സംസ്ഥാനം പ്രളയദുരിതം പേറിയ സാഹചര്യത്തിൽ മാറ്റിവച്ച മുഖ്യമന്ത്രിയുടെ അമേരിക്കന്‍ യാത്ര ഈ ആഴ്ച. മുഖ്യമന്ത്രി ചികിൽസയ്ക്കായി യുഎസിലേക്കു പോകാൻ തീരുമാനിച്ച സാഹചര്യത്തിൽ പകരം ചുമതല ഇ.പി. ജയരാജനു നല്കിയേക്കുമെന്ന് സൂചന.

മന്ത്രിസഭയിലെ രണ്ടാമൻ ഇ.പി. ജയരാജൻ തന്നെയെന്നുറപ്പിച്ച് നിയമസഭയിൽ സീറ്റു ക്രമീകരണം നടന്നിരുന്നു. വീണ്ടും മന്ത്രിയായ ശേഷമുള്ള ആദ്യ നിയമസഭാ സമ്മേളനത്തിൽ മുഖ്യമന്ത്രിയുടെ സമീപത്തെ സീറ്റ് ഇ.പി. ജയരാജനു ലഭിച്ചിരുന്നു. ഇൗ സീറ്റിലുണ്ടായിരുന്ന മന്ത്രി എ.കെ. ബാലന് മുൻ നിരയിൽ ഘടകകക്ഷി മന്ത്രിമാർക്കു ശേഷം ഇരിപ്പിടം നൽകി. ഇവിടെ ഉണ്ടായിരുന്ന മന്ത്രി ജി. സുധാകരനെ രണ്ടാം നിരയിലേക്കു മാറ്റി. മന്ത്രിസഭയിൽ രണ്ടാമനും മൂന്നാമനും ഇല്ലെന്നു മുഖ്യമന്ത്രി നേരത്തേ വ്യക്തമാക്കിയിരുന്നെങ്കിലും ഫലത്തിൽ രണ്ടാമൻ ഇ.പി. ജയരാജൻ തന്നെ. ഇതോടുകൂടി മുഖ്യമന്ത്രി അമേരിക്കയിലേക്ക് പോകുമ്പോൾ പകരം ചുമതല ജയരാജനു നൽകുമോ എന്ന ചർച്ച സജീവമാണ്. എന്നാൽ മുഖ്യമന്ത്രി വിദേശത്തേക്ക് പോകുമ്പോള്‍ മറ്റാരും പകരം ചുമതല വഹിക്കില്ല എന്നാണ് നിലവിൽ ലഭിക്കുന്ന വിവരം.