കേരളം പ്രളയത്തില്‍ മുങ്ങിത്താഴുമ്പോള്‍ കൈപിടിച്ചുയര്‍ത്താന്‍ ശ്രമിച്ച ഉദ്യോഗസ്ഥരില്‍ ഏറ്റവും ശ്രദ്ധേയമായ പ്രവര്‍ത്തനം നടത്തുന്നത് തിരുവനന്തപുരം കളക്്ടര്‍ ഡോ. വാസുകിയാണ്. 2004ല്‍ കേരളത്തിന്റെയും തമിഴ്‌നാടിന്റെയും തീരങ്ങളില്‍ വീശിയ സൂനാമിയാണ് ഡോ. വാസുകിയുടെയും ഭര്‍ത്താവും കൊല്ലം കളക്ടറുമായ ഡോ. കാര്‍ത്തികേയന്റെയും ജീവിതം മാറ്റിമറിച്ചത്. രാജ്യത്തിനും ജനങ്ങള്‍ക്കും നന്മ ചെയ്യാന്‍ സിവില്‍ സര്‍വീസിനോളം മറ്റൊരു പ്രഫഷനും കഴിയില്ലെന്ന് ഇരുവരും മനസിലാക്കി. പ്രണയജോഡികളായിരുന്ന കെ വാസുകിയും കാര്‍ത്തികേയനും അതോടെ സിവില്‍ സര്‍വീസ് ലക്ഷ്യമിട്ട് പഠനം തുടങ്ങി.

ഇരുവരും ജ്യോഗ്രഫിയും സൈക്കോളജിയും ഐച്ഛികമായി തിരഞ്ഞെടുത്തു. പഠനം തകൃതിയായി നടന്നു. 2008 ല്‍ ഇരുവര്‍ക്കും സിവില്‍ സര്‍വീസ് കിട്ടി. 97 ാം റാങ്കാണ് വാസുകിക്ക് കിട്ടിയത്. അതേസമയം 127 റാങ്കായിരുന്നു കാര്‍ത്തികേയന് ലഭിച്ചത്. അലോട്ട്‌മെന്റ് വന്നപ്പോള്‍ കാര്‍ത്തികേയന് ലഭിച്ചത് ഐഎഫ്എസും. അതോടെ ഐഎഫ്എസ് വേണ്ടെന്ന് വയ്ക്കാന്‍ കാര്‍ത്തികേയന്‍ തീരുമാനിച്ചു. ഡല്‍ഹിയിലെ ഫോറിന്‍ സര്‍വീസ് ട്രെയിനിങ് ഇന്‍സ്റ്റിറ്റിയൂട്ടില്‍ കാര്‍ത്തികേയന്‍ പരിശീലനത്തിനും പോലും പോയില്ല. ഇനി ഒരിക്കലും സിവില്‍ സര്‍വീസ് എഴുതാന്‍ സാധിക്കില്ല അഥവാ എഴുതിയാല്‍ പോലും ഇന്റര്‍വ്യൂവിനു വിളിക്കില്ലെന്ന് ഭയം കാര്‍ത്തികേയനെ അലട്ടി.

അക്കാലത്ത് വാസുകി കാര്‍ത്തിയേകന് പിന്തുണ നല്‍കി. കാര്‍ത്തിയേകന് വീണ്ടും പരീക്ഷ എഴുതാനായി അവകാശം ലഭിക്കാനായി ഡല്‍ഹിയിലെ വിദേശകാര്യ, പഴ്‌സനേല്‍ മന്ത്രാലയങ്ങളില്‍ വാസുകി കയറിയിറങ്ങി. അവസാനം അനുമതി കിട്ടി. 2009, 2010 ലും കാര്‍ത്തികയന് കിട്ടിയത് ഐആര്‍എസ് മാത്രമാണ്. 2010 ല്‍ ഇരുവരും വിവാഹിതരായി. നാലാം തവണ 2011ല്‍ കാര്‍ത്തികേയന് ഐഎഎസ് ലഭിച്ചു. കാര്‍ത്തികേയന് കേരളാ കേഡറും കിട്ടി. പിന്നീട് വാസുകി മധ്യപ്രദേശ് കേഡറില്‍ നിന്നും കേരളാ കേഡറിലേക്ക് വന്നു. ഇപ്പോള്‍ വാസുകി തിരുവനന്തപുരം ജില്ലാ കളക്ടറും കാര്‍ത്തികേയന്‍ കൊല്ലം ജില്ലാ കളക്ടറുമാണ്.