കാഞ്ഞാറിൽ തനിച്ച് താമസിച്ചുവന്ന വയോധിക പാമ്പുകടിയേറ്റ് മരിച്ചു. കാഞ്ഞാർ കൂവപ്പള്ളി റോഡിൽ താന്നിക്കപ്പാറയിൽ വിശാലാക്ഷി (86) ആണ് വീടിന് സമീപത്തെ സ്വന്തം പറമ്പിൽവച്ച്‌ പാമ്പിന്റെ കടിയേറ്റ് മരിച്ചത്.

ഞായറാഴ്ച 12 മണിയോടെയാണ് സംഭവം നടന്നത്. മുറ്റത്തോടു ചേർന്ന് നിൽക്കുന്ന മാവിൽ നിന്ന് മാങ്ങ പറിക്കുന്നതിനിടെ കാലിലാണ് കടിയേറ്റത്. ഇവർ തൊട്ടടുത്ത വീട്ടിലെത്തി വിവരം അറിയിച്ചു. പിന്നാലെ കുഴഞ്ഞുവീഴുകയായിരുന്നു.

അയൽക്കാർ ചേർന്ന് മൂലമറ്റത്തെ സ്വകാര്യ ആശുപത്രിയിലെത്തിച്ചു. അവിടെ ആന്റിവെനമുണ്ടായിരുന്നില്ല. തുടർന്ന് തൊടുപുഴയിലെത്തിച്ചെങ്കിലും രക്ഷിക്കാൻ കഴിഞ്ഞില്ല. ഉച്ചകഴിഞ്ഞ് വനപാലകർ സ്ഥലത്തെത്തി പരിശോധിച്ചെങ്കിലും പാമ്പിനെ കണ്ടെത്താൻ കഴിഞ്ഞില്ല.

ഉയർന്നാണ് പാമ്പ് കൊത്തിയതെന്ന് വിശാലാക്ഷി പറഞ്ഞിരുന്നു. സാധാരണനിലയിൽ മൂർഖനാണ് ഇങ്ങനെ ചെയ്യുന്നത്. ചവിട്ടേൽക്കുകയോ മറ്റോ, ചെയ്താൽ അണലിയും ഇങ്ങനെയാണ്. അതിനാൽ അണലിയോ, മൂർഖനോ ആകാം കടിച്ചതെന്നാണ് വനപാലകരുടെ നിഗമനം. വിശാലാക്ഷിയുടെ മക്കൾ: ബാലൻ, കുഞ്ഞുമോൻ, ശശി, കനകമ്മ. . സംസ്കാരം ഇന്ന് രണ്ടിന് കാഞ്ഞാർ കൈപ്പ കവലയിലുള്ള മകന്റെ വീട്ടുവളപ്പിൽ നടക്കും.