കിരീടവും കുരിശുവടിയും നഷ്ടമായ തിരുമേനിക്ക് സബ് ജയിലിലെ അന്തിയുറക്കം വിധി കരുതി വച്ചതാണ്. ഫ്രാങ്കോ, നിങ്ങളെ പിഴുതെറിയേണ്ടത് ഒരു വിശ്വാസത്തിന്റെ പ്രശ്‌നമായിരുന്നു. സഭയുടെയും സമൂഹത്തിന്റെയും. അതു ദൈവഹിതമായിരുന്നു. കാവല്‍ക്കാരന്‍ കുറ്റവാളിയായാല്‍ പിന്നെ ഈ സഭയ്ക്ക് ആര് കാവല്‍ നില്ക്കും.

കുറവിലങ്ങാട്ടെ കന്യാസ്ത്രീ മഠത്തില്‍ ദുര്‍ബലമായി തുടങ്ങിയ നിലവിളി ഒടുവില്‍ കേരളം കേട്ടു. സഭയുടെ കനത്ത മതില്‍ക്കെട്ടിനുള്ളില്‍ നീതി കിട്ടില്ല എന്നുറപ്പിച്ച് അവര്‍ അധികാര കേന്ദ്രങ്ങള്‍ക്കുമുന്നില്‍ കണ്ണീരോടെ യാചിച്ചു. അവരെ ആട്ടിപ്പായിക്കാന്‍ മാത്രം ശക്തമായിരുന്നു സഭയുടെ ഉരുക്കുകൈകള്‍. ഒടുവില്‍ അവര്‍ തെരുവിലെത്തി.

തങ്ങളുടെ കന്യാകാത്വം സംരക്ഷിക്കുവാന്‍ ഞങ്ങള്‍ക്കു കഴിയുന്നില്ല എന്നവര്‍ ഉറക്കെ നിലവിളിച്ചു.  രാഷ്ട്രീയ കേരളം ഭയപ്പെട്ടു. സഭയോട് പൊരുതാന്‍ മാത്രം കെല്‍പ്പുള്ള രാഷ്ട്രീയ പ്രസ്ഥാനങ്ങളോ, നേതാക്കളോ കേരളത്തിലില്ല. മെത്രാന്റെ കൈമുത്തിയ ചുണ്ടില്‍ നിന്ന് പരിഹാസത്തിന്റെ തുപ്പല്‍ തെറിച്ചപ്പോള്‍ സഭയ്ക്കു പൊള്ളി. അരുതെന്നു പറയാന്‍ സഭയ്ക്കു പേടിയായിരുന്നു. പക്ഷേ കേരളം ഉണര്‍ന്നെണീറ്റു. അവിടെ ക്രിസ്ത്യാനിയില്ലായിരുന്നു. പകച്ചുപോയ സഭാനേതൃത്വം തന്നെ കൈയ്യൊഴിയുമെന്നായപ്പോള്‍ തിരുമേനി, അരമന വിട്ടിറങ്ങി തോല്ക്കാനുള്ള പടപ്പുറപ്പാട്.

വിറങ്ങലിച്ചു നിന്ന സര്‍ക്കാരിനെ വിരട്ടി. പോലീസ് പതറി. അഗ്നി മഴയായിപ്പെയ്യുന്ന മാധ്യമ വാര്‍ത്തകളില്‍ കേരളം കത്തുമെന്നായപ്പോള്‍ പോലീസ് തിരുമേനിയെക്കൊണ്ട് പകുതി സത്യം പറയിച്ചു. സ്ഥാനചിഹ്നങ്ങള്‍ പേറുന്ന ശിരസ്സുയര്‍ത്തി വിരട്ടുവാന്‍ ഫ്രാങ്കോക്കു കഴിഞ്ഞില്ല. ആ ശിരസു താണു. ഒടുവില്‍ ഫ്രാങ്കോ വിതുമ്പി. ഇന്നലെവരെ രാജാവിനെപ്പോലെ അരമനയില്‍ ജീവിച്ചു. സ്വയം ബ്രഹ്മചര്യം തെരഞ്ഞെടുത്ത് സഭാവസ്ത്രമണിഞ്ഞ പൗരോഹിത്യവും, ഇടയ സമൂഹത്തെ നയിക്കാന്‍ നിശ്ചയിക്കപ്പെട്ട തിരുമേനിസ്ഥാനവും ഇനി സഭ തിരിച്ചെടുക്കും. കാരണം സഭയ്ക്കും നിലനില്പാണല്ലോ വലുത്.

ഉഭയ സമ്മതപ്രകാരമാണ് ലൈംഗിക ബന്ധത്തിലേര്‍പ്പെട്ടതെന്നും, ബലാത്സംഗം തെളിയിക്കാനുമുള്ള വെല്ലുവിളിയില്‍ പോലീസ് പതറുമെന്നും കരുതിയത് തെറ്റി. കര്‍ത്താവിന്റെ മാലാഖമാര്‍ മാനത്തിനുവേണ്ടി തെരുവില്‍ മുറവിളി കൂട്ടി. അവരുടെ നീതിക്കുവേണ്ടി കേരളം ഒത്തുചേര്‍ന്നു. സഭയുടെ നീതിയും, നിയമവും തിരുമേനിക്ക് ഒപ്പമായിരുന്നു. ഇത് ജനാധിപത്യത്തിലെ നിയമസംവിധാനങ്ങള്‍ക്ക് തൃപ്തി വന്നില്ല. ഒടുവില്‍ ഫ്രാങ്കോ വീണു. കള്ളനെപ്പോലെ പതുങ്ങി നടക്കേണ്ടി വന്നു തിരുമേനിക്ക്.
ഫ്രാങ്കോയുടെ മുളപൊട്ടിയ കാമം പീഡനമായി ഒരു കന്യാസ്ത്രീയുടെ കണ്ണുനീരാകുന്നതിനു മുമ്പ്, ആ സഭാകുപ്പായം ഊരിക്കളഞ്ഞ് ശരീരത്തിന്റെ തൃഷ്ണ ശമിപ്പിക്കാമായിരുന്നു.

ഫ്രാങ്കോ ഒരു പ്രതീകമാണ്. ക്രിസ്തുവിന്റെ മണവാട്ടിമാരെ നയിക്കേണ്ട ഇടയര്‍, ചതിയുടെ ചെന്നായ്ക്കളായി മാറുന്ന നിരവധി സംഭവങ്ങളുണ്ട്. ഇനിയും ചൂണ്ടുവിരലുകളുയര്‍ന്നേക്കാം. സഭ തിരുത്തലുകള്‍ക്ക് തയ്യാറാകണം. ഈ ചാട്ടവാറടി വന്നുവീഴുന്നത് ജീര്‍ണ്ണതയുടെ അസ്ഥിവാരങ്ങള്‍ക്കു മുകളിലാണ്. വെള്ളയടിച്ച കുഴിമാടങ്ങളും, ചില്ലുമേടകളും ചെളിയില്‍ പുതയരുത്. ഇനി കണ്ണീര്‍ വീഴരുത്. സഭ സമൂഹത്തിന് നന്മയുടെ ഉറവയാകണം.