രശ്മിക മന്ദാനയും വിജയ് ദേവരകൊണ്ടയും വിവാഹസമ്മാനമായി നല്കിയത് ?
ആരാധകര് കാത്തിരുന്ന താരങ്ങളായ രശ്മിക മന്ദാനയും വിജയ് ദേവരകൊണ്ടയും വിവാഹം ഫെബ്രുവരി 26ന് നടന്നു. ഉദയ്പൂരില്വെച്ച് തികച്ചും സ്വകാര്യമായിട്ടായിരുന്നു രണ്ട് വ്യത്യസ്തരീതിയിലുള്ള വിവാഹ ചടങ്ങുകള്. വിവാഹശേഷവും കുടുംബപരമായ ചടങ്ങുകളും മറ്റുമായി തിരക്കിലാണ് താരദമ്പതികള്. അതിനിടെ ഇക്കഴിഞ്ഞ ദിവസമാണ് തെലങ്കാനയിലെ തുമ്മന്പേട്ടയിലെ വിജയ്യുടെ ഗ്രാമത്തില് നിര്മിച്ച അവരുടെ പുതിയ വീട്ടില് താരങ്ങള് മാതാപിതാക്കള്ക്കൊപ്പമെത്തിയത്. ഗ്രാമം മുഴുവന് ആഘോഷങ്ങളോടെയായിരുന്നു അവിടെയെത്തിയ വിജയ്യെയും രശ്മികയെയും സ്വീകരിച്ചത്. തികച്ചും പരമ്പരാഗതമായ ചടങ്ങുകള്. അതിനിടെ ഗൃഹപ്രവേശനച്ചടങ്ങും സത്യനാരായണവ്രതപൂജയും അവര് നടത്തി.
അതുകഴിഞ്ഞ് ഗ്രാമത്തിലുള്ളവരെ കാണാനായി താരങ്ങളെത്തി. തങ്ങളുടെ വിവാഹസമ്മാനമായി ഗ്രാമത്തിലുള്ള കുട്ടികള്ക്ക് സ്കോളര്ഷിപ്പ് നല്കുമെന്ന് വിജയ് വേദിയില്വെച്ച് പ്രഖ്യാപിക്കുകയും ചെയ്തു. തെലങ്കാനയിലെ അച്ചംപേട്ട് ഡിവിഷനിലെ 44 സര്ക്കാര് സ്കൂളുകളിലെ വിദ്യാര്ഥികള്ക്കാണ് സ്കോളര്ഷിപ്പ് നല്കുക. സ്കൂളുകളില് മികച്ച പഠനം കാഴ്ചവെക്കുന്ന, എല്ലാ ക്ലാസിലും ഒന്നും രണ്ടും സ്ഥാനത്തെത്തുന്ന വിദ്യാര്ഥികള്ക്കാണ് ഈ സ്കോളര്ഷിപ്പ് ലഭിക്കുക. ഒമ്പതാം ക്ലാസിലും പത്താം ക്ലാസിലും പഠിക്കുന്ന കുട്ടികള്ക്കാണ് ഈ പദ്ധതിയിലൂടെ പഠിക്കാനുള്ള അവസരമുണ്ടാവുന്നത്.
സാമ്പത്തികപ്രശ്നങ്ങളൊന്നുമില്ലാതെ വിദ്യാര്ഥികളെ അടിസ്ഥാനവിദ്യാഭ്യാസം പൂര്ത്തിയാക്കാന് സഹായിക്കുക എന്നതാണ് പദ്ധതിയുടെ ലക്ഷ്യം. ദേവരകൊണ്ട ചാരിറ്റബിള് ട്രസ്റ്റിന്റെ ഭാഗമായിട്ടായിരിക്കും ഈ പ്രവര്ത്തനങ്ങള് നടത്തുക.
വിജയ്യുടെ പ്രഖ്യാപനം കൈയടികളോടെയും ആരവങ്ങളോടെയുമാണ് ആളുകള് എതിരേറ്റത്. പദ്ധതിയുടെ സുഗമമായ നടത്തിപ്പ് ഉറപ്പുവരുത്താനും മറ്റുമായി താന് ഇടയ്ക്കിടെ ഇനി ഗ്രാമത്തില് വരുമെന്നും വിജയ് പറഞ്ഞു. വേദിയില് വിജയ്ക്കൊപ്പം രശ്മികയും, മാതാപിതാക്കളും സഹോദരനുമുണ്ടായിരുന്നു.
https://www.facebook.com/Malayalivartha
