പാലക്കാട് പുതുപ്പള്ളിതെരുവില് നഗരസഭയുടെ അറവുശാലയിലെ മാംസാവശിഷ്ടങ്ങള് ഭക്ഷിച്ച കാക്കകള് കൂട്ടത്തോടെ ചത്തൊടുങ്ങുന്നു; മാംസാവശിഷ്ടം കഴിച്ച രണ്ട് തെരുവ് നായ്ക്കളും പരുന്തും ചത്തു
പുതുപ്പള്ളിതെരുവില് നഗരസഭയിലെ മുനവര് നഗറിലാണ് അറവുശാല പ്രവര്ത്തിക്കുന്നത്. മാംസാവശിഷ്ടങ്ങള് ഭക്ഷിച്ച കാക്കകള് കൂട്ടത്തോടെ ചത്തു. മാംസാവശിഷ്ടം കഴിച്ച രണ്ട് തെരുവ് നായ്ക്കളും പരുന്തും ചത്തു. വെള്ളിയാഴ്ച രാവിലെയാണ് സംഭവം. നഗരസഭ ആരോഗ്യ വിഭാഗം, ഭക്ഷ്യ സുരക്ഷ വിഭാഗം, മൃഗസംരക്ഷണ വിഭാഗം എന്നിവര് പരിശോധന നടത്തി.
പരിസരത്തെ കിണറുകളിലെ വെള്ളം ഉപയോഗിക്കരുതെന്നും നഗരത്തിലെ ഹോട്ടലുകളിലേക്കും വീടുകളിലേക്കും വില്പന നടത്തിയവയില് വിഷം കലര്ന്നിട്ടുണ്ടോയെന്ന് സംശയമുള്ളതിനാല് ഇവ ഉപയോഗിക്കരുതെന്നും ആരോഗ്യ വകുപ്പ് മുന്നറിയിപ്പ് നല്കിയിരുന്നു. സംഭവത്തില് കലക്ടര് റിപ്പോര്ട്ട് തേടുകയും നഗരസഭ അടിയന്തര കൗണ്സില് വിളിക്കുകയും ചെയ്തു.
സമീപത്തെ മുനവര് നഗറിലെ മൂന്ന് വീടുകളില് കിണറ്റില് കാക്കകള് ചത്തുവീണ നിലയിലും കണ്ടെത്തി. അറവ് മാലിന്യത്തില് വിഷം കലര്ന്നതായി പ്രാഥമിക പരിശോധനയില് വ്യക്തമായതായി നഗരസഭ ആരോഗ്യവകുപ്പ് വിഭാഗവും പൊലീസും അറിയിച്ചു. പ്രദേശത്ത് തെരുവ് നായ്ക്കളുടെ ശല്യം രൂക്ഷമാണെന്നും അവയെ കൊല്ലാനാണ് ഇറച്ചി മാലിന്യത്തില് വിഷം കലര്ത്തിയതെന്നും സൂചനയുണ്ട്. വെറ്ററിനറി ഡോക്ടറുടെ പോസ്റ്റ്മോര്ട്ടം റിപ്പോര്ട്ട് കിട്ടിയ ശേഷം തുടര്നടപടികള് സ്വീകരിക്കും.
പ്രാഥമിക റിപ്പോര്ട്ടില് വിഷം ഉള്ളില്ച്ചെന്നാണ് കാക്കകളും നായും ചത്തതെന്ന് മൃഗഡോക്ടര് അറിയിച്ചു. ഒരു കാക്കയെയും നായ്യെയുമാണ് പോസ്റ്റ്മോര്ട്ടം ചെയ്തത്. സംഭവത്തെ തുടര്ന്ന് നടത്തിയ പരിശോധനയില് അനധികൃതമായി പ്രവര്ത്തിക്കുന്ന അറവുകേന്ദ്രങ്ങളും ഇറച്ചിക്കടകളും അടച്ചു പൂട്ടി.
https://www.facebook.com/Malayalivartha
