ഹണിട്രാപ്പ് കേസിലെ രക്താര്ബുദ രോഗിയായ പ്രതി മെഡിക്കല്കോളജില് നിന്ന് രക്ഷപെട്ടു, മറ്റൊരു കേസില് കസ്റ്റഡിയിലെടുക്കാന് കര്ണാടക പൊലീസ് എത്തും മുമ്പായിരുന്നു സംഭവം
ഹണിട്രാപ്പ് കേസിലെ മുഖ്യപ്രതി കോഴിക്കോട് മെഡിക്കല് കോളജില് നിന്നും രക്ഷപ്പെട്ടു. കുറുമാത്തൂര് ചൊറുക്കള റഹ്മത്ത് മന്സിസിലെ കൊടിയില് റൂബൈസ്(22) ആണ് രക്ഷപ്പെട്ടത്. ഇന്നലെ രാത്രി 9.50നാണ് ഇയാളെ കാണാതായത്. രക്താര്ബുദ രോഗിയായ റുബൈസ് മൂന്ന് ദിവസം മുമ്പ് കണ്ണൂര് സ്പെഷ്യല് സബ് ജയിലില് റിമാന്ഡില് കഴിയവെ രക്തം ഛര്ദ്ദിച്ചിരുന്നു. തുടര്ന്നാണ് മെഡിക്കല് കോളജിലേക്ക് മാറ്റിയത്. മുമ്പ് ൂക്കിമിയ ബാധിച്ച റുബൈസ് രോഗവിമുക്തനായിരുന്നു.
ഏപ്രില് മൂന്നിന് ഏഴാംമൈലിലെ റിഫായി മസ്ജിദില് നിസ്ക്കാരത്തിനെത്തിയ ചെറുകുന്നോന് ഹൗസില് ഷബീറിന്റെ ഹോണ്ട ആക്ടീവ സ്കൂട്ടര് മോഷ്ടിച്ച കേസില് കഴിഞ്ഞമാസം 20നാണ് ഇയാള് പൊലീസിന്റെ പിടിയിലായത്. പിന്നീട് നടത്തിയ അന്വേഷണത്തില് റൂബൈസിന്റെ നേതൃത്വത്തില് നടന്ന ഹണിട്രാപ്പും ബ്ലാക്ക് മെയിലിങ്ങും ഉള്പ്പെടെയുള്ള കഥകള് പുറത്തായത്. ഇതോടെ റുബൈസ് ഉള്പ്പെടെ നാലുപേരെ അറസ്റ്റ് ചെയ്യുകയായിരുന്നു. ഹണിട്രാപ്പ് കേസില് ബ്ലാക്ക്മെയില് സംഘം ഉപയോഗിച്ച ലാപ്ടോപ്പ് ഉള്പ്പെടെ കഴിഞ്ഞ ദിവസം പോലീസ് കണ്ടെത്തിയിരുന്നു. പ്രതികളെ കസ്റ്റഡിയില് വാങ്ങി കൂടുതല് ചോദ്യം ചെയ്യാനുള്ള തയ്യാറെടുപ്പിലാണ് പോലീസ്.
കാസര്ഗോഡും മംഗലാപുരത്തും നിരവധി മോഷണകേസുകളില് പ്രതിയായ റുബൈസിനെ കര്ണ്ണാടകയിലെ ബാഗമണ്ഡലത്ത് സ്വര്ണ്ണമാല മോഷ്ടിച്ച കേസില് കസ്റ്റഡിയിലെടുക്കാനായി ഇന്നലെ വൈകുന്നേരത്തോടെ കര്ണ്ണാടക പൊലീസ് കോഴിക്കോട് എത്തിയിരുന്നു. ഇതറിഞ്ഞാണ് പ്രതി രക്ഷപ്പെട്ടതെന്ന് പൊലീസ് പറഞ്ഞു. വ്യാപകമായ തെരച്ചില് ആരംഭിച്ചതായി ഡിവൈഎസ്പി കെ.വി.വേണുഗോപാല് പറഞ്ഞു.
https://www.facebook.com/Malayalivartha
