വി.എസ് പാലക്കാട്ടെ പാര്‍ട്ടിയെ കൈക്കുമ്പിളില്‍ കൊണ്ടുനടന്ന കാലത്തും പിണറായിക്കൊപ്പം ശക്തമായി നിലയുറപ്പിച്ച നേതാവാണ് പി.കെ ശശി. എന്നാല്‍ ജില്ലയില്‍ ശശിയുടെ അപ്രമാദിത്വം അവസാനിക്കുന്ന കാഴ്ചയാണ് രണ്ട് മൂന്ന് ദിവസമായി കാണുന്നത്. പരാതി കഴിഞ്ഞ ജില്ലാ സമ്മേളനകാലത്ത് ഉയര്‍ന്ന് വന്നെങ്കിലും ആരോപണത്തില്‍ കഴമ്പില്ലെന്ന് പറഞ്ഞ് തള്ളിക്കളഞ്ഞിരുന്നു. തുടര്‍ന്ന് ഇപ്പോഴത് വിവാദമായതിനെ തുടര്‍ന്ന് ജില്ലയിലെ വിവിധ ഏര്യാകമ്മിറ്റികള്‍ വിളിച്ചുചേര്‍ക്കാന്‍ ശശി തീരുമാനിച്ചു. ഇന്ന് ചെര്‍പ്പുളശേരി ഏര്യാകമ്മിറ്റി വിളിച്ച് ചേര്‍ത്തെങ്കിലും കോറം തികയാത്തതിനെ തുടര്‍ന്ന് നാളെ നാലുമണിക്ക് മാറ്റിവെച്ചു.

19 അംഗങ്ങളാണ് ചെര്‍പുളശേരി ഏര്യാകമ്മിറ്റിയിലുള്ളത്. ഏര്യാസെക്രട്ടറിയടക്കം ഏഴ് പേര്‍ ഡല്‍ഹിയില്‍ നടക്കുന്ന കര്‍ഷക മാര്‍ച്ചില്‍ പങ്കെടുക്കാന്‍ പോയിരിക്കുകയാണ്. രണ്ട് പേര്‍ തെരഞ്ഞെടുപ്പ് കേസുകളുമായി ബന്ധപ്പെട്ട് തിരുവനന്തപുരത്താണ്. സ്ഥലത്തുള്ള ആറ് പേര്‍ അവധിക്ക് അപേക്ഷ കൊടുത്തു. ഇന്നത്തെ യോഗത്തിന് ഇന്നലെ അറിയിപ്പ് നല്‍കിയതിനെ തുടര്‍ന്നാണ് ഇവര്‍ പങ്കെടുക്കാത്തതെന്ന് അറിയുന്നു. മൂന്ന് പേരാണ് യോഗത്തിനെത്തിയത്.

ദേശാഭിമാനിയുടെ പ്രചരണം, പ്രളയ ദുരിതാശ്വാസ പ്രവര്‍ത്തനങ്ങള്‍ എന്നിവ ചര്‍ച്ച ചെയ്യാനാണ് യോഗം വിളിച്ചത്. സി.ഐ.ടി.യു ജില്ലാ സെക്രട്ടറി കൂടിയായ ശശിക്കെതിരെ മുന്‍ എം.എല്‍.എയുടെ നേതൃത്വത്തില്‍ ശക്തമായ നീക്കം നടക്കുന്നുണ്ടെന്നാണ് അറിയുന്നത്. ശക്തമായ നടപടി ശശിക്കെതിരെ ഉണ്ടാകുമെന്ന് പാലക്കാട്ട് ജില്ലയിലെ എം.എല്‍.എയും അവിടെ ശക്തമായ സ്വാധീനമുള്ള നേതാവുമായ വി.എസ് ഇന്നലെ പ്രസ്താവിച്ചിരുന്നു.