കുട്ടനാട്ടിലെ കര്‍ഷകരുടെ പ്രശ്‌നങ്ങള്‍ പരിഹരിക്കാന്‍ കൊണ്ടുവന്ന കുട്ടനാട് പാക്കേജിന്റെ മൂന്നു പദ്ധതികളുടെ കാലാവധി നീട്ടി. 2016 ഡിസംബര്‍ വരെ കാലാവധി നീട്ടിയതായി ജലവിഭവ മന്ത്രി പി,ജെ.ജോസഫ് അറിയിച്ചു. പാക്കേജിന്റെ കാലാവധി നീട്ടിക്കൊണ്ടുള്ള കേന്ദ്ര ജലക്കമ്മീഷന്റെ അറിയിപ്പ് ലഭിച്ചതായും മന്ത്രി പറഞ്ഞു. പാക്കേജിന്റെ ഭാഗമായ മുഴുവന്‍ പദ്ധതികളുടെയും സമയപരിധി നീട്ടുന്നതിനുളള ചര്‍ച്ചകള്‍ പുരോഗമിക്കുകയാണെന്നും മന്ത്രി പറഞ്ഞു. കുട്ടനാട് മേഖലയില്‍ 231 പാടശേഖരങ്ങളുടെ പുറംബണ്ട് നിര്‍മാണത്തിന്റെയും ഓണാട്ടുകര മേഖലയില്‍ 249 കോടിരൂപ ചെലവിട്ട് നടത്തുന്ന നിര്‍മാണങ്ങളുടെയും കാലാവധിയാണ് നീട്ടിയത്.
ഇതിനൊപ്പം തണ്ണീര്‍മുക്കം ബണ്ടിന്റെ നവീകരണം പൂര്‍ത്തിയാക്കാനുളള പദ്ധതിയുടെ കാലാവധിയും നീട്ടി. ഇതിനായി 255 കോടി രൂപയും കേന്ദ്രസര്‍ക്കാര്‍ അനുവദിച്ചു.
2007ലാണ് ഡോ. എം എസ് സ്വാമിനാഥന്‍ അദ്ധ്യക്ഷനായ കമ്മീഷനെ കുട്ടനാടന്‍ കൃഷിമേഖലയിലെ പ്രശ്‌നങ്ങള്‍ പഠിച്ചു പരിഹാരം നിര്‍ദ്ദേശിക്കാന്‍ കേന്ദ്ര സര്‍ക്കാര്‍ നിയോഗിച്ചത്. 2007 ല്‍ തന്നെ ഡോ. സ്വാമിനാഥന്‍ കുട്ടനാട്ടിലെ വിവിധ പ്രദേശങ്ങളില്‍ നേരിട്ടെത്തി പ്രശ്‌നങ്ങള്‍ പഠിച്ച് 227 പേജുവരുന്ന റിപ്പോര്‍ട്ട് കേന്ദ്രസര്‍ക്കാരിനു സമര്‍പ്പിച്ചു.

2008 ജൂലായ് 24ന് കേന്ദ്രം 1840 കോടി രൂപയുടെ സ്വാമിനാഥന്‍ റിപ്പോര്‍ട്ട് അംഗീകരിച്ചു. 2008 ഒക്ടോബറില്‍ സംസ്ഥാന സര്‍ക്കാരും പാക്കേജ് അംഗീകരിച്ചു. 2012 ല്‍ ഈ പദ്ധതിയുടെ കാലാവധി അവസാനിച്ചതിനെ തുടര്‍ന്നാണ് പദ്ധതി പ്രവര്‍ത്തനം നീട്ടിക്കൊണ്ടു പോകാനുളള അപേക്ഷയുമായി സംസ്ഥാനം കേന്ദ്രത്തെ സമീപിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha