്ഡന്‍ഹെഡില്‍നിന്ന് ജനവിധി തേടിയ പ്രധാനമന്ത്രി തെരേസ മേ വിജയിച്ചു. ലേബര്‍ പാര്‍ട്ടി നേതാവ് ജെറമി കോര്‍ബിന്‍ ഇസ്!ലിങ്ടണിലും ജയിച്ചുകയറി.

അതേസമയം, കണ്‍സര്‍വേറ്റീവിന് 314 സീറ്റും ലേബറിന് 266 സീറ്റും ലഭിക്കുമെന്നായിരുന്നു എക്‌സിറ്റ് പോള്‍ പ്രവചനം. കഴിഞ്ഞതവണ സ്‌കോട്ട്‌ലന്‍ഡില്‍ അമ്പത്തൊമ്പതില്‍ 56 സീറ്റും നേടിയ സ്‌കോട്ടീഷ് നാഷണല്‍ പാര്‍ട്ടിക്ക് 34 സീറ്റാണ് എക്‌സിറ്റ്‌പോള്‍ പ്രവചിക്കുന്നത്. ലിബറല്‍ ഡെമോക്രാറ്റുകള്‍ക്ക് 14 സീറ്റും. ഇന്ത്യന്‍ സമയം രാവിലെ പത്തരയോടെ തിരഞ്ഞെടുപ്പുഫലം ഏതാണ്ട് പൂര്‍ണമായും പുറത്തുവരും.

തെരേസ മേയ്ക്ക് പിന്തുണ നഷ്ടപ്പെട്ട സാഹചര്യത്തില്‍ സര്‍ക്കാരുണ്ടാക്കാന്‍ ലേബര്‍ ശ്രമിക്കുമെന്നും ഇതിന് മറ്റുപാര്‍ട്ടികള്‍ പിന്തുണ നല്‍കുമെന്നാണ് പ്രതീക്ഷയെന്നും ഷേഡോ വിദേശകാര്യ സെക്രട്ടറി എമിലി തോണ്‍ബെറി പറഞ്ഞു. വ്യക്തമായ ഭൂരിപക്ഷമുണ്ടായിരിക്കെ കൂടുതല്‍ സീറ്റുതേടി തിരഞ്ഞെടുപ്പു പ്രഖ്യാപിച്ച തെരേസ മേയ്ക്ക് നിലവിലുള്ളതിനേക്കാള്‍ ഒരു സീറ്റുകുറഞ്ഞാല്‍പോലും അത് പരാജയമാണ്. തകര്‍ന്നടിയുമെന്ന് എല്ലാവരും തുടക്കത്തില്‍ വിലയിരുത്തിയ ലേബറിനു കിട്ടുന്നതെല്ലാം ബോണസും.