പ്രളയം വരുത്തിയ മാറ്റം; വരാപ്പുഴ അതിരൂപതയില് തിരുനാള് ആഘോഷങ്ങളും ആര്ഭാടങ്ങളും പൂര്ണ്ണമായും ഒഴിവാക്കണം; കര്ശന നിര്ദ്ദേശങ്ങളുമായി ഇടയലേഖനം
പ്രളയം പലരുടെയും മനം മാറ്റത്തിന് കാരണമായി. അതിന്റെ തുടക്കം സഭകളില് നിന്നായത് കൈയടിക്കേണ്ട കാര്യം തന്നെ. പ്രളയദുരന്തത്തിനുശേഷം അതിജീവനത്തിന്റെ ഭാഗമായി വരാപ്പുഴ അതിരൂപതയുടെ സമസ്തമേഖലകളിലും തിരുനാള് ആഘോഷങ്ങളും ജൂബിലി ആഘോഷങ്ങളും തീര്ത്തും ലളിതമായി നടത്തണമെന്ന് വരാപ്പുഴ ആര്ച്ച്ബിഷപ് ഡോ. ജോസഫ് കളത്തിപ്പറമ്പില് നിര്ദ്ദേശം നല്കി. ഈ വര്ഷത്തെ വല്ലാര്പാടം കാല്നട തീര്ത്ഥാടനവും മരിയന് കണ്വെന്ഷനും ഒഴിവാക്കി. ആരാധനക്രമം അനുസരിച്ചുള്ള ചടങ്ങുകള് മാത്രമാക്കി ചുരുക്കി. സെപ്റ്റംബര് രണ്ടിന് ദിവ്യബലിമധ്യേ ദേവാലയങ്ങളില് വായിക്കാനുള്ള ഇടയലേഖനത്തിലാണ് ഈ നിര്ദ്ദേശം നല്കിയിരിക്കുന്നത്.
രക്ഷാപ്രവര്ത്തനങ്ങളുടെ ഭാഗമായും അതിനുശേഷവും എല്ലാമേഖലകളിലും വരാപ്പുഴ അതിരൂപതയുടെ നേതൃത്വത്തില് ശക്തമായ ഇടപെടല് നടത്തുകയും നാനാജാതി മതസ്ഥര്ക്ക് ആശ്വാസമായി പ്രവര്ത്തിക്കുകയും ചെയ്ത എല്ലാവര്ക്കും ഇടയലേഖനത്തില് നന്ദി രേഖപ്പെടുത്തുന്നുണ്ട്. അതിരൂപതയുടെ സാമൂഹ്യസേവന വിഭാഗമായ എറണാകുളം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് പ്രളയബാധിത പ്രദേശങ്ങളിലെ സാമ്പത്തികമായി പിന്നോക്കം നില്ക്കുന്ന നാനാജാതി മതസ്ഥരായ 25,000 കുടുംബങ്ങള്ക്കായി അരി, പലവ്യഞ്ജനം എന്നിവ ഉള്പ്പെടെ അവശ്യസാധനങ്ങളുടെ കിറ്റ് വിതരണം ചെയ്തിരുന്നു.
അതോടൊപ്പം ജ്ഞാനസ്നാനം, ആദ്യകുര്ബാന സ്വീകരണം, മനസ്സമ്മതം, വിവാഹം, തിരുപ്പട്ട സ്വീകരണം, നിത്യവ്രതവാഗ്ദാനം മുതലായവ തികച്ചും ലളിതമായി നടത്താന് എല്ലാവരും പരിശ്രമിക്കണമെന്നും ആര്ച്ച്ബിഷപ് ആഹ്വാനം ചെയ്തു. ഇത്തരത്തില് സ്വരൂപിക്കുന്ന തുക പ്രളയബാധിത പ്രദേശങ്ങളുടെ പുനര്നിര്മ്മാണ പ്രവര്ത്തനങ്ങള്ക്കായി ഉപയോഗിക്കണം. അതിന്റെ ഭാഗമായി നേരത്തെ അതിരൂപതയിലെ വൈദികര് തങ്ങളുടെ ഒരു മാസത്തെ അലവന്സ് പുനരുദ്ധാരണ പ്രവര്ത്തനങ്ങള്ക്ക് നല്കിയിരുന്നു.
https://www.facebook.com/Malayalivartha
