ബ്രിട്ടീഷ് പാര്‍ലമെന്റ് തിരഞ്ഞെടുപ്പില്‍ ലീഡ് തിരിച്ചുപിടിച്ച് പ്രധാനമന്ത്രി തെരേസ മേയുടെ കണ്‍സര്‍വേറ്റീവ് പാര്‍ട്ടി. ആകെയുള്ള 650 സീറ്റുകളില്‍ 641 സീറ്റുകളിലെ ഫലം പുറത്തുവന്നപ്പോള്‍ 312 എണ്ണത്തില്‍ കണ്‍സര്‍വേറ്റീവ് പാര്‍ട്ടി വിജയിച്ചു. മുഖ്യപ്രതിപക്ഷമായ ലേബര്‍ പാര്‍ട്ടി 260 സീറ്റുകള്‍ നേടിയിട്ടുണ്ട്. സ്‌കോട്ടീഷ് നാഷനല്‍ പാര്‍ട്ടിക്ക് 34 ഉം ലിബറല്‍ ഡമോക്രാറ്റിനു 12 ഉം ഡമോക്രാറ്റിക് യൂണിയനിസ്റ്റിനു 10 ഉം സീറ്റുകള്‍ വീതം നേടിയിട്ടുണ്ട്. മറ്റുള്ളവര്‍ക്ക് 13 സീറ്റുകള്‍ ലഭിച്ചു.

ജനവിധി പ്രതികൂലമായ സാഹചര്യത്തില്‍ തേരേസ മേ എത്രയും പെട്ടെന്ന് പ്രധാനമന്ത്രി പദം ഒഴിയണമെന്ന് ലേബര്‍ പാര്‍ട്ടി നേതാവ് ജെറമി കോര്‍ബിന്‍ ആവശ്യപ്പെട്ടു. അതേസമയം, ബ്രിട്ടനില്‍ സ്ഥിരതയുള്ള സര്‍ക്കാരിനെ ഉറപ്പാക്കാനാണ് തന്റെ ശ്രമമെന്ന് തെരേസ മേ പ്രതികരിച്ചു. സൂചനകള്‍ ശരിയാണെങ്കില്‍ കണ്‍സര്‍വേറ്റീവ് പാര്‍ട്ടി ഏറ്റവും കൂടുതല്‍ സീറ്റും വോട്ടും നേടി മുന്നിലെത്തുമെന്നും അവര്‍ ചൂണ്ടിക്കാട്ടി.

കേവല ഭൂരിപക്ഷത്തിന് 326 സീറ്റ്, തൂക്കുസഭ ഉറപ്പായി

ഭരണം പിടിക്കാന്‍ 326 സീറ്റുകള്‍ വേണമെന്നിരിക്കെ, ഒരു പാര്‍ട്ടിക്കും കേവല ഭൂരിപക്ഷം ലഭിക്കാന്‍ സാധ്യതയില്ലെന്ന് ഉറപ്പായിട്ടുണ്ട്. പ്രധാനമന്ത്രി തെരേസ മേ നേതൃത്വം നല്‍കുന്ന കണ്‍സര്‍വേറ്റീവ് പാര്‍ട്ടി ഏറ്റവും വലിയ ഒറ്റക്കക്ഷിയായെങ്കിലും ഒറ്റയ്ക്ക് ഭരിക്കാനുള്ള ഭൂരിപക്ഷമില്ല. ഇതോടെ, ബ്രിട്ടനില്‍ തൂക്കുസഭയാകുമെന്ന് ഉറപ്പായി. പിരിച്ചുവിട്ട സഭയില്‍ കണ്‍സര്‍വേറ്റിവ് പാര്‍ട്ടിക്കു 330 സീറ്റും ലേബര്‍ പാര്‍ട്ടിക്ക് 229 സീറ്റുമാണുണ്ടായിരുന്നത്.

വോട്ടെണ്ണലിന്റെ ആരംഭം മുതല്‍ ലീഡു നിലനിര്‍ത്തി മുന്നേറിയ ലേബര്‍ പാര്‍ട്ടി വിജയിക്കുമെന്നായിരുന്നു തുടക്കത്തിലെ വിലയിരുത്തലുകള്‍. എന്നാല്‍, വോട്ടെണ്ണല്‍ പുരോഗമിക്കുന്തോറും നില മെച്ചപ്പെടുത്തിയ ഭരണകക്ഷിയായ കണ്‍സര്‍വേറ്റീവ് പാര്‍ട്ടി, ലീഡ് തിരിച്ചുപിടിക്കുകയായിരുന്നു. മെയ്ഡന്‍ഹെഡില്‍നിന്ന് ജനവിധി തേടിയ പ്രധാനമന്ത്രി തെരേസ മേ വിജയിച്ചു. ലേബര്‍ പാര്‍ട്ടി നേതാവ് ജെറമി കോര്‍ബിന്‍ ഇസ്‌ലിങ്ടണിലും ജയിച്ചു കയറി.

തെരേസ മേയ്ക്ക് പിന്തുണ നഷ്ടപ്പെട്ട സാഹചര്യത്തില്‍ സര്‍ക്കാരുണ്ടാക്കാന്‍ ലേബര്‍ ശ്രമിക്കുമെന്നും ഇതിന് മറ്റുപാര്‍ട്ടികള്‍ പിന്തുണ നല്‍കുമെന്നാണ് പ്രതീക്ഷയെന്നും ഷേഡോ വിദേശകാര്യ സെക്രട്ടറി എമിലി തോണ്‍ബെറി പറഞ്ഞു.

പ്രധാനമന്ത്രി തെരേസ മേയുടെ കണ്‍സര്‍വേറ്റിവ് പാര്‍ട്ടി വര്‍ധിച്ച ഭൂരിപക്ഷത്തോടെ വിജയിക്കുമെന്നാണു വിവിധ പ്രവചനങ്ങളിലെ സൂചന. പ്രതിപക്ഷ ലേബര്‍ പാര്‍ട്ടിയെക്കാള്‍ എട്ടുശതമാനം പിന്തുണ കണ്‍സര്‍വേറ്റിവ് പാര്‍ട്ടിക്കുണ്ടെന്ന് ഏറ്റവും ഒടുവില്‍ പുറത്തുവന്ന സര്‍വേ ഫലത്തിലും സൂചനയുണ്ടായിരുന്നു.