കന്യാസ്ത്രീകളുടെ സമരത്തില് വര്ഗ്ഗീയ ദേശവിരുദ്ധ ശക്തികള് നുഴഞ്ഞുകയറിയതായി റിപ്പോര്ട്ട്: സമരത്തിന് അക്രമസ്വഭാവം നല്കുകയാണ് ഇവരുടെ ഉദ്ദേശ്യമെന്ന് രഹസ്യാന്വേഷണ വിഭാഗം
കന്യാസ്ത്രീകളുടെ സമരത്തില് വര്ഗ്ഗീയ ശക്തികള് നുഴഞ്ഞുകയറി പ്രശ്നങ്ങള് സൃഷ്ടിക്കാന് ശ്രമങ്ങള് നടക്കുന്നതായി രഹസ്യാന്വേഷണ റിപ്പോര്ട്ട്. സമരം തുടങ്ങി പതിനാലാം ദിവസം എത്തിനില്ക്കുമ്പോള് സമരപ്പന്തലില് ദേശവിരുദ്ധ ശക്തികളും വര്ഗ്ഗീയവാദികളുമെന്നാണ് റിപ്പോര്ട്ട്. ഏതു സമരത്തിലും മുതലെടുപ്പ് നടത്തുന്ന ഇത്തരം ശക്തികള് എല്ലാ സമുദായങ്ങള്ക്കും ഭീഷണിയാണ്. കൊച്ചിയില് എന് ഐഎ അന്വേഷിച്ച പല കേസുകളിലും ഇത്തരം മതവര്ഗ്ഗീയവാദികളുടെ കരങ്ങള് ശക്തമായിരുന്നു. പോലീസിനെക്കാളും പ്രബലരായ ഇത്തരം സംഘങ്ങള് സംഘടിതമായാണ് നീങ്ങുന്നത്. ആയുധങ്ങളുടെ പിന്ബലവുമായി എത്തുന്ന സംഘങ്ങള് എന്തിനും മടിക്കാത്തവരാണ്. ഇത്തരക്കാരുടെ കയ്യിലെ ചട്ടുകമായി കന്യാസ്ത്രീകള് മാറിയോ എന്ന് പോലീസ് അന്വേഷണം നടക്കുന്നുണ്ട്. പോലീസിന്റെ നീക്കങ്ങള്പ്പോലും രഹസ്യമായി നിരീക്ഷിക്കുന്ന ഇവര് സമരപ്പന്തലിലെ ആലോചന യോഗത്തില് സമരപരിപാടികളുടെ രൂപം മാറ്റണമെന്ന് നിരന്തരമായി ആവശ്യപ്പെട്ടുകൊണ്ടിരിക്കുകയാണ്. സമൂഹത്തിന്റെ സമാധാന അന്തരീക്ഷം തകര്ക്കുകയാണ് ഇവരുടെ ലക്ഷ്യം. സമരം സര്ക്കാരിനെതിരെ തിരിക്കാനും ഇത്തരക്കാര് ഗൂഢമായി ശ്രമിക്കുന്നുണ്ട്. പോലീസ് സമരക്കാരെയെല്ലാം ഇപ്പോള് രഹസ്യമായി നിരീക്ഷിക്കുന്നുണ്ട്. പോലീസിന്റെ റിപ്പോര്ട്ടിന്റെ അടിസ്ഥാനത്തില്ക്കൂടിയാണ് കോടിയേരിയുടെ പ്രസ്താവന. കന്യാസ്ത്രീ നല്കിയ പീഡനപരാതിയില് ജലന്ധര് ബിഷപ്പ് ഫ്രാങ്കോ മുളയ്ക്കലിനെ അറസ്റ്റ് ചെയ്യണമെന്നാവശ്യപ്പെട്ട് കന്യാസ്ത്രീകള് നടത്തിവരുന്ന സമരത്തിനെതിരെ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. സമരത്തിനു പിന്നില് ദുരുദ്ദേശമാണെന്നും, രാഷ്ട്രീയപ്രചാരണത്തിന്റെ ഭാഗമാണിതെന്നും കോടിയേരി വിമര്ശനം ഉയര്ത്തി. സമരകോലാഹലമുയര്ത്തി തെളിവുശേഖരണം തടസ്സപ്പെടുത്താനാണ് ശ്രമമെന്നും കോടിയേരി തുറന്നടിച്ചു. തെളിവുണ്ടെങ്കില് ഏത് പാതിരിയായാലും പൂജാരിയായലും രഷപ്പെടില്ലെന്നും സര്ക്കാര് ഇരയ്ക്കൊപ്പമാണെന്നും കോടിയേരി പറഞ്ഞു.
https://www.facebook.com/Malayalivartha
