കന്യാസ്ത്രീയെ ബലാല്‍സംഗം ചെയ്ത കേസില്‍ ജലന്ദര്‍ ബിഷപ്പ് ഫ്രാങ്കോ മുളയ്ക്കല്‍ മൂന്നാം ദിവസം ചോദ്യം ചെയ്യലുമായി സഹകരിക്കുന്നില്ലെന്ന് അന്വേഷണസംഘം. പല ചോദ്യങ്ങള്‍ക്കും എനിക്കൊന്നും ഓര്‍മയില്ല, അറിയില്ല എന്നാണ് ബിഷപ്പ് പറയുന്നത്. ശേഖരിച്ച തെളിവുകള്‍ വെച്ച് ചോദ്യം ചെയ്തു. അതില്‍ ചില കാര്യങ്ങളില്‍ ബിഷപ്പ് പറയുന്നത് തെറ്റാണെന്ന് അന്വേഷണസംഘം ബോധ്യപ്പെടുത്തിയിട്ടുണ്ട്. അറസ്റ്റിസ് പൊലീസിന് സ്വതന്ത്രചുമതല സര്‍ക്കാര്‍ നല്‍കിയിട്ടുണ്ട്. അതാണ് പൊലീസിനെ കൂടുതല്‍ സമ്മര്‍ദ്ദത്തിലാക്കുന്നത്. അറസ്റ്റിന് മുമ്പായി നിയമോപദേശം തേടിയതും അതിനോടൊപ്പം കന്യാസ്ത്രീയെ കുറവിലങ്ങാട് മഠത്തില്‍ ചെന്ന് സി.ഐ ചോദ്യം ചെയ്തതും അതുകൊണ്ടാണ്. 

തെളിവുകളും രേഖകളും തനിക്കെതിരാണെന്ന് മനസിലായതോടെ ഇന്നലെ രത്രിയോടെ തന്നെ ബിഷപ്പ് മുന്‍കൂര്‍ ജാമ്യത്തിന് നീക്കം തുടങ്ങി. ബിഷപ്പിനൊപ്പം കഴിഞ്ഞ മൂന്ന് ദിവസമായി അഭിഭാഷകനുമുണ്ട്. പൊലീസിന്റെ നീക്കങ്ങള്‍ മനസിലാക്കിയ ശേഷമാണ് നിയമനടപടികള്‍ സ്വീകരിക്കാന്‍ ബിഷപ്പ് തീരുമാനിച്ചിരിക്കുന്നത്. അറസ്റ്റ് ചെയ്താല്‍ വൈക്കംകോടതിയിലാണ് ബിഷപ്പിനെ ഹാജരാക്കുക. അങ്ങനെയെങ്കില്‍ അവിടെയായിരിക്കും ജാമ്യാപേക്ഷ നല്‍കുക. എന്നാല്‍ സാധാരണഗതിയില്‍ ബലാല്‍സംഗക്കേസില്‍ ജാമ്യംനല്‍കാറില്ല. അങ്ങനെ വന്നാല്‍ ബിഷപ്പിന് ഹൈക്കോടതിയെ സമീപിക്കാം. 

കന്യാസ്ത്രീ ബലാല്‍സംഗം ചെയ്‌തെന്ന് പറയുന്നതിന്റെ അടുത്തദിവസം അവര്‍ക്കൊപ്പം അവരുടെ ബന്ധുവീട്ടിലെ ചടങ്ങില്‍ താന്‍ പങ്കെടുത്തിരുന്നെന്ന് ബിഷപ്പ് അന്വേഷണ സംഘത്തോട് ആവര്‍ത്തിച്ചു. എന്നാല്‍ ഇക്കാര്യം തെറ്റാണെന്ന് ചില കന്യാസ്ത്രീകളും പരാതിക്കാരിയുടെ ബന്ധുക്കളും മൊഴിനല്‍കിയിട്ടുണ്ട്. മാത്രമല്ല ചങ്ങിന്റെ ഫോട്ടോകളില്‍ കന്യാസ്ത്രീ ദു:ഖിതയായാണ് കാണപ്പെട്ടതെന്ന് ഫോട്ടോഗ്രാഫുകളില്‍ നിന്ന് വ്യക്തമാണെന്ന് അന്വേഷണ സംഘം മനസിലാക്കിയിട്ടുണ്ട്.

അതോടൊപ്പം ബിഷപ്പ് ഫോണിലൂടെ നടത്തിയ അശ്ലീലചുവയുള്ള സംഭാഷണങ്ങളും കുറവിലങ്ങാട് മഠത്തില്‍ തങ്ങിയെന്ന് ഡ്രൈവര്‍ നല്‍കിയ മൊഴിയും പൊലീസിന് ലഭിച്ചിട്ടുണ്ട്. ഇതെല്ലാം ബിഷപ്പിനെതിരായ സാഹചര്യത്തെളിവുകളാണ്. അതോടൊപ്പം പരാതിക്കാരിയെ സ്വാധീനിക്കാന്‍ ശ്രമിച്ചതിന്റെ ഫോണ്‍ രേഖകളടക്കം ലഭിച്ചെന്ന് കോട്ടയം എസ്.പി മുമ്പ് വ്യക്തമാക്കിയിരുന്നു.