ജനപ്രിയ കാർട്ടൂൺ കഥാപാത്രമായ ഛോട്ടാ ഭീമിനെ ഇൻസ്റ്റന്റ് നൂഡിൽസ് വിപണിയിലെത്തിക്കാൻ ഗ്രീൻ ഗോൾഡ് ആനിമേഷനും ഇൻഡോ നിസിനും കൈകോർക്കുന്നു. ഇതിൻ്റെ ഭാഗമായി ‘നിസിൻ ഛോട്ടാ ഭീം മസാല നൂഡിൽസ്’ വിപണിയിലിറക്കി. കുട്ടികൾക്ക് പ്രിയപ്പെട്ട രുചിയിൽ തയ്യാറാക്കിയ ഈ നൂഡിൽസ് പാക്കറ്റിലുള്ള ക്യുആർ കോഡ് സ്‌കാൻ ചെയ്യുന്നതിലൂടെ കുട്ടികൾക്ക് 15-ഓളം ഛോട്ടാ ഭീം ഗെയിമുകൾ കളിക്കാനുള്ള ‘നിസിൻ ഫന്റാസ്റ്റിക് പ്ലേസോൺ’ എന്ന ഡിജിറ്റൽ പ്ലാറ്റ്‌ഫോമും ലഭ്യമാകും.

സാധാരണക്കാരായ കുടുംബങ്ങളെ ലക്ഷ്യമിട്ട് ആകർഷകമായ വിലയിലാണ് ഉൽപ്പന്നം പുറത്തിറക്കിയിരിക്കുന്നത്. ഛോട്ടാ ഭീമിനെ ടെലിവിഷൻ സ്ക്രീനിന് പുറത്ത് കുട്ടികളുടെ നിത്യജീവിതത്തിൻ്റെ ഭാഗമാക്കുകയാണ് ഈ സഹകരണത്തിലൂടെ ലക്ഷ്യമിടുന്നതെന്ന് ഗ്രീൻ ഗോൾഡ് ആനിമേഷൻ സിഇഒ രാജീവ് ചിലക പറഞ്ഞു. രാജ്യത്തുടനീളമുള്ള ചെറുകിട കടകളിലും സൂപ്പർ മാർക്കറ്റുകളിലും പുതിയ ഉൽപ്പന്നം ലഭ്യമാകും.