ആര്‍.എസ്.എസ് നേതാവ് കതിരൂര്‍ മനോജ് വധക്കേസില്‍ കൂടുതല്‍ സിപിഎം നേതാക്കള്‍ വൈകാതെ കുരുങ്ങും. കഴിഞ്ഞ ദിവസം കോടിയേരി ബാലകൃഷ്ണന്‍ പ്രതികളെ സന്ദര്‍ശിച്ചതാണ് ബിജെപിയെ കൂടുതല്‍ പ്രകോപിപ്പിച്ചത്. കോടിയേരിയുടെ സന്ദര്‍ശനം അന്വേഷിക്കണമെന്ന് ബിജെപി ആവശ്യപ്പെട്ടു കഴിഞ്ഞു. കോടിയേരിയുടെ സന്ദര്‍ശനത്തോടെ സംഭവത്തിന് പിന്നിലുള്ള ഗൂഢാലോചന വ്യക്തമായതായി ബിജെപി ആരോപിക്കുന്നു.

മനോജ് വധക്കേസില്‍ ഉമ്മന്‍ചാണ്ടി സര്‍ക്കാര്‍ സിപിഎമ്മിനെ സഹായിക്കുന്ന നിലപാടാണ് സ്വീകരിക്കുന്നതെന്നും പരക്കെ ആക്ഷേപമുണ്ട്. ആഭ്യന്തരമന്ത്രി രമേശ് ചെന്നിത്തല ആദ്യഘട്ടത്തില്‍ കര്‍ശന നടപടികള്‍ സ്വീകരിച്ചില്ലെങ്കിലും പിന്നീട് സംഭവം മന്ദഗതിയിലാവുകയായിരുന്നു. ഉന്നത സിപിഎം നേതാക്കള്‍ക്ക് സംഭവവുമായി പങ്കുണ്ടെന്നാണ് ബിജെപിയുടെ ആരോപണം.

ഉമ്മന്‍ചാണ്ടിയും പിണറായിയും തമ്മില്‍ രഹസ്യ ധാരണയുണ്ടെന്നും ബിജെപി ആരോപിക്കുന്നു. റ്റി.പി കേസിന് സമാനമാണ് കതിരൂര്‍ മനോജ് വധക്കേസെന്നും ആരോപണമുണ്ട്. കാരണം കേസ് അട്ടിമറിക്കുകയാണ് സിപിഎമ്മിന്റെയും കോണ്‍ഗ്രസിന്റേയും ലക്ഷ്യം.
ഉമ്മന്‍ചാണ്ടിയാകട്ടെ സിപിഎമ്മിനെ തളര്‍ത്തി സംസ്ഥാനത്ത് ബിജെപിയെ വളര്‍ത്തരുതെന്ന വിശ്വാസമാണ് പുലര്‍ത്തുന്നത്. സിപിഎമ്മിനാണ് ബിജെപിയെക്കാള്‍ ഭേദമെന്നും ഉമ്മന്‍ചാണ്ടി കരുതുന്നു. അടുത്ത നിയമസഭാ തെരഞ്ഞെടുപ്പില്‍ ബിജെപി പിടിമുറുക്കുന്നു എന്ന ആക്ഷേപം തള്ളികളയുമ്പോഴും ബിജെപിയെ വളരാന്‍ അനുവദിക്കരുതെന്നാണ് ഉമ്മന്‍ചാണ്ടിയും കോണ്‍ഗ്രസ് നേതൃത്വവും ആവശ്യപ്പെടുന്നത്. ഇക്കാലമത്രയും കോണ്‍ഗ്രസ് ബിജെപിയോട് മൃദുസമീപനമാണ് കാഴ്ച വച്ചത്. ഈസി വാക്കോവറിനായി ബിജെപി പലവട്ടം കോണ്‍ഗ്രസിനെ സഹായിച്ചിട്ടുമുണ്ട്.
കേസ് സിബിഐ ഏറ്റെടുത്താലുടന്‍ കൂടുതല്‍ സിപിഎം നേതാക്കള്‍ അകത്താകുമെന്ന് ബിജെപി കരുതുന്നു. എന്നാല്‍ കേസ് ഇതുവരെയും സിബിഐ ഏറ്റെടുത്തിട്ടില്ല. കേസ് ഉടന്‍ ഏറ്റെടുക്കണമെന്ന് കാണിച്ച് ബിജെപി പ്രസിഡന്റ് വി.മുരളീധരന്‍ കേന്ദ്ര സര്‍ക്കാരിന് കത്തയച്ചിട്ടുണ്ട്. സിബിഐ കേസ് ഏറ്റെടുക്കുന്നതിനു മുമ്പ് മൊഴി പഠിപ്പിക്കാനാണ് കോടിയേരി എത്തിയതെന്നും ബിജെപി ആരോപിക്കുന്നു.
കേന്ദ്ര ആഭ്യന്തര മന്ത്രി രാജ്‌നാഥ് സിംഗ് നേരിട്ട് സിബിഐയുമായി സംസാരിക്കുമെന്നാണ് അറിയുന്നത്. കതിരൂര്‍ മനോജ് വധക്കേസിനെ രാഷ്ട്രീയമായി ഉപയോഗിക്കാന്‍ തന്നെയാണ് ബിജെപിയുടെ തീരുമാനം. ഏതായാലും അധികം വൈകാതെ നെല്ലും പതിരും തിരിയാനാണ് സാധ്യത. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha