തങ്ങളുടെ ഏകാധിപതിയെ കുള്ളനായ തടിയന്‍ എന്ന് പരിഹസിച്ചതിന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന് വധശിക്ഷ വിധിച്ച്‌ ഉത്തരകൊറിയ. യുഎസ് പ്രസിഡന്റെിനെ ഒളിച്ചിരിക്കുന്ന ക്രിമിനല്‍ എന്ന് വിശേഷിപ്പിച്ച കൊറിയന്‍ ഔദ്യോഗിക മാധ്യമം തങ്ങളുടെ ഭരണാധികാരിയെ പരിഹസിച്ച അമേരിക്കന്‍ പ്രസിഡന്റിനെ രൂക്ഷമായി വിമര്‍ശിക്കുകയും വധിക്കണമെന്ന് ആവശ്യപ്പെടുകയും ചെയ്തു. ട്രംപിന്റെ ഏഷ്യന്‍ പര്യടനം അവസാനഘട്ടത്തോട് അടുക്കുമ്ബോഴാണ് ശക്തമായ വിമര്‍ശനവുമായി കൊറിയ എത്തിയത്.

അഞ്ച് ഏഷ്യന്‍ രാജ്യങ്ങളില്‍ പര്യടനം നടത്തുന്ന ട്രംപിന്റെ കഴിഞ്ഞയാഴ്ചത്തെ ദക്ഷിണ കൊറിയന്‍ സന്ദര്‍ശനത്തിനെതിരേ ശക്തമായ കോപമാണ് ഭരണപാര്‍ട്ടിയായ റോഡോങ്ങ് സിന്‍മുന്‍ മുഖപ്രസംഗത്തില്‍ കോരിച്ചൊരിഞ്ഞത്. സോളില്‍ നടത്തിയ പ്രസംഗത്തില്‍ ഉത്തരകൊറിയയെ ശക്തമായി ട്രംപ് വിമര്‍ശിച്ചിരുന്നു. ദക്ഷിണ കൊറിയയില്‍ നിന്നും വിരുദ്ധമായി ഉത്തരകൊറിയ കൊടിയ ഏകാധിപത്യത്തിന് കീഴിലാണെന്നായിരുന്നു വിമര്‍ശനം.വടക്കന്‍ കൊറിയയുടെ അണുവായുധ ചോദനയെയും രൂക്ഷമായി വിമര്‍ശിച്ചു.

ഉത്തരകൊറിയയുടെ പരമാധികാരത്തെ നിസ്സാരവല്‍ക്കരിച്ച്‌ ആക്ഷേപിച്ച ട്രംപ് രാജ്യത്തെ ഏറ്റവും ഗുരുതരമായ കുറ്റമാണ് ചെയ്തതെന്നും ഒരിക്കലും ക്ഷമിക്കരുതെന്നും മുഖപ്രസംഗത്തില്‍ പറഞ്ഞിട്ടുണ്ട്. കൊറിയന്‍ ജനങ്ങള്‍ വധശിക്ഷയ്ക്ക് വിധിച്ചിരിക്കുന്ന ഒളിവിലിരിക്കുന്ന ക്രിമിനലാണ് ട്രംപ് എന്നായിരുന്നു പത്രം വിശേഷിപ്പിച്ചത്. അധികാരത്തില്‍ ഏറിയത് മുതല്‍ ട്രംപും കിമ്മും തമ്മില്‍ വാക്പോരും തുടങ്ങിയിരുന്നു. നേരത്തേ ഏഷ്യന്‍ ടൂറിനിയില്‍ ഹാനോയ് യില്‍ നിന്നും നടത്തിയ ട്വീറ്റില്‍ കിമ്മിനെ രൂക്ഷമായി പരിഹസിച്ചിരുന്നു.

തന്നെ കിം 'വയസന്‍' എന്ന് വിളിച്ചാക്ഷേപിച്ചാലും താന്‍ അയാളെ 'കുള്ളനായ തടിയന്‍' എന്ന് ഒരിക്കലും വിളിക്കില്ലെന്നായിരുന്നു ട്രംപിന്റെ ട്വീറ്റ്. രണ്ടു കൊറിയകളും തമ്മിലുള്ള അതിര്‍ത്തി സന്ദര്‍ശിക്കാനുള്ള ട്രംപിന്റെ നീക്കം അവസാന നിമിഷം ഒഴിവാക്കപ്പെട്ടിരുന്നു. സ്ഥലത്തേക്ക് ട്രംപുമായുള്ള ഹെലികോപ്റ്റര്‍ പറന്നിരുന്നു എങ്കിലും കാലാവസ്ഥ മോശമായതിനാല്‍ തിരിച്ചു പോയിരുന്നു. ഇതിനെ ട്രംപ് തങ്ങളുടെ സൈന്യത്തെ പേടിച്ച്‌ ഓടിയതാണെന്നായിരുന്നു കൊറിയ പരിഹസിച്ചത്.