ഇടുക്കി അണക്കെട്ടിലെ ജലനിരപ്പിൽ വീണ്ടും നേരിയ തോതിൽ കുറവ്. ഇപ്പോൾ അണക്കെട്ടിലെ ജലനിരപ്പ് 2401.68 അടിയായി ആണ് കുറഞ്ഞിരിക്കുന്നത്. കനത്ത മഴ തുടരുകയും ജലനിരപ്പ് ഉയരുകയും ചെയ്ത സാഹചര്യത്തില്‍ അണക്കെട്ടിന്റെ അഞ്ചാമത്തെ ഷട്ടറും തുറന്നിരുന്നു. അണക്കെട്ടിന്റെ വൃഷ്ടിപ്രദേശത്ത് മഴ ശക്തമായതിനാല്‍ അണക്കെട്ടിലെ ജലനിരപ്പ് ക്രമാതീതമായി ഉയരുകയായിരുന്നു.

അണക്കെട്ടിലെ ജലനിരപ്പിൽ ഉണ്ടായ നേരിയ കുറവ് താത്കാലിമായി ആശ്വാസം നൽകുന്നുണ്ട്. ആറ് മണിക്ക് എടുത്ത റീഡിംഗിൽ 2401.70 അടിയായിരുന്ന ജലനിരപ്പ് ഇപ്പോൾ 2401.68 അടി ആയി ഇപ്പോൾ കുറയുകയായിരുന്നു. ജലനിരപ്പ് ഒരു മണിക്കൂറിൽ 0.06 അടിയായി ആണ് കുറഞ്ഞിരിക്കുന്നത്.

വ്യാഴാഴ്ച വൈകിട്ട് 4.30ന് ട്രയല്‍ റണ്‍ അവസാനിപ്പിക്കുമെന്ന് അറിയിച്ചിരുന്നെങ്കിലും നീരൊഴുക്കു കൂടിയതിനാല്‍ രാത്രിയിലും ട്രയല്‍ റണ്‍ തുടരുകയായിരുന്നു. ജലനിരപ്പ് 2399.04 അടിയിലെത്തിയപ്പോഴാണ് ഇന്നലെ ഉച്ചയ്ക്ക് 12.31 ന് ട്രയല്‍ റണ്‍ ആരംഭിച്ചത്.

സെക്കന്റിൽ 800 ഘനമീറ്റർ വെള്ളമാണ് ഇടുക്കി അണക്കെട്ടിൽ നിന്നും ഇപ്പോൾ പുറത്തേക്ക് ഒഴുകുന്നത്. അതേസമയം, അണക്കെട്ടിലെ ഷട്ടറുകൾ തുറന്നതോടെ ചെറുതോണി പട്ടണം ഏതാണ്ട് വെള്ളത്തിനടിയിലാണ്. അതേസമയം ചെറുതോണിയിൽ നിന്നും കട്ടപ്പനയിലേക്ക് പോകുന്ന പാലം വെള്ളത്തിനടിയിൽ ആയതോടെ ഇതുവഴിയുള്ള ഗതാഗതവും തടസപ്പെട്ടു. 2403 അടിയാണ് അണക്കെട്ടിന്റെ പരമാവധി സംഭരണശേഷി. 26 വര്‍ഷങ്ങള്‍ക്കുശേഷമാണ് ഇടുക്കി ചെറുതോണി അണക്കെട്ടിന്റെ ഷട്ടര്‍ തുറന്നത്.