തൃശൂര്‍ അശ്വിനി ജംഗ്ഷന് സമീപം ടാങ്കര്‍ ലോറിയില്‍ നിന്നും ആസിഡ് ചോര്‍ന്നു. അഗ്‌നിരക്ഷ സേനയുടെ ഇടപെടല്‍ മൂലം ഒഴിവായത് വന്‍ ദുരന്തം. ഞായറാഴ്ച ഉച്ചയ്ക്ക് 12 മണിയോടെയാണ് സംഭവമുണ്ടായത്. കര്‍ണാടകയിലെ കാര്‍വാറില്‍ നിന്ന് ആലുവയിലേക്ക് പോവുകയായിരുന്ന ടാങ്കര്‍ ലോറിയാണ് അപകടത്തില്‍പെട്ടത്. ടാങ്കര്‍ ലോറിയുടെ വാല്‍വിന് ചോര്‍ച്ച ഉണ്ടായതിനെ തുടര്‍ന്ന് റോഡിലേക്കാണ് ഹൈഡ്രോക്ലാറിക് ആസിഡ് ഒഴുകി വീണത്. പ്രദേശത്ത് പുകയും ഉയര്‍ന്നു. ഇതോടെ നാട്ടുകാര്‍ പരിഭ്രാന്തരായി.

ഓട്ടത്തിനിടെ ടാങ്കര്‍ ലോറിയുടെ പിന്‍ഭാഗത്തെ പ്രധാനവാല്‍വ് ഊരിപ്പോയതാണ് ചോര്‍ച്ചയ്ക്ക് കാരണം. വലിയ അളവിലാണ് ആസിഡ് റോഡിലേക്കൊഴുകിയത്. വാല്‍വില്‍ അറ്റകുറ്റപ്പണി നടത്തി ചോര്‍ച്ച അടയ്ക്കാനാണ് ആദ്യം ശ്രമം നടത്തിയത്.
പെട്രോള്‍ പമ്പില്‍ നിന്നും അഞ്ച് മീറ്റര്‍ മാത്രം അകലെയായിരുന്നു ടാങ്കര്‍ ലോറി നിര്‍ത്തിയിട്ടത്. ഇതും ജനങ്ങളെ പരിഭ്രാന്തരാക്കി. അഗ്‌നിശമന സേനാംഗങ്ങളെത്തി അറ്റകുറ്റി പണിനടത്താന്‍ ശ്രമിച്ചെങ്കിലും സമീപത്ത് പെട്രോള്‍ പമ്പുള്ളതിനാല്‍ നീക്കം ഉപേക്ഷിക്കുകയായിരുന്നു. തുടര്‍ന്ന് വാല്‍വില്‍ മരക്കുറ്റി അടിച്ച് കയറ്റി ചോര്‍ച്ച കുറയ്ക്കുകയായിരുന്നു.

മരക്കുറ്റി അടിച്ച് കയറ്റി ചോര്‍ച്ച നിയന്ത്രിച്ച ശേഷം ആളൊഴിഞ്ഞ സ്ഥലത്തേയ്ക്ക് ടാങ്കര്‍ ലോറി മാറ്റുകയായിരുന്നു. അഗ്‌നിശമന സേനയുടെ വാഹനത്തില്‍ നിന്നും ആസിഡൊഴുകുന്ന ഭാഗത്തേയ്ക്ക് വെള്ളം ചീറ്റിക്കൊണ്ടേയിരുന്ന് അപകട സാധ്യത ഒഴിവാക്കുകയായിരുന്നു.

റോഡിലേക്ക് ആസിഡ് വീണു തുടങ്ങിയതോടെ പ്രദേശത്തുള്ളവര്‍ക്ക് ശാരീരിക ബുദ്ധിമുട്ടുകളും അനുഭവപ്പെടാന്‍ തുടങ്ങി. പലര്‍ക്കും ശ്വാസം മുട്ടല്‍ അനുഭവപ്പെട്ടു. ചിലര്‍ക്ക് മൂക്കിന്റെ ഉള്‍ഭാഗത്ത് നീറ്റല്‍ അനുഭവപ്പെട്ടു. സംഭവസ്ഥലത്തുനിന്നും അകലം പാലിക്കണമെന്ന് പോലീസ് നിര്‍ദ്ദേശം നല്‍കിയിരുന്നു.