കൊല്ലങ്കോട് ഊട്ടറ വാട്ടയാറിൽ പൂട്ടിക്കിടന്ന വീട്ടിൽ നിന്ന് 44.5 പവൻ സ്വർണം കവർന്നു. 30 ഗ്രാം വെള്ളിയും കവർച്ച ചെയ്യപ്പെട്ടിട്ടുണ്ട്. എംഎൻ നരേഷ് കുമാറിന്റെ വീട്ടിലാണ് കവർച്ച നടന്നത് .

കിടപ്പുമുറിയുടെ അലമാരയിൽ സൂക്ഷിച്ച സ്വർണമാണ് കവർന്നെടുത്തത്. പൂട്ടിയിട്ട വീടിന്റെ മുൻവാതിൽ തകർത്തായിരുന്നു മോഷണം. ഇന്നലെ വൈകിട്ടാണ് മോഷണ വിവരമറിയുന്നത് . താനും കുടുംബവും ഗുരുവായൂർ ക്ഷേത്ര സന്ദർശനത്തിന് പോയ സമയത്തായിരുന്നു കവർച്ചയെന്ന് വീട്ടുടമ നരേഷ് പറഞ്ഞു.

വീടിന്റെ മുൻവാതിലും മുറികൾക്ക് അകത്തുള്ള അലമാരകളുടെ പൂട്ടുപൊളിച്ചതായി കണ്ടെത്തി. കൊല്ലങ്കോട് പൊലീസ് അന്വേഷണം തുടങ്ങി. പൊലീസ് നായയും വിരലടയാള വിദഗ്ധരും വീട്ടിലെത്തി പരിശോധന നടത്തുകയും ചെയ്തു.