ബംഗാള്‍ ഉള്‍ക്കടലില്‍ ന്യൂനമര്‍ദം രൂപപ്പെട്ടതിനെ തുടർന്ന് ഇടുക്കി പദ്ധതി പ്രദേശങ്ങള്‍ ഉള്‍പ്പെടയുള്ള മേഖലയില്‍ മഴ പെയ്യുന്നു. ന്യൂനമര്‍ദത്തെ തുടർന്ന് ബുധനാഴ്ച മുതൽ രൂപപ്പെട്ട കാലാവസ്ഥ വ്യതിയാനത്തിൽ 15.4മീറ്റര്‍ മഴപെയ്തു.

ഇടുക്കി ഡാമില്‍ ജലനിരപ്പ് 2387.70അടിയായി കുറഞ്ഞതിനാല്‍ വൈദ്യുതോല്‍പാദനത്തിലും കുറവു വരുത്തി. സംഭരണശേഷിയുടെ 82.47ശതമാനമാണ് ഇപ്പോള്‍ ഡാമിലുള്ളത്. എന്നാലും കഴിഞ്ഞ വര്‍ഷത്തേക്കാള്‍ 25.54 അടി വെള്ളം കൂടുതലുണ്ട്.

ബംഗാൾ ഉൾക്കടലിൽ രൂപം കൊണ്ട ന്യുന മർദം അതിശക്തമെന്നു കാലാവസ്ഥ നിരീക്ഷകർ. ചുഴലിക്കാറ്റിന് തൊട്ടു കീഴെയുള്ള അതിന്യുനമർദമാണിത്. കാലാവസ്ഥാ വകുപ്പ് അതീവ ജാഗ്രത നിർദേശം നൽകി. കേരളത്തിലും ഇതിന്റെ ശക്തി പ്രകടമാണ്, സംസ്ഥാനത്തിന്റെ പല ഭാഗങ്ങളിലും മഴ പെയ്യുന്നു.

എങ്കിലും സംസ്ഥാനത്തു കനത്ത മഴയ്ക്ക് സാധ്യത ഇല്ല, 4 സെന്റിമീറ്റർ വരെ പെയ്യുമെന്നു ഐ എം ഡി, തിരുവനന്തപുരം അറിയിച്ചു. പടിഞ്ഞാറു-തെക്കു-പടിഞ്ഞാറു ദിശയിലേക്കു നീങ്ങുന്ന അതിന്യുനമർദം ആന്ധ്ര പ്രദേശിന്റെ വടക്കു ഭാഗത്തും ഒഡീഷ തീരങ്ങളിലും കലിംഗപട്ടണത്തിനും പുരിക്കുമിടയിലെ തീരങ്ങളിലും വ്യാഴാഴ്ച രാത്രിയോ വെള്ളിയാഴ്ച പുലർച്ചെയോ ശക്തമാകുമെന്ന് മുന്നറിയിപ്പ് ഉണ്ട്.