ഗൾഫ് നാടക-, ടെലിവിഷൻ രംഗത്തെ ഇതിഹാസ സാന്നിധ്യവും കലാസാംസ്‌കാരിക മേഖലയിൽ കുവൈത്തിന്റെ അഭിമാനവുമായ നടി ഹയാത്ത് അൽ- ഫഹദ് (78) അന്തരിച്ചു. ദീർഘനാളായി അസുഖബാധിതയായിരുന്നു. തീവ്രപരിചരണ വിഭാഗത്തിൽ ചികിത്സയിലിരിക്കെ ചൊവ്വാഴ്‌ചയായിരുന്നു അന്ത്യം സംഭവിച്ചത്.

വർഷങ്ങളായി വിവിധ ആരോഗ്യപ്രശ്നങ്ങൾ അലട്ടിയിരുന്നു. വിദേശ ചികിത്സയ്ക്കുശേഷം കുവൈത്തിൽ തിരിച്ചെത്തിയെങ്കിലും കഴിഞ്ഞ ദിവസങ്ങളിൽ ആരോഗ്യനില വഷളായതിനെ തുടർന്ന് വീണ്ടും ആശുപത്രിയിൽ പ്രവേശിപ്പിക്കുകയായിരുന്നു. പക്ഷാഘാതത്തെ തുടർന്ന് പലതവണ ആശുപത്രിയിൽ പ്രവേശിപ്പിക്കപ്പെട്ടു. പിന്നീട് തീവ്രപരിചരണം ആവശ്യമായി വന്നു. ആറുപതിറ്റാണ്ട് നീണ്ട കലാജീവിതത്തിൽ നാടകം, റേഡിയോ, സിനിമ, ടെലിവിഷൻ മേഖലകളിൽ അനവധി ശ്രദ്ധേയ കഥാപാത്രങ്ങളെ അവതരിപ്പിച്ചിരുന്നു.

‘ലേഡി ഓഫ്‌ ഗൾഫ് സ്‌ക്രീൻ’, ‘ഡീൻ ഓഫ്‌ ഗൾഫ് ഡ്രാമ’ എന്നീ വിശേഷണങ്ങൾ അറിയപ്പെട്ട അവർ ഗൾഫ് കലാസാംസ്‌കാരിക രംഗത്തെ മുൻനിര സാന്നിധ്യമായിരുന്നു. 1948-ൽ കുവൈത്തിൽ ജനിച്ച ഹയാത്ത്‌ ആരോഗ്യ മന്ത്രാലയത്തിലെ സേവനത്തിനിടെയാണ് കലാജീവിതം തുടങ്ങിയത്.

തുടർന്ന് കുവൈത്ത് റേഡിയോയിൽ ബ്രോഡ്‌കാസ്റ്ററായി പ്രവർത്തിക്കുകയും ചെയ്തിരുന്നു. 1960-കളിൽ ടെലിവിഷൻ രംഗത്തേക്ക് കടന്ന്, അഭിനയരംഗത്തും വ്യക്തിമുദ്ര പതിപ്പിക്കുകയും ചെയ്തു.