ഭൂകമ്പ സാധ്യത മേഖല അല്ലാതിരുന്നിട്ടും ദക്ഷിണ കൊറിയയെ ഭീതിയിലാഴ്ത്തി വന്‍ തീവ്രതയോടെ ഭൂമി കുലുങ്ങിയതിന് പിന്നില്‍ ദുരൂഹത ആരോപിച്ച് ദക്ഷിണ കൊറിയയും, അന്താരാഷ്ട്ര മാധ്യമങ്ങളും രംഗത്തെത്തിയിട്ടുണ്ട്. റിക്ടര്‍ സ്‌കെയിലില്‍ 5.4 രേഖപ്പെടുത്തിയ ഭൂമി കുലുക്കത്തിന് പിന്നില്‍ കിം ജോങ് ഉന്നിന്റെ ആണവ പരീക്ഷണമാണെന്ന് സംശയിക്കുന്നു. 

ഇതില്‍ അന്വേഷണം ആരംഭിച്ചു. രാജ്യത്ത് ഇന്നേ വരെ രേഖപ്പെടുത്തിയിട്ടുള്ള രണ്ടാമത്തെ വലിയ ഭൂകമ്പമാണിത്. ആദ്യ ഭൂകമ്പത്തിന് ശേഷം 4.3 രേഖപ്പെടുത്തിയ തുടര്‍ ചലനങ്ങളും ഉണ്ടായി. ഉച്ചയ്ക്ക് 2 മണിയോടെ ഉണ്ടായ ഭൂകമ്പത്തില്‍ തലസ്ഥാനമായ സോളില്‍ ഉള്‍പ്പെടെ രാജ്യത്തിന്റെ മിക്കയിടത്തും പ്രകമ്പനം അനുഭവപ്പെട്ടു. തുറമുഖ നഗരമായ പോഹാങില്‍ നിന്നും 9.3 കിലോമീറ്റര്‍ വടക്കു പടിഞ്ഞാറു മാറിയാണ് ഭൂകമ്പത്തിന്റെ പ്രഭാവ കേന്ദ്രം. 300 കിലോമീറ്ററിലേറെ ദൂരെയുള്ള സോളിനെയും പിടിച്ചു കുലുക്കി.

ഏഴു പേര്‍ക്ക് പരിക്കേറ്റു. പരിക്കേറ്റവരുടെ എണ്ണം ഇനിയും കൂടാന്‍ സാധ്യതയുണ്ട്.
കെട്ടിടങ്ങളുടെ ഭിത്തിയും മതിലുകളും ഇടിഞ്ഞു വീണു. റോഡുകള്‍ തകര്‍ന്നു. രാജ്യത്തെ നെറ്റ് വര്‍ക്കുകള്‍ കുറച്ചു സമയത്തേയ്ക്ക് പ്രവര്‍ത്തന രഹിതമായി. കൊറിയന്‍ പെനിന്‍സുലയില്‍ ഭൂകമ്പ സാധ്യത വളരെ കുറവാണ്. പക്ഷേ ഭൂമിക്കടിയിലുണ്ടാകുന്ന ചലനങ്ങള്‍ കൃത്യമായി നിരീക്ഷിക്കപ്പെടുന്നുണ്ട്. ഉത്തര കൊറിയ ആണവ പരീക്ഷണങ്ങള്‍ നടത്തുന്നതിന്റെ ആദ്യ വിവരങ്ങള്‍ അങ്ങനെയാണ് ലഭിച്ചത്. ആസിയാന്‍ ഉച്ചക്കോടി കഴിഞ്ഞ് മടങ്ങിയെത്തിയാലുടന്‍ പ്രസിഡന്റ് മൂണ്‍ ജെ ഇന്‍ അടിയന്തര യോഗം വിളിച്ചിട്ടുണ്ട്.

കഴിഞ്ഞ വര്‍ഷം സെപ്റ്റംബറില്‍ 5.8 തീവ്രത രേഖപ്പെടുത്തിയ ഭൂകമ്പം രാജ്യത്തുണ്ടായിരുന്നു. അതേ മാസം തന്നെ 3.4 രേഖപ്പെടുത്തിയ ചലനവുമുണ്ടായി. ഇത് കിം ജോങിന്റെ ആണവ പരീക്ഷണ സമയത്തായിരുന്നു.