ജലന്ധര്‍ ബിഷപ് ഫ്രാങ്കോ മുളക്കലിന്റെ മോശം പെരുമാറ്റം സഹിക്കാനാവാതെ മിഷനറീസ് ഓഫ് ജീസസ് കന്യാസ്ത്രീ സമൂഹത്തില്‍നിന്ന് നിരവധിപേര്‍ തിരുവസ്ത്രം ഉപേക്ഷിച്ചതായി പ്രത്യേക അന്വേഷണസംഘത്തിന് വിവരം ലഭിച്ചു. ഇതുവരെ 18 കന്യാസ്ത്രീകളെങ്കിലും ഇങ്ങനെ ചെയ്തിട്ടുണ്ടെന്ന സൂചനയാണ് പൊലീസ് നല്‍കുന്നത്. ഇതില്‍പെട്ട രണ്ടുപേരാണ് ബിഷപ്പിനെതിരെ ഗുരുതര ആരോപണം ഉന്നയിച്ച് ഏറ്റവും ഒടുവില്‍ പ്രത്യേക അന്വേഷണസംഘത്തിന് മൊഴിനല്‍കിയത്. ലൈംഗികപീഡനം ആരോപിച്ച് കുറവിലങ്ങാട്ടെ കന്യാസ്ത്രീ പരാതി നല്‍കിയശേഷം ബിഷപ്പില്‍നിന്നും സഭയില്‍നിന്നും ഉണ്ടാവുന്ന സമ്മര്‍ദം സഹിക്കാനാവാതെ അടുത്തിടെ ഒരുകന്യാസ്ത്രീകൂടി വിട്ടുപോയതായും കണ്ടെത്തി.

ഇനിയും ബിഷപ്പിനെതിരെ കൂടുതല്‍ തെളിവുകള്‍ പുറത്തുവരുമെന്ന പ്രതീക്ഷയിലാണ് പൊലീസ്. നിലവില്‍ ബിഷപ്പിനെ അറസ്റ്റ് ചെയ്യാനുള്ള തെളിവുകളെല്ലാം പ്രത്യേകസംഘം ശേഖരിച്ചെങ്കിലും ഉന്നത ഉദ്യോഗസ്ഥ ഇടപെടല്‍ നടപടികള്‍ വൈകിപ്പിക്കുകയാണെന്നും ആക്ഷേപമുണ്ട്. അന്വേഷണം സുതാര്യമാണെന്നും കേസ് അട്ടിമറിക്കാന്‍ ശ്രമം നടക്കുന്നെന്ന ആക്ഷേപം അടിസ്ഥാനരഹിതമാണെന്നും അന്വേഷണത്തിന് മേല്‍നോട്ടം വഹിക്കുന്ന കോട്ടയം എസ്.പി ഹരിശങ്കര്‍ ആവര്‍ത്തിക്കുന്നുണ്ടെങ്കിലും അന്വേഷണം നീളുന്നത് പരാതിക്കാരിയെയും ആശങ്കപ്പെടുത്തുന്നു.

ഇതേതുടര്‍ന്നാണ് കന്യാസ്ത്രീ കോടതിയെ സമീപിക്കാന്‍ തയാറെടുക്കുന്നത്. ബിഷപ്പിനെ രക്ഷിക്കാന്‍ സഭയിലും പുറത്തും രഹസ്യനീക്കം ആരംഭിച്ചതോടെ പലസുപ്രധാന വിവരങ്ങളും ലഭിക്കാത്ത അവസ്ഥയുണ്ടെന്നും പ്രത്യേക അന്വേഷണസംഘം അറിയിച്ചു. എന്നാല്‍, 18 പേര്‍ തിരുവസ്ത്രം ഉപേക്ഷിച്ചെന്ന വിവരം സ്ഥിരീകരിച്ചതും കന്യാസ്ത്രീയുടെ ബന്ധുക്കള്‍ കോടതിയെ സമീപിക്കാനൊരുങ്ങുന്നതും നടപടികള്‍ വേഗത്തില്‍ പൂര്‍ത്തിയാക്കാന്‍ പൊലീസിന് പ്രേരകമാവുകയാണ്. ഒരാഴ്ചക്കകം ബിഷപ്പിനെ വിളിച്ചുവരുത്തി അറസ്റ്റടക്കം നടപടിയെടുക്കാനാണ് തീരുമാനം.